O le Auala Na I Ai ia Emily Richards “Se Mea e Fai Atu Ai”

Ata

article on Emily Richards

Na laa atu Emily Richards i le pulelaa vaapiapi i le fono a le National Woman Suffrage Association i le laumua o le I.S. o Uosigitone, D.C. Sa ia iloaina o se tasi lenei o aafiaga sili ona taua i lona olaga. O le tausaga 1889, ma o autu e pei o le palota a tamaitai i Iuta ma autaunonofo sa matua finauina. E ui lava sa popole Emily, sa ia lagonaina le saunia e tautala atu e fai ma sui o lona aiga, itupa, ma le lotu.

Sa taua e se tasi o tagata, “Sa o se mea na matatau ai le faapea, o le tamaitai mai Iuta o le a le mafai ona logonaina o ia i le faletele atoa—o isi failauga na toilalo i lena tulaga—ae i le maofa ai ma le fiafia o le lautele, o lona leo manino na mafai ona oo atu i itu taumamao uma o le fale, ma o lana tautalaga sa o se manumalo moni lea.”¹

E ui lava e leai se faamaumauga o mea saunoa i ai Emily i lena aso, ae na lipotia e se tasi o tusitala, na tusa ma le afa itula o saunoa o ia. Sa ia tuuina atu “se aoaoga faatulagaina lelei ma le atamai” na faailoa atu ai mea moni ma manatu na faapea ona “aveesea ai le faailoga tagata.” Sa faaauau le tala a le tusitala e faapea, o upu a Emily sa i ai se “agaga agamalu” lea na faamaluluina ai loto o le toatele o tagata i lena aso e faatatau i le teritori o Iuta.²

Ae peitai, sa le o taimi uma na avea ia Emily ma se failauga talenia. Sa ia manatuaina le ala na tuuina atu ai e Eliza R. Snow, a o avea ma Peresitene Aoao o le Aualofa, se fautuaga: “O le taimi muamua [na fai mai ai Sister Snow] ou te lauga i se fonotaga, sa lei mafai ona ou faia, ae sa fai mai o ia, ‘E le afaina, ae a toe talosagaina oe e te lauga, taumafai ia i ai se mea e fai atu.’”³

Sa teu fatu e Emily lenei fautuaga ma mautinoa sa saunia o ia e tautala atu i taimi na manaomia ai o ia. E pei o Emily Richards, e tatau ona tatou saunia i taimi uma e “tatala [o tatou] gutu” (Mataupu Faavae ma Feagaiga 60:2) ma folafola atu le afioga a le Atua.