O Fea Sa i ai La’u Vavega Vave?

Ata

woman sitting on a bench under a tree

Sa ou tatalo mo se vavega mo le tele o masina.

Ia Setema o le 2019, sa ou alu ai mo se taotoga o se ponaivi ava [sinus] i o’u foliga, ma sa i ai se faafitauli sa lei faamoemoeina lea na mafua ai ona leiloa se mea i le isi o’u mata. Sa faia so’u taotoga faatopetope e taumafai e faalelei ai le mata na faaleagaina, ma sa mautinoa e la’u fomai tipitipi o le a lelei atoatoa i totonu o le tolu masina. Sa ou mauaina foi ni faamanuiaga o le perisitua lea, ma o taimi uma, sa folafola mai ai ia te au se faamalologa atoatoa.

Peitai na sau ma o ese atu na masina e tolu, ae na leai se mea na suia.

Sa folafola mai ia te au le faamalologa. I ni taimi se tele. Ae sa i ai aso o [ou] taotoga sa lei taunuu ma isi mea faalavefau ma faanoanoaga, ma e le o taitai lava manuia lo’u mata.

O lenei aafiaga ua aumaia ai ia te au ni masina o tauiviga faalemafaufau, faalelagona, faaleagaga, ma le faaletino. Ae o taimi uma lava e fai ai se isi ou faamanuiaga, na folafola mai lava o le a faamaloloina au.

O lenei mea na ou mafaufau ai. O le a le mea tatou te faia pe a tatou faatalitali mo vavega ia e foliga mai e le o oo mai ma pe a o foliga mai o loo filemu le lagi? E mafai faapefea ona tatou agai i luma pe a o tatou paulia i totonu o se tasi o na mea e tau’ai mai e le olaga ia i tatou?

Ua fai si umi o ou mafaufau i lenei fesili, i le taumafai ai e malamalama i lo’u tulaga. Sa ou mafaufau foi i vavega uma na ou faitau i ai i tusitusiga paia.

Sa ou suesue i taimi uma na faatino ai e Iesu se vavega pe faamaloloina foi se tasi i le taimi o Lana auaunaga. Ma, o lau tala faamaoni, o le taimi muamua sa ou le fiafia, aua o taimi taitasi uma e aumai ai se tagata ia Keriso, na vave ona Ia faamaloloina i latou.

• O le fafine na maua i le puna toto na pai atu i Ona ofu talaloa, ma na faamaloloina o ia i le taimi lava lea. (Tagai Mareko 5.)

• O le tagata na fanau mai e tauaso na talosaga mo le faamalologa, o lea na tau atu i ai e Keriso e mulumulu i le vai o Seloa. Ma o le taimi lava na ia faia ai, na faamaloloina ai o ia. (Tagai Ioane 9.)

• Sa saili le lepela ina ia faamaloloina, ma—i se taimi vave—sa matua faamamaina atoa o ia. (Tagai Mataio 8.)

• O le afafine o Iairo o lē na maliu, na fetalai atu i ai le Faaola e toetu mai le oti, ma na toe tu o ia. I le taimi lava lena! (Tagai Mareko 5.)

• O le tagata ua ulufiaina ua vave ona faasaoloto ina ua valaau atu Keriso ia te ia. (Tagai Luka 4.)

Sa leʻi fetaui lenei mea ia te aʻu. O nei vavega uma sa tutupu i le taimi lava lena, ae aisea la o loo ou faatali ai pea mo la’u vavega? Sa foliga mai sa matuai le talafetaui tele.

Ae ina ua mavae ni mafaufauga loloto, sa taia au i le mea moni: e ui lava o nei vavega uma sa tutupu i le taimi lava lea, ae o i latou sa faamaloloina na feagai ma o latou faigata ma mafatiaga mo se taimi umi lava.

• O le fafine sa i ai le faafitauli o le puna toto e 12 tausaga o pagatia ai, ma sa faaalu uma ana punaoa faalelagona ma faaletupe a o lei oo atu lana vavega.

• Sa lei iloa e le tagata tauaso se mea ae na o le tauaso mo lona olaga atoa a o lei faamanuiaina o ia.

• Sa mafatia le lepela i le amataga taufaamatau o le lepela ma le tiga o le faamai, ola e pei o se tagata faaesea e leiloa e se isi po o le a le umi ona faatoa faamaloloina ai lea o ia.

• Na mafatia le afafine o Iairo ma oo lava ina maliu ai a o lei oo mai lana vavega.

• O le tamaloa lea na ulufia i agaga leaga sa saisaitia e agaga leaga mo se taimi a o lei i ai se avanoa mo le saolotoga.

O lenei mea na faaali mai ai ia te au, o nisi taimi e le oo mai vavega i le taimi faatoa amata ai mafatiaga. Sa tofu tagata taitoatasi ma se malaga ma o latou tiga ma faigata a o lei faamaloloina i latou. Ma e ui o nisi malaga e umi atu nai lo isi, ae o vavega o le faamalologa e oo mai lava .

Maimau pe ana ou iloa le umi o lau malaga ma lenei tofotofoga, ae atonu o le le iloa o le aano tonu lea. O luitau e aumaia ai avanoa. E mafai ona tatou filifili e faataga o tatou luitau e mamanu ma galueaina i tatou i le ituaiga tagata sili o i tatou lava. E mafai ona tatou faaaogaina le taimi lenei o le faatalitali e faalatalata atili atu ai i le Atua o lē na faia i tatou. E mafai ona tatou fesootai ma malamalama i isi i o latou mafatiaga.

Tatou te maua i taimi uma se avanoa mo le lelei, tuputupu ae, ma le atinaega ao tatou faatalitali i se vavega.

Ou te taofimau pea i le faamoemoe ma le faatuatua e faapea, o le a oo mai lau vavega o le faamalologa ma e i ai se aso o le a faataunuuina ai folafolaga na ou mauaina. Ae i le taimi nei, e mafai ona ou i ai i lau malaga faatasi ma lenei tiga. E mafai ona ou faaaogaina lenei taimi faatalitali ina ia sili atu le lelei, atamai, malosi atu, agalelei tele, onosai atili, ma sili atu le lotomaualalo. E mafai ona faalolotoina lou sootaga ma le Tama Faalelagi ma lou Faaola, o Iesu Keriso.

Po o le a lava se vavega po o se folafolaga atonu o loo e faatalitali i ai i le taimi nei, e tusa lava po o le a le umi o e faatalitali i ai, ia aua le aveesea ai le faamoemoe. Soo se mea lava ua folafola atu e le Tama Faalelagi ia te oe, o le a oo mai. Ae e oo mai vavega i Lana taimi ae le o o tatou lava taimi. Aua nei aveesea lo tatou faamoemoe ia te Ia. Aua le manatu ua sāō le lagi. O loo Ia saunia le ala mo oe. Taulai atu i le taimi nei ma fai le mea e mafai ona e faia e agai ai i luma i le aso i lau malaga. Tasi le La’a i le Taimi. Ia pipiimau pea i le faamoemoe a o e faatalitali mo lau vavega.

O le a oo mai.