O se Taimi Patino ma le Faaola
O se aafiaga lenei e faatasi i le olaga ona tupu—pe o lena ea?
Pito i lalo: atapue mai faaaloaloga a le tusitala
Sa [lagona] le feei o siuleo i laau a o taufetuli tagata e aloese mai papa liusuavai ma le toulu o ala. Sa ou tu i le pito i tua ma faalogologo i le musika o le ata o loo patu’i mai i sipika i le isi itu o le mapuepue.
I lena taumafanafana, sa ou auai ai i le Talafaatino o le Mauga o Kumora, lea na faaalia ai nisi o mea na tutupu mai le Tusi a Mamona. Sa avea au ma se tagata siva o le seleselega (tagai 1 Nifae 18:23–24) ma se tagata le talitonu (tagai i le 3 Nifae 1:4–21), ae o tagata uma, e aofia ai le aufaigaluega, sa o se vaega o le vaaiga o le a sosoo ai.
Na susulu atu se moli pupula malosi i se tagata na laei papae, e foliga mai ua opeopea i luga ae o le fogafale sili ona maualuga o le tulaga. Ioe, sa le o ia moni o le Faaola—sa na o se volenitia e aoga i le kolisi e pei o au. Ae i lena taimi i luga o le tulaga, sa ou vaai faalemafaufau ai i le Faaola moni o tu mai ai iina.
Sa ou vaai faalemafaufau ia te Ia o savali mai ia te au, ma sa ou vaai faalemafaufau i lou tilotilo atu i Ona fofoga. Na lofia au i lagona mai le Agaga. I lena taimi, sa ou tofo ai i le ono faapei o le vaai atu i lou Faaola moni. Ou te faatauaina lenei aafiaga faaleagaga tulaga ese.
I le ono masina mulimuli ane, sa suia ai lau vaaiga e se saunoaga mai ia Epikopo W. Christopher Waddell, sa avea i lena taimi ma Fesoasoani Lua i le Au Epikopo Pulefaamalumalu: “O Aso Sa taitasi e mafai ona tatou maua ai se aafiaga talitutusa ma le mea na faasoa mai e tagata na sao mai faatafunaga ogaoga ia na tutupu i le taimi o le faasatauroga o le Faaola, e pei ona faamatalaina i le Tusi a Mamona.”1
Na faateia au. Pe e mafai ona ou lagonaina, i vaiaso uma, le lagona lava lea e tasi sa ou lagonaina i luga o le tulaga i lena po? O le tele lava o lou mafaufau i ai, o le tele foi lea o lou iloaina o le ai ma inu i le faamanatuga o se aafiaga patino lea faatasi ma le Faaola e pei uma lava o le tootuli i Ona luma ma tagotago i tulaga o fao i Ona lima ma vae.
E le tau manaomia ona tatou i ai i se talafaatino ia iloa ai le alofa ma le malamalama o le Faaola pe, ia vaai faalemafaufau ai i se taimi patino faatasi ma Ia. E i ai a tatou avanoa i vaiaso uma. O Aso Sa taitasi, e faatalitali ai o Ia e faaali mai ia i tatou Lona alofa ma le malamalama. Tau lava o le tatou o mai ia te Ia.