Pe Faapefea ona Faamalolo mai Soo se Tauiviga—Tasi le Laa i le Taimi

O le mea muamua lava e tatau ona tatou iloaina pe a agai atu i le faamalologa o le, o se malaga lea o le tuputupu ae. O nisi nei o upumoni e uiga i lenei malaga e mafaufau i ai:

• A o tatou aapa atu i le Faaola i lenei malaga atoa, e mafai ona Ia taitai atu i tatou i punaoa ma le fesoasoani tatou te manaomia ma aumaia ia i tatou le malosi ma le taitaiga i a tatou taumafaiga. “A silafia e le Faaola o loo e manao moni lava e aapa atu ia te Ia—pe a Ia lagonaina o le manao silisili o lou loto o le fia mauaina o Lona mana i lou olaga—o le a taitaia oe e le Agaga Paia ia iloa tonu le mea e tatau ona e faia.”¹

• O le tuputupu ae e le ausiaina i se aso e tasi, se masina, pe oo lava i ni tausaga i nisi o taimi. O le faasologa o taimi o le faamalologa o le a eseese mo tagata uma.

• Pe o e taumafai e faamalolo mai mausa e le manaomia, vaisu, faafitauli o le soifua maloloina faalemafaufau, po o se mafatiaga foi, ia manatua o le faamalologa e masani ona aofia ai le suia o mausa ua loa ma mauaa i le ala tatou te mafaufau ma tali atu ai. Ma o lenei mea e alu ai le taimi.

• E masani ona tatou aoao ia iloa faafitauli autu e pei o mamanu o ni manatu le lelei ma ni lagona faigata ae tatou te lei mafai ona galulue e faatoilalo o tatou faafitauli.

• O le faagasologa o le faamalologa e tumu i aafiaga lelei ma leaga.

Afai e te lagona le lotovaivai, ia iloa e le nao oe—O Nifae foi ia sa tauivi i nisi o taimi ma gauai atu ai i ona vaivaiga (tagai i le 2 Nifae 4). Ina ua maliu lona tama, sa tusia e lenei perofeta faatasi ma se faatuatua e le maluelue e uiga i lona le fiafia sa i ai, o lea sa a tauivi ai ma le faanoanoa ma le faavauvau ma faaosoosoga. Ae na iu lava ina molimau mai Nifae o le a ia taumafai pea ma faalagolago i le Alii ona sa ia iloa o le a fesoasoani o Ia ia te ia i le foiaina o ona tauiviga i le iuga.

E masani ona tatou le faamoemoeina faapea o le ala i le faamalologa mai aafiaga faigata e mafai ona tumu i mea faalavefau, mea sese, lotovaivai, le onosai, ma faafitauli. Atonu o le a le o se ala faigofie e lelei atoatoa ma leai se taumafaiga e manaomia ai i le taimi muamua tatou te taumafai ai. Ma e le afaina lea. Aua o na mea faalavefau o mea na e fesoasoani tatou te faalagolago atili ai i lo tatou Faaola.

E le o faamoemoe mai le Alii ia tatou manumalo i mea uma i le taimi nei. Ae ua Ia faamoemoe tatou te taumafai ma ia i ai le manao e faamaloloina, aua o manaoga moni o o tatou loto, o mea na e faia le eseesega uma i le ausiaina o a tatou sini ma le avea ai ma tagata tatou te mananao ia avea ai. E galue le Alii i manaoga i o tatou loto. Ma e pei ona aoao mai Peresitene Russell M. Nelson, “E fiafia le Alii i le taumafaiga, aua e aumai e taumafaiga taui ia e le mafai ona oo mai e aunoa ma lena.”²

O lea la, afai o loo e tauivi pea ma gauai atu i faaosoosoga, afai o loo e oo lava i le pogisa o luitau o le soifua maloloina faalemafaufau, pe o lē mafai ona e moe i po ona o manuaga ua mavae, tau lava o le taumafai. Tuu i ai le taumafaiga, galue mo le faapalepale, ma taofimau i le faatuatua ma le faamoemoe ia Iesu Keriso.

A o faaauau pea ona e taumafai, o le a faataunuuina lava manaoga amiotonu o lou loto, ma o le a e maua vavega o le faamalologa (tagai Mosaea 2:41).

O se mea masani lo tatou oo i tauiviga e ala i vaega eseese o le faagasologa o le faamalologa. Ae o le agalelei ma le onosai ia i tatou lava e tutusa lava le taua ma le faia o galuega mo le faamalologa. O le ita ia te oe lava e leʻi fesoasoani lava i se tasi ia manuia. Po o le a lava le vaega o le faamalologa o loo e i ai, ia e agalelei ia te oe lava ma manatua o le a i ai pea le agaalofa o le Faaola mo oe. O nai manatu nei e faataitai ai le alofa ia te oe lava:

• Faamanatu ia te oe lava le taimi e tupu ai le faamalologa ma le tele o taumafaiga e manaomia ai mai ia te oe.

• Ia e iloa o le tele o faafitauli e aliaʻe mai i manaʻoga e leʻi ausia po o auala e taulima [ai faafitauli] na e aʻoaʻoina aʻo e tamaitiiti ma e faigata ona suia.

• Ia iloa e tusa lava pe o loo i ai ni ou faafitauli, o loo e suia pea. Ia manatua o manaoga o lou loto o le a fesoasoani ia te oe e fai ai suiga tumau.

• Taulai atu i lou alualu i luma. Vaai i le mamao ua e oo mai ai. (Afai e te lei mauaina, saili se auala e siaki ai lou alualu i luma.)

• Taulima oe lava e pei o le a e faia ai se tasi e te alofa i ai o loʻo taumafai ia malolo.

• Mafaufau i mea ua e aoaoina ma pe na faapefea ona fesoasoani au tauiviga ia te oe e tuputupu ae ai faaleagaga. O loo i ai i le Tama Faalelagi se auala e liliu ai o tatou luitau faigata i ni aafiaga mo lo tatou lelei (tagai Mataupu Faavae ma Feagaiga 122:7).

• Faasoa atu au tauiviga i se tasi o le a lagolagoina ma alofa ia te oe i lau malaga i le faamalologa. Ae ia mautinoa e tausisia tuaoi ma fai atu ia i latou ia faaaloalo i lou tulaga e le faalauaiteleina.

O loo i ai pea iina le Tama Faalelagi ma Iesu Keriso e fesoasoani ma taiala i tatou e ala i lo tatou faagasologa o le faamalologa. Ua latou tuuina mai le anoanoai o meafaigaluega faaleagaga e pei o le tatalo, anapogi, tusitusiga paia, ma le auai soo i le lotu ma le malumalu lea e mafai ona i ai se aafiaga mamana i lo tatou ala i le faamalologa.

Ua tuuina mai foi e le Tama Faalelagi ia i tatou ni punaoa i fafo atu o meafaigaluega faaleagaga ina ia fesoasoani ia i tatou ina ia faamaloloina, ma e finagalo o Ia ia tatou faaaogaina. Mo se faataitaiga, na saunoa Elder Kyle S. McKay o le Fitugafulu e uiga i se tamaitai sa i ai se vaisu o fualaau faasaina. Ma e ui ina sa ia mauaina le “agalelei vave o le Atua,” i lona taimi pito sili ona maualalo ae sa ia manaʻomia lava foi le fesoasoani mai isi. Sa faamalamalama mai e Elder McKay, “O le faamalologa ma iu ai i le laveaiina, sa umi se taimi na alu ai—o masina o togafitiga, aoaoga faamasani, ma fautuaga, lea na lagolagoina ai o ia ma o nisi taimi na tauaveina e Lona agalelei.”³

O lo tatou faamalologa o le a manaomia ai taumafaiga ma meafaigaluega. O fomai, fualaau, o tagata faigaluega o le soifua maloloina o le mafaufau, ma vaega fesoasoani o punaoa maoae ia e fesoasoani ia tatou malolo. Na fautua mai Elder Jeffrey R. Holland o le Korama a Aposetolo e Toasefululua: “Saili le fautuaga a tagata o faaaloalogia i aoaoga faamaoniaina, tomai faalegaluega, ma tulaga faatauaina lelei. … Ua faamoemoeina i tatou e lo tatou Tama i le Lagi ia faaaoga ia meaalofa ofoofogia uma ua Ia tuuina mai i lenei tisipenisione mamalu.”⁴

O le mea atoa lava, po o fea lava o tatou i ai i o tatou ala i le faamalologa, ia iloa e mafai ona faamaloloina i tatou uma ona o lo tatou Faaola, o Iesu Keriso, ma Lana Togiola.

O nisi taimi tatou te talanoa ai e uiga i le Togiola a Iesu Keriso e aunoa ma le iloaina moni o le auala e maua ai Lana pulupasama faamalolo, ae o le faagasologa o le faia o lena mea e matuai faigofie lava—ma patino (tagai i le 1 Nifae 15:14). A o tatou faaaogaina ia meafaigaluega faaleagaga ua tuuina mai ia i tatou—e pei o le tatalo, anapogi, ma le auai soo i le lotu ma le malumalu—e mafai ona tatou fesootai ma le Faaola i se ala e tasi. O le vaavaai atu mo Lana uunaiga i o tatou olaga i aso taitasi e mafai foi ona fesoasoani tatou te iloa ai o loo faatasi o Ia ma i tatou.

Ia manatua e oo mai le faamalologa i ni vaega a o tatou agai atu i le Faaola, e ui e taua foi le iloaina o nisi o o tatou tiga ma faigata loloto, atonu e le faamaloloina atoatoa i lenei olaga. Ae o Lona alofa tunoa e mafai ona tauave ma lagolagoina i tatou, suia la tatou vaai, pe tuu mai ia i tatou le malosi e faaauau ai pea ma maua ai le olioli moni.

Seia oo i lena taimi, ia tatou teuina i o tatou loto le folafolaga a Elder Ulisses Soares o le Korama a Aposetolo e Toasefululua: “Ou te molimau atu, a faaauau ona tatou taumafai e foia o tatou luitau, o le a faamanuia i tatou e le Atua i meaalofa o le faatuatua ina ia faamaloloina ma le faia o vavega. O le a Ia faia mo i tatou mea e le mafai ona tatou faia mo i tatou lava.”⁵

E i ai se aso, “o le a toefuataiina mai ai mea uma” (Alema 11:44), ma o le a mafai ona tatou tautino atu, “ua faamaloloina atoatoa au.”

Ma o se aso ina a matagofie o le a i ai lena aso.