O O’u Faamanuiaga Le Faailoaina
Mo au sa avea faigata e iloa ai le ala o loo faamanuia ai au e le Tama Faalelagi.
Atapue mai le Getty Images
Ina ua ou taunuu i lou eria lona tolu i le Misiona a Filipaina Bacolod, ua amata le vaitau o timuga. Sa tofia au i se nuu laitiiti, matagofie na siomia e faatoaga i matu i sisifo o Negros, o se motu i Saute.
Ia Tesema 2014, na taia ai e le Afa o Ruby ia le itumalo. O le faatafunaga sa le matua matautia i lo matou eria, ae o auala pefu na amata ona palapala ma maseesee. E ui lava i tulaga na, ae sa faaauau pea ona matou galulue.
O se tasi o a ma eria sili ona faamanuiaina o se nuu laitiiti e i fafo mai o le aai. O i latou uma na ma aoaoina ma tagata sa lei leva ona liliu mai sa o ni faifaatoaga. Ona sa latou galulue i toga tolo i le ao, sa ma aoaoina ai i latou i aoauli ma afiafi.
Ina ia oo atu i le alalafaga, e tatau ona ma savavali i fanua palapala, ma faaeteete i taifau, lane, gata, ma namu. Sa ma aumaia i taimi uma ni moliuila ma faamalu. E momoli maua e tagata o le Ekalesia i le fale pe a pogisa.
O nisi taimi, sa ou lagonaina ai le fiu. Ou te lei mautinoa pe mafai ona ou savali i toga tolo palapala i aso uma, o lea na ou tatalo ai mo se fesoasoani. Na oo mai le tali: “Faatau ni seevae pau soloatoa!”
Sa tofu maua ma lau soa ma le pea na faatau. Sa matuai ou fiafia lava i le i ai o ni seevae pau soloatoa, ae na vave lava ona mou atu lou fiafia ona sa matuai mamafa ma le lagolelei. Sa afugia ai o’u vae ma taofia ona ou savali televave.
Ina ua uma a matou lesona i se tasi afiafi, sa ma o i le fale ma sui i o ma’ua seevae talai masani. Ona ma toe o lea i se isi fuafuaga faatulagaina i le aai. A o ou savali, sa ou lagonaina le māmā. Sa ou fiafia e toe see ou seevae palasitika. Sa ou mafaufau pe aisea na faafuasei ai ona ou lagona le lotofaafetai mo seevae sa ou seeina i lau misiona atoa.
Na oo mai le tali o se manatu: “O seevae pau soloatoa na faia le eseesega.” Ana le oo i lena taimi, ou te lei iloaina le lagolelei tele na tuuina mai e ou seevae palasitika ia te au.
Na faafuasei lava, ona emo mai i lou mafaufau ia faigata ma luitau o lau misiona. O ou seevae palasitika sa o se uo i aso uma, sa lei talisapaiaina. A o [ou] taumafai e malamalama i ou lagona le mautonu, sa ou lagonaina se leo o faapea mai, “E te oo i tofotofoga ma faigata i le olaga ina ia mafai ona e aoao i le auala e iloa ai faamanuiaga ma loto faafetai ai mo i latou.”
Sa ou iloaina e tatau ona ou oo i faigata ina ia mafai ona ou talisapaia faamanuiaga a le Tama Faalelagi. E ala i ou tofotofoga, na ou iloa ai ou faamanuiaga ma na ou faafetai ai mo i latou.