O Auala e Fa e Faaleleia ai Fonotaga Faaleaiga
E mafai faapefea ona outou galulue faatasi o se aiga e foia faafitauli ma maua ai le lotogatasi sili atu?
Ata na tusia e David Green
E tele mea e tutupu i aiga. E mamai tamaiti. E manaomia ona faia lipea. Galuega, gaoioiga, ma le lotu e tauva uma mo lou taimi. E mafai ona lofituina!
E faapefea la ona e aumaia lou aiga ia latalata atu i mea o loo tutupu?
O le mea e faafetai ai, ua tuuina mai e le Tama Faalelagi ia i tatou se mamanu mo le olaga faaleaiga ma fesootaiga e taʻua o fonotaga faaleaiga. O auala nei e fa e mafai ai ona aoga mo lou aiga.
1. O Fonotaga O Talanoaga, Ae Le O Aoaoga
Sa aoao mai e Peresitene M. Russell Ballard, Sui Peresitene o le Korama a Aposetolo e Toasefululua e faapea: “E manaʻomia tele fonotaga a aiga. O le mea moni e faavavau. Sa tatou auai i se fonotaga faaleaiga i le muai olaga, a o tatou nonofo faatasi ai ma o tatou matua faalelagi o ni fanau agaga.”1
O a tatou fonotaga faaleaiga o loo faataitai i lenei fonotaga faalelagi. E fefautuaai faatasi tina ma tama ma a latou fanau. E mafai e tagata nofofua matutua ona talanoa ma aiga ma uo faatuatuaina. O le fefautuaai o se seti o mataupu faavae ia o le a aumaia ai le tele o le mana e foia ai faafitauli i totonu o lou aiga. Atonu tou te mafaufau, “O le a faapefea ona ou faia lena mea ma la’u fanau? Latou te le fiafia tele e faalogo i mea ou te fai atu ai.”
Afai e te faia se fonotaga faaleaiga e pei o se aoaoga, o le a e misia lona faamoemoega atoa. Ae o se siosiomaga fiafia e mafai ona fatuina pe a lagona e tagata uma e pei i latou o se vaega o le vaifofo.
2. E Fatuai e Fonotaga Sootaga
O le fesootai soo i fonotaga o le a fesoasoani ia te oe e iloa ai mea o loo tutupu i tagata taitoatasi o le aiga. E tatau ona aafia tagata uma i le fesoasoani e fatu ni fofo mataala ma i le setiina o a latou lava sini. A o galulue faatasi atu aiga i le faia o faaiuga, o le a uluola tagata taitoatasi, ma o le a sili atu le lotogatasi o le aiga o se vaega atoa.
O nisi fonotaga e mafai ona fuafuaina, ae o isi e mafai ona tupu e aunoa ma le fuafuaina. Filifili po o le a le mea e sili ona lelei mo lou aiga.
3. E Mafai Ona E Patipatia ma Galulue Faatasi
O fonotaga faaleaiga e le mo na o le foiaina o faafitauli ogaoga. Ae faapefea pe afai e lei leva ona maua e lau ava se siitaga i le galuega? E mafai ona e patipatia lana ausiaina o lena tulaga i le galuega i le isi tou fonotaga faaleaiga e sosoo ai. Atonu o loo atiina ae e lou aiga se mausa o le faaalia o le loto faafetai. Tuu atu i tagata uma e auauai i le faailoaina mai o se mea latou te loto faafetai ai.
Fai ni fonotaga faaleaiga i se mea e tulimatai atu i ai tagata uma. Afai e iloa e tagata taitasi o le aiga, e oo i le aupito laitiiti, o le a lagonaina ma faatauaina i latou, o le a latou fiafia e auai.
4. O le Faaitiitia o le Wi-Fi o Lona Uiga Ua Faateleina le Taimi mo Oe ma A’u
Fuafua e tuu ese e tagata uma a latou masini omiomi i le taimi o fonotaga. Pe a e talanoa faafesagai ma fanau e aunoa ma ni mea faalavefau, o le a latou lagona le faatauaina. O le tatalo faatasi ma le tasi ma le isi, o le a valaaulia ai le Agaga i totonu o lou aiga. E leai se tasi e manaomia ona foia na o ia faafitauli. O loo e faia le faataitaiga e saili ai le fesoasoani a le Atua pe a oo mai mea faigata.
Afai ua uma ona e faia ni fonotaga faaleaiga, mafaufau i ni auala e faaleleia ai. Afai tou te le o faia, o le aso atonu o le aso sili lea ona lelei e taumafai ai. Amata laitiiti, ma matamata a o atiina ae fonotaga faaleaiga i se taimi fiafia lea e aoao ai tagata o le aiga mai le lagolago atu i le tasi ma le isi.