Mataupu Faavae o le Auaunaga

Auala e Mafai ona Tatou Lagolagoina Ai Matua e ala i le Auauna Atu

E manaomia e matua le alofa ma le lagolago i a latou matafaioi paia o ni tina ma ni tama.

Ata

little boy, with mother and daughter struggling in background

Ata pue mai le Getty Images; ata tusi e tamaiti na saunia e Addison P. ma Hadley P.

O matua e feagai ma luitau tulaga ese ma e tele lava ina faigata. O le lagolago alofa a uso ma tuafafine o auaunaga e mafai ona taua tele i le tulaga manuia o matua ma fanau. O le a faamanuiaina e le Atua a tatou taumafaiga pe a tatou vaavaai mo auala e faamalolosia ai matua ma fanau i o tatou olaga.

O Ane ma Kara sa fou uma i le la uarota i le taimi na tofia ai Ane e auauna atu ia Kara ma lona aiga talavou. Sa vave ona atiina ae se faigauo i le va o i laua e toalua. O Ane, o se tasi faatoa faaipoipo, sa fiafia e fesoasoani ia Kara ma lana fanau teine laiti e toafa, o e na faasolo le matua mai le pepe faatoa fanau i le fitu tausaga le matua. I se tasi aso, na ta’e ai le ulu o le pepe a Kara o lea na manaomia ai se taotoga.

Sa oso atu Ane ma vaai isi tamaiti seia oo ina mafai ona taunuu lo latou tinamatua e tausi i latou. Ina ua taunuu atu lo latou tinamatua, sa siaki e Ane e vaai po o le a se fesoasoani na te ono manaomia, ona aumaia lea o se taumafataga mo le aiga i lena po. Sa ia faatulagaina foi ni tuaoi e aumai ni meaai mo ni nai aso.

O le aso na sosoo ai ina ua asi e Ane le aiga o Kara, sa matauina e Ane se tasi o tama teine a Kara sa popole i lona uso pepe, o lea na valaaulia ai e Ane o ia e sau e fai ni kuki e tuuina atu ai ia te ia le gauai patino. Na tesi foi e Ane le aufono a le uarota e tau atu ia i latou le mea na tupu ma tau atu ia i latou o le a ia faailoa atu ia i latou e uiga i le tulaga. I le vaiaso na sosoo ai, a o maua e le pepe ni togafitiga, sa faailoa ai e Ane i le aufono a le uarota e uiga i le tulaga o togafitiga ma le taulimaina o manaoga o le aiga. O le fesoasoani a Ane na mafai ai e Kara ona maua le avanoa ma le filemu o le mafaufau o se matua i se tulaga faigata ma le taufaafefe.

Motugaafa o le Auaunaga mo le Fesoasoani e Lagolago Matua

1. Faaitiitia le atuatuvale tele o lagona o matua. Afai o loo lagona e le aiga le atuatuvale, e mafai e la outou sootaga ona fesoasoani i le atuatuvale lea e faigata ai i matua ona avea ma se sootaga mautu ma le alofa i olaga o a latou fanau. O auala e fesoasoani ai atonu e aofia ai:

Saili ia malamalama i punavai o le atuatuvale. Ia avea ma se tasi e faasoa atu ai manatu a o e faalogologo atu ma le totoa. Mulimuli i uunaiga.
Aoaoina o tomai mo le sailiga o se galuega, fesoasoani e toe faatulaga a latou paketi, po o le sailia o avanoa faaleaoaoga po o aoaoga faamasani.
O le fesoasoani i le faafesootaia o i latou i punaoa aoga, e pei o kosi o le ola tutoatasi, po o le fesoasoani ia i latou i le faatumuina o pepa mo fesoasoaniga tau tupe po o auaunaga.

2. Faamalolosia le gafatia o matua e tauave ai le avega. O lenei mea e mafai ona aofia ai:

Tuuina atu ia i latou ni nai punaoa a le Ekalesia e mafai ona fesoasoani i o latou tulaga patino.
Faatulaga taimi masani e tuuina atu ai le lagolago faalelagona e ala i le faalogo ma le mafanafana.
Faafoeina taimi mo se matua e tausia ai ia lava.

3. Ia atiae lo latou maufetuunai ma le faamoemoe a o e:

Faaali atu le faamoemoe ma le faatuatua ia Keriso ma liliu atu i latou ia te Ia mo le filemu ma le lagolago.
Fesoasoani ia i latou e faataua le matagofie o taimi faigata, gasu o le tulaga faamatua ma faamautinoa ia i latou e le o tuua na o i latou i ni taimi tiga.
Faaali atu ia i latou le alofa ma matauina i latou mo galuega ofoofogia o loo latou faia.

4. Faafaigofie le fiafia. O se tasi o luitau sili ona faigata mo matua o loo tauivi o le maua lea o le malosi e taaalo ai ma maua le fiafia faatasi ma a latou fanau. E mafai ona e fesoasoani atu ao e:

Faatulaga se taumafataga o le afiafi po o se po o taaloga.
Ia faamanatuina ni taimi e taua ia i latou, e pei o aso fanau, aso malolo, po o isi aso faapitoa.
Valaaulia i latou tou te auai faatasi i au lava gaoioiga atofaina.