Faatasi pe Eseese

Atonu o e mafaufau, “O le tusiga lenei o le mea tonu lava lea ou te manaomia!” po o le “O le mea tonu lava lea e manaomia e lou toalua!” Atonu o le a e momoo mo se lisi o fautuaga taua o auala e taulima ai le olaga o ni matua ua gaogao le faamoega. Ae o le mea moni lenei ua ou iloaina i le aluga o tausaga o fautuaina ulugalii: mo le tele o vaega, o se lisi o mea fatufatuai e fai po o ni auala e fesootai ai i le tasi ma le isi e seasea lava ona aoga mo se taimi umi—sei vagana ai o loo i ai se sootaga faalelagona faatuatuaina.

Pe o tatou nonofo i Ulaanbaatar, Monokolia, po o Sao Paulo, Pasila, o i tatou uma o atalii ma afafine o le Atua. O i tatou o tagata ma e i ai lagona. Atonu e eseese lo tatou faailoaina atu o lagona e faavae lea i a tatou aganuu ma auala na tausi ae ai i tatou, ae e i ai ia i tatou uma lava—tuuatoatasi, teenaina, fefe, faanoanoa, fiafia, ma le olioli. E oʻo foi i aganuu ia e nonofo ai aiga i fale e toatele augatupulaga e nonofo ai, a o tutupu aʻe fanau ua matutua, e masani lava ona nonofo valavala o latou matua.

O ulugalii ua gaogao faamoega e masani ona fai mai ia te au, “Ua le toe i ai se mea e tau fai anaina e i maua.” Ma afai e pau le mea o lo latou vaavaai i ai o le mea e fiafia lesi tagata e fai, e faasaga i le mea e manao le isi tagata e fai, e masani ona sao lena mea. A aunoa ma se sootaga faalelagona, e mafai ona tatou i ai i le potu e tasi ma o tatou taitoalua ae lagonaina pea le tuuatoatasi.

O le a la se mea e mafai ona fai e se ulugalii ina ia faasasaga faatasi ai ae le o le faasasaga eseese? Sei o tatou amata i le talanoaina o siosiomaga.

Tatou te o mai mai siosiomaga eseese. E i ai o tatou aafiaga ma matua, uso ma tuagane, aiga lautele, uo, ma paaga e mamanu ma fau ai mea tatou te faia ma faamoemoe i ai i faaipoipoga. Mo se faʻataʻitaʻiga, i le vaitaimi o lo tatou tuputupu aʻe, pe sa latalata mai pe na mamao faalelagona i latou na tausia i tatou? E tusa ai ma o tatou siosiomaga, e mafai ona tatou faia ni fesili taua se lua:

• O le a le latalata tatou te naunau e fesootai faalelagona ai ma o tatou taitoalua?

• Pe o tatou naunau ea e aumai o tatou taitoalua i totonu o o tatou avanoa faalelagona?

A tatou taulaʻi atu i amioga a o tatou taitoʻalua ae le o le vaʻaia o le talafaʻasolopito pe aisea na atiaʻeina ai lena amioga, o le a masani ona tatou faaosofia le le fetuutuunai ae taofiofi ese le agavaivai. O le i ai o le malamalama loloto ma le agaalofa mo taimi faigata na feagai ma o tatou taitoʻalua i taimi o tuputupu aʻe o le a masani ona totoina ai se manaʻo ia faateleina le lagolagosua. O le agaalofa, agavaivai, ma le agamalu e maua ai le eleele lelei e fefaʻasoaaʻi ai lagona. O le aoao e talanoa e uiga i o tatou lagona ma o tatou taitoalua o se auala lea e maua ai le saogalemu ma le sootaga faalelagona.

Sa fautua mai Peresitene Russell M. Nelson, “Ia lelei laufesootaiga ma lou toalua. … E manaomia e ulugalii se taimi nao i laua e matau, e talanoa, ma faalogo moni ai le tasi i le isi.”¹

E ui i le tele o tausaga o faaipoipo, ae o le faasoaina atu o ni faafitauli maaleale e mafai ona faigata. Ae o nisi nei o laasaga ina ia faigofie ai ona fai:

1. Faaigoa ou lagona. Tuu i ai ni igoa, e pei o le “leai se faamoemoe,” “faanaunauga,” po o le “naunau.”

2. Ia lagonaina. Faifai lemu. Fesili, “O fea ma o le a le taimi ou te matauina ai le lagona?”

3. Faailoa atu. E i ai faamoemoega o lagona. Aua e te faamaina oe lava ia po o lou toalua mo le i ai o lagona. Ae ia saili le fesoasoani ma le taitaiga a le Tama Faalelagi.

4. Faasoa atu. Pe a e faasoa atu ou lagona i lou toalua, e tele lava ina lua atili vavalalata ai. I Autu o le Talalelei tatou te faitau ai, “E mafai e ulugalii ona faamalosia a latou faaipoipoga a o latou faaalu le taimi e talanoa faatasi ai ma ia faalogo le tasi i le isi, ia magafagafa ma faaaloalo, ma ia faaali atu e le aunoa lagona faapelepele ma le alofa.”²

O taitoalua o soo se matutua e faamalolosia a latou sootaga a o latou aoao e faailoa, iloa, malamalama, ma talanoa faatasi e uiga i o latou lagona. Atonu e fesoasoani le faaaoga o mataupu faavae musuia e lua: (1) “O le tane ma le ava ua i ai se tiutetauave paia e alofa ma tausi e le tasi le isi,” ma le (2) o le tane ma le ava, e tatau ona “fesoasoani le tasi i le isi o se paaga tutusa.”³

Ata

elderly couple holding hands

O se tagata suesue lauiloa i faaipoipoga, o Dr. John Gottman, ua taua o le ute o se faaipoipoga lelei o le tomai lea e soalaupule ma galulue i ni autu ma lagona faigata. Sa ia atiina ae se faataitaiga na ia taua o se “amataga agamalu.” O le toʻalua o loʻo i ai le faafitauli e faʻatulagaina se auivi e soalaupule ai le atugaluga nai lo le faitioina o le toalua. E fa vaega:

1. Faailoa atu ou lagona. Taulai atu i mea o loo e lagonaina nai lo o mea o loo faia pe fai mai ai le isi tagata. Mo se faataitaiga: “O loo ou popole, atuatuvale, fefe, pe matau.” Faailoa atu ou lagona i faaupuga “Ou”, e pei o le, “Ou te lagona …”

2. Talanoa e uiga i se tulaga faapitoa se tasi po o se mea na tupu. Taumafai ina ia manino ma ia fitoitonu. Aloese mai le iloiloina po o le faamasinoina o lou toalua. Ia aofia ai mea ua e oo i ai ona o le mea na tupu ma ou lagona e faatatau i ai.

3. Tau se manaoga lelei. Faamatala po o le a le mea e taua ia te oe i le mafutaga. Fai atu i lou toalua e fai ni laasaga lelei e faafetauia ai ou manaoga. Ia faaaloalo i lau talosaga. “Faamolemole” po o le “Ou te talisapaia” e umi lona aoga.

4. Faaali atu le agaga faafetai. Faamalo atu i lou toalua i mea na o loo aoga mo oe.

O le toatele o i tatou a le o loo matuai loloto le lotofaafetai pe o loo loloto le faanaunau mo le fesootaiga faalelagona ma o tatou taitoalua. E pei ona fai mai le mau, “Ae ui lava ina faapea, e leai se tane pe a le o i ai le fafine, e leai foi se fafine pe a le o i ai le tane, i le Alii” (1 Korinito 11:11). Afai tatou te aapa atu i o tatou taitoalua o manaomia le fesoasoani ma, po o le a lava le mafuaaga, e le o avanoa o tatou taitoalua pe le o mafai ona faamafanafana i tatou, e i ai se avanoa maualuga ua tatou aafia i le mea ua taua e Dr. Sue Johnson o se manua taufesootaiga. O nei manua e faaosofia ai ni tali le lelei ia e oo mai i ni ituaiga eseese:

• Osofaia.Tatou te osofai atu ma faitio i o tatou toalua i le le i ai iina, ma ni faamatalaga le faavaea e pei o le, “E te lei i ai lava iina mo au. O le mea ou te manaomia e le afaina ia te oe.”

• Faamalieina. Tatou te ioe i le manatu a o tatou taitoalua, ma le faamoemoe o le a le faaauaua pe faateteleina le talanoaga, ae e leai se mea na foia, ma o le taunuuga e masani lava o le faateleina o le inoino.

• Punipuni. Tatou te tuuina atu faamaoniga, e pei o se loia i se potu faamasino, i le mafuaaga e tauamiotonuina ai i tatou i a tatou tali atu i tulaga o loo i ai nei.

• Aluese. Tatou te o ese mai ma leleoa . E tausia lo tatou mamao ma tau lava o le talanoa e uiga i mea e manaomia mo le olaga i aso uma, e aunoa ma se fesootaiga anoa.

• Tuliloaina. Tatou te manaomia se sootaga matua tele naua o lea e faaauau ai ona tuuina atu ni fesili, manaomia ni tali, fai atu mo ni tautinoga, ma taumafai e tumau i le puleaina o le lisi o mataupu—ae le mo le tulaga o le sootaga, ae ia faamalie ai o tatou lagona faamanualia.

O nei uiga e le masani ai pe a tatou lagonaina e pei ua leiloa lo tatou sootaga ma lē tatou te alolofa i ai. Ae e matautia aua e mafai ona latou faatupuina se taamilosaga le lelei. Muamua, o le manua taufesootaiga; lona lua, o le tali le lelei; ona fai atu lea o se tali le lelei i le tali muamua; ma taamilo ai faapena. I lenei auala, e saofaga toalua taitoatasi i le taamilosaga ma afaina ai foi.

Ata

couple in Hong Kong

Ioe, o le sootaga vavalalata o se vaega taua o le faaipoipoga. O le mea moni, atonu e faapea mai o le sootaga vavalalata o se vaega felefele o le faaipoipoga. O le lagonaina o le latalata atu i le tasi ma le isi, o le fesootai faaletino moi, ma le lagonaina o se sootaga malosi faalelagona e fesootai uma lava.

O le sootaga vavalalata faalelagona e faafailele ai le fesootaiga ma le vavalalata lea e faalolotoina ai ma faatamaoaigaina ai sootaga feusuai. O se luitau mo se toalua e maualalo le manao i feusuaiga ina ia auai i feusuaiga pe afai e itiiti pe leai foi ni ona sootaga faalelagona. I lenei tulaga, o sootaga faalelagona masani ma le anoa e fatuina ai se sulufaiga o le saogalemu mo feusuaiga.

A o tatou matutua, e mafai ona sili atu ona faigata ia sootaga feusuai. I nisi o tulaga, e mafai e se fomai atamai po o se fofo faamaoniaina ona tuuina atu ni malamalamaaga loloto ma se fesoasoani. Ae ou te talitonu e mafai ona taua tele i le faatumauina o fesootaiga faaletino e ala i mea faatauvaa e pei o le sogi o le tasi i le isi e faamanuia ai le po, uulima e le aunoa, pe tuuina atu e le tasi i le isi o se opo po o se oomi agaalofa.

Ata

two birds sitting in a nest

Ata na tusia e Carolyn Vibbert

O lenei, afai o loo e faananau atu pea mo lena lisi o mea fatufatuai e fai po o auala e toe fesootai ai le tasi i le isi i taimi o ou tausaga o le faamoega gaogao, o le tala fiafia lenei: a o faatumauina oulua i lagona o le fesootai faalelagona pe toe fesootai faalelagona, o le a matua faigofie lava ona fatu se lisi e mafai ona lua saofaga uma i ai. O le a fai ma au lisi, ma talu ai na e fatufatuina, atonu o le a sili atu ona e faia. O ulugalii e fausia ni sootaga malolosi atu ma e masani lava ona galulue vavalalata ma e mafai ona maua ni tali mo a latou faaipoipoga e tusa lava po o a o latou siosiomaga, mea e faapasi ai le taimi, mea e fiafia i ai, po o gaoioiga.