E Na’o Tusiga Faatekinolosi: Talavou Matutua
O le Lagonaina o le Mana o Keriso i le avea ai ma se Tagata ua Tipi’esea se Vaega o le Tino ma le Tosina atu i le Itupa e Tasi
O aafiaga o lo’u olaga ua taitai atu ai a’u ia ou malamalama i le ala e mafai ai e Keriso ona faamalolo i tatou—i le faaletino ma le faaleagaga—e ala i Lana Togiola.
O se Aso Faraile masani. Sa ou i ai i le galuega, ma aveina se masini-lifi [forklift] e pei ona masani ai, ina ua faafuasei lava ona le mafai ona ou puleaina. Sa tau leai se pa’ō ina ua ou so’aina le puipui, ae sa ou lagonaina se tiga matuitui faafuase’i i lo’u vae.
Sa ou tilotilo ifo i lalo ma iloa ai ua nutipalaina lo’u vae i le va o le puipui ma le lifi [forklift].
Sa amata ona ou ee mo se fesoasoani, ma ou te le manatua se isi mea e ese mai le leo o le taavale a le falema’i ma le popole i le lumana’i.
I le falema’i, ou te manatua lo’u mafaufau ai ua toatele na’ua tausima’i i totonu o le potu. Sa ou fefe foi aua ou te sau mai Kolomupia ma tautala fa’aSipaniolo, ma o le au tausima’i i le falema’i o Iuta sa vave tele le talanoa i le gagana Peretania. Sa faigata ia te a’u ona malamalama ia i latou. O sekone uma na pei o se faavavau. Ae sa ou iloaina lava o le a tipi lo’u vae, le’i taitai faia le iloiloga.
A o faatalitali ai mo se foma’i tipitipi, sa ou mafaufau i si o’u tei. Sa fiafia i le soka, ma sa ou mana’o e faasaoina lo’u vae ina ia mafai ona ma ta’a’alo. Ma e na o le tasi lena o le tele o mea na ou manaomia ai lo’u vae! Ina ua uma ona iloilo e foma’i tipitipi e to’alua lo’u manu’a, sa la fuafuaina o le auala sili lava e faaitiitia ai isi faafitauli o le tipi’ese lea o lo’u vae. Sa ou iloaina o le filifiliga sa’o lea, ae sa ou faanoanoa.
O se Faalavelave Faafuasei po o se Faasalaga?
O le taeao na sosoo ai ina ua uma le taotoga, sa le lagonaina o o’u ola pea. Sa tele naua a’u fesili ma sa tau leai ni tali. Ioe, sa ou laki o loo o’u ola pea, ma sa tatau ona sili atu le ogaoga o le faalavelave, ae sa ou lagonaina foi le leiloa. Sa leai so’u vae, ma sa ou le iloa po o le a le mea o le a oo i ai lo’u olaga mai lena taimi.
Sa ou faaaluina aso e 20 i le falemai. Sa faamafanafanaina ma lagolagoina a’u e lo’u aiga ma uo, ma sa amata foi ona ou faia ni togafitiga faaletino ma amata ai le ala i le toe faaleleia ma le faamalologa. Sa ou ofo i le lava o le lototele e ausia ai le tele o mea i lena auala i le toe manuia i na aso e 20, e aofia ai le amata ona aoao e savali ma se vae faapipii.
Ae ui i lea, o le mea sa ou le maua ai le lototele e fai, o le tatalo. Sa ou lagonaina e pei ua le mafai ona ou faasaga i le Atua. Sa ou faapea sa ou ita ia te Ia, ae o le mea moni, sa ou maasiasi ia te a’u lava ia. I lo’u mafaufau, o lenei “faalavelave” atoa na foliga mai o se faasalaga, o se vaega ona sa ou le toe alu i le lotu ma ou te le’i mulimuli i Ana poloaiga, ae o le tele lava ona sa ou oo i le tosina atu i la’u itupa mo le umi ou te manatua ai. Sa ou manatu sese ua le fiafia o Ia ma maasiasi ia te a’u.
Sa ou manu’a i le faaletino ma le faaleagaga.
Ina ua ou te’a mai le falema’i, sa mafatia lo’u soifua maloloina faalemafaufau. E ui lava sa siomia a’u e lo’u aiga ma uo, sa ou lagona pea le tuuato’atasi. Sa ou iloaina sa ou manaomia le Tama Faalelagi ma Iesu Keriso ina ia mafai ona faamaloloina, ae sa ou tauivi ina ia mafai ona ou tatalo.
Na i’u ina le mafai ona ou toe taofiofi. Sa ou oo atu i lo’u tulaga gausia ma sa ou naunau e tootuli i lalo ma tatalo mo le taimi muamua talu mai se taimi umi lava. Sa ou tagi masusu a o sasa’a atu lou loto i le Tama Faalelagi. Sa ou fesili atu ia te Ia i fesili ma ta’u atu i ai o’u atugaluga seia oo ina ou le manava.
Na faasolosolo malie lava, ona faatumulia a’u i se lagona o le filemu. Ma sa oo mai nei upu i lo’u loto ma lo’u mafaufau: “O nei mea uma o le a avea ma ou lelei e faaleleia ai ou uiga tauleleia. O se mea na tupu faafuasei.”
E moni lava?
Pe ua na o se faalavelave moni ea lenei mea? E le o se faasalaga? O lena tali sa leai se uiga ia te a’u. Ae ina ua mavae ni nai aso o le mafaufau loloto, sa ou iloaina e moni. Sa ou iloaina foi e alofa le Tama Faalelagi ia te au. Sa Ia valaau mai ia te a’u e toe foi atu i Lana lafu mo se taimi umi lava, ma na i’u lava ina ou sauni e toe fo’i mai. Sa tonu ia te a’u ou te toe fo’i i le lotu ma amata se faagasologa maoae, ma le faamalologa faaleagaga faatasi ai ma lo’u epikopo agaalofa, o le sa fesoasoani ia te a’u e valaaulia atoatoa le filemu ua ofoina mai e le Faaola i lo’u olaga.
Filemu i le Tulaga o le Le Atoatoa
E le’i faigofie le toe fo’i mai i le Ekalesia. Mo se taimi umi lava, sa matua’i ou maasiasi lava mo a’u lava ia. Ae o le tele o lo’u malamalama i lo’u faasinomaga paia, o le itiiti fo’i lea o le maasiasi na ou lagonaina. Ua ou iloa nei o o’u lagona e uiga i tamaita’i e le avea ai a’u o se tagata agasala, ma e le o faatapula’aina e lo’u vae na tipiese lo’u taua. O nei uiga auaumama e aumaia ai ia te a’u se vaaiga ese ma faia se matafaioi i lo’u tuputupu a’e faaleagaga. Ua ou iloa fo’i o la’u vaaiga e mafai ona faamanuiaina ai isi i le talalelei. E ala i le alofa tunoa o le Faaola, ua mafai ai ona ou taliaina ma le mautinoa o a’u o se afafine o le Atua. E alofagia atoatoa lava a’u. Ma o le Tama Faalelagi ma Iesu Keriso sa, o loo, ma o le a saunia i taimi uma e faamanuia a’u a o ou liliu atu ia i Laua. I taimi uma lava.
O le aveesea o lo’u vae ma le tosina atu i la’u lava itupa na aumaia uma ai ni faigata e lei mafaufauina i lo’u olaga. O nisi taimi ou te le manao e alu ese mai le moega ma le iloa e tatau ona ou faaaogaina lo’u vae faapipii. O le taumafai e tausi poloaiga uma a le Tama Faalelagi e mafai ona faigata i nisi o taimi. E ui e le o se filifiliga a tagata uma o e o loo aafia i le tosina atu i le itupa e tasi, o la’u filifiliga patino o le taula’i atu lea i se soa e faavavau. O nisi taimi e i ai ni o’u mafaufauga lotovaivai e leai se tagata o le a fia faaipoipo ia te a’u ona o o’u tulaga, ae ou te faalagolago i le Tama Faalelagi e galueaiina na faamatalaga ma faamanuia a’u pe afai ou te tausia a’u feagaiga ma Ia.
O le le mautonu i lo’u lumanai e mafai ona faalotovaivaia i nisi taimi. Ou te iloa o nei mafaufauga o le le atoatoa ma le masalosalo e sau mai ia Satani. O le liliu atu ia Keriso, ua ou maua ai le tele o le filemu ma le olioli, ma le malosi ou te manaomia e faatoilalo ai nei mafaufauga.
Ua ou faalagolago nei i le Atua e taitai lo’u olaga. I lenei faagasologa, o loo ou aoao ai foi i le auala e fesootai ai i tamaitai ma alii i ni auala e loloto atu, ma sili ona anoa i totonu o tuaoi ua faatulagaina e le Alii. Sa Ia fesoasoani mai ia te a’u e faateleina lo’u talitonuga faapea o le a i ai se aso o le a mafai ai e Ia ona maua se tagata e mafai ona ou alofa i ai ma faamauina i ai. Ae po o le a lava le mea e tupu, ua ou aoao e faataua po o ai a’u ma talia lo’u olaga ma faalagolago i faamanuiaga ua Ia teuina mo a’u.
O o Tatou Manu’a e Mafai Ona Aumaia i Tatou ia Latalata Atili atu i le Faaola
I lo’u olaga atoa, ua ou iloa ai o tagata uma e feagai ma faigata, lē talafeagai, ma o nisi taimi o aafiaga tiga latou te le malamalama atoatoa i ai. O le a tatou manunua uma i se auala. Ae o lenei ua ou iloa foi o o tatou aafiaga faaletagata lava ia e mafai ona tatou latalata atili atu ai i le Faaola ma fesoasoani ia i tatou ia malamalama i Lona mana e le faatuaoia i o tatou olaga.
Na aoao mai Elder Neil L. Andersen o le Korama a Aposetolo e Toasefululua: “I se taimi o le mafatia tele, na ta’u atu ai e le Alii i le Perofeta o Iosefa, ‘E tuuina atu ia te oe le poto masani ona o nei mea uma lava, ma o le a avea mo ou lelei.’ E mafai faapefea e manu’a tiga ona avea ma ō tatou lelei? I faigata o tofotofoga faalelalolagi, ia aga’i i luma ma le onosai, ma o le a aumaia ia te oe e le mana faamalolo a le Faaola le malamalama, malamalamaaga, filemu, ma le faamoemoe.”1
Mo a’u, o le avea ai ma se tagata ua tipiese le vae ma le tosina atu i tamaitai na amata o ni aafiaga tiga. Ae sa fesoasoani mai ia te a’u ia ou sau ai ia Keriso, ma sa Ia aumaia ia te a’u le filemu. Ua ou malamalama nei e leai se tasi o nei aafiaga e mafua ai ona ou itiiti ifo o se tagata. Pe taofia fo’i a’u mai le mauaina o faamanuiaga uma o le fuafuaga o le faaolataga. Ma e faapena foi o le a le taofia ai a’u mai le mauaina o le fiafia moni lea e sau mai le mulimuli ia Iesu Keriso ma tausia Ana poloaiga i le mea sili ou te mafaia.
Ou te le iloa lava po o le a le mea o le a tupu i lou lumanai po o a isi luitau o le a ou feagai seia ou toe foi atu i le afioaga o lo’u Tama Faalelagi. Ae ou te iloa le mea lenei: Soo se lu’itau po o se manua tatou te feagai ma i tatou—e tusa lava po o le faalemafaufau, faalelagona, faaletino, po o le faaleagaga—e mafai ona faamaloloina pe a tatou liliu atu i le Faaola. E mafai ona Ia fesoasoani ia i tatou ia maua le faamoemoe ma le malosi i a tatou tauiviga i le lalolagi. Ma ua Ia folafola mai o le aso o le Toetu, o le a faamaloloina atoa ai o tatou tino, mafaufau, ma loto (tagai Alema 42; 11:42–44).
Sa manaomia ona ou faamaloloina mai o’u lagona o le maasiasi ma le le atoatoa e tusa ai ma lo’u tosina atu i le itupa e tasi ma mai le taunuuga faaletino ma faalemafaufau o le tipieseina o lou vae. Ma ua ou oo i le mana faamalolo o Keriso ma faaauau pea i aso uma a o ou filifilia o Ia. Ua Ia fesoasoani mai ia te a’u e alofa ia te a’u lava ia ma maua le faamalieina i le ola ai i Lana talalelei. Afai e te filifili e mulimuli ia te Ia ma tuu lou olaga i aao o le Atua, o le a e iloaina le faaleleia atili ia te oe lava, taitaiga i mea uma, alofa, ma le filemu moni (tagai Alema 42:13).