Revelesen we I blong Yuwan—Wan Witnes we I Kam long God, Papa blong Yumi

Ol profet, oli no olgetawan nomo we oli save kasem revelesen. Sapos yu stap fetful, yu save kasem revelesen we i blong helpem yu wetem ol spesel nid, responsabiliti, mo kwestin blong yu, mo i helpem yu blong mekem testemoni i kam strong moa.¹

Taem mi luklukbak 40 yia long membasip blong mi insaed long Jos Ia blong Jisas Kraes blong Ol Lata-dei Sent, mi sapraes tumas, mo mi talem tangkyu tumas from ol eksperiens blong laef blong mi we oli gud tumas, mo i jenisim laef blong mi, we i hapen tru long revelesen we i blong miwan we i kam long wan Papa long Heven we i gat lav, i stap hapen yet tedei.

Mi tingbaot fasfala big eksperiens blong mi, we mi bin kasem wan revelesen we i blong miwan. Mi gat 17 yia; i hapen long hom blong papa mo mama long Suva, Fiji. Mi bin stap long bedrum miwan, mi stap ridim Buk blong Momon wetem wan strong tingting long hat, se mi mas save se buk ia i tru o no. Hemia i bin jalenj we tufala fultaem misinari, Elda Rian Nelson mo Elda Randy Price, tufala i bin givim long mi afta lesen we tufala i bin givim long saed blong profet Josef Smit, mo wei we hem i bin kasem ol buk we oli wokem long gol, we hem i kasem long wan enjel, mo afta, hem i bin transletem i kam long Inglis.

Tufala misinari ia, tufala i ridim sam skripja long Buk blong Momon long taem blong storian blong mifala, mo tufala i bin serem ol testemoni we i gat paoa mo i givim laet. I tajem hat blong mi bigwan, mo mi bin wantem save miwan se, wanem we tufala i bin serem, i tru se i kam long God. . . . Mo mi bin wantem blong talem, wetem semmak strong tingting mo tras, wanem we tufala i bin talem.

Mi ridim 3 Nifae japta 11; kolosap stret afta, mi stat blong andastanem mo kasem moa laet. Mi gat pikja blong Sevya, Jisas Kraes, we i aot long heven i kamdaon mo i stanap long medel blong ol grup blong ol pipol, wetem han blong Hem we i open i stap, mo i stap invaetem olgeta blong go long Hem, blong oli filim ol mak blong ol nil long han blong leg blong Hem. Hemia, oli mekem, wan afta wan, mo afta long hemia, oli bin foldaon we fes blong olgeta i fesem graon, mo oli bin wosipim Hem olsem Mesaea ia we God i bin promesem².

Ol filing blong harem gud, kamfot mo pis oli kavremap ful bodi blong mi, mo mi bin krae wetem ol krae blong lav, tangkyu mo glad long Lod mo from misin blong Hem we Hem i mekem wetem lav mo sore. Long stret taem ia, mi bin luksave se hemia i bin wan witnes long saed blong spirit we i kam long heven. . . . Se wanem we mi mi bin stap ridim mo filim, i tru mo i kam long God.

Ol gudfala filing we mi bin filim wetem ol misinari long dei bifo oli kambak, be long tetaem ia, mi no bin stap miwan. Paoa blong Tabu Spirit i kam long mi mo i strong. Mi no bin wantem gudfala taem ia blong i finis. Mi bin save long tetaem ia, wanem nao hem i revelesen we i blong yuwan. Long eni taem we mi bin serem eksperiens ia ova long ol las 40 yia, swit kwaet witnes ia we i kam long Tabu Spirit i stap fulumap hat blong mi.

Wan nara eksperiens we mi bin gat abaot fasin blong kasem revelesen, i long taem we mi bin stap olsem wan stek petriak. Mi bin sapraes mo gat tingting i stap daon blong save kasem revelesen ia we i kam long Tabu Spirit evri taem we mi putum han blong mi antap long hed blong ol memba ia we oli kam blong kasem petriakel blesing blong olgeta. Long evri taem, mi kasem klia insperesen we i kam insaed long maen blong mi, mo mi bin save givim, long wanwan, ol blesing ia we oli kam long God, Papa blong olgeta, we Hem i bin wantem olgeta blong kasem. Wok blong mi, i blong mi lisin gud evriwan. . . . Mo talemaot wanem we mi bin kasem.

I nomata we tufala eksperiens ia oli defdefren, samting we i bin semmak, i we, mi nidim revelesen we i kam long God blong Hem i tijim, soem rod mo givim kamfot long mi; mo mi bin gat fet ia se bambae Hem i blesem mi folem hemia.

Profet blong yumi we i stap laef, Presiden Russell M. Nelson, i bin tijim yumi long saed blong prinsipol blong revelesen long Epril 2020 Jeneral Konfrens. Hem i talem:

“Profet Josef Smit i putum wan paten i stap blong yumi folem blong stretem ol kwestin blong yumi. Folem promes blong Jemes se sapos yumi no gat waes, yumi save askem long God, nao Josef i tekem kwestin blong hem i go stret long Papa long Heven. Hem i bin askem blong kasem revelesen we i blong hemwan, mo kwestin blong hem ia i bin statem las dispensesen ia.

“Long semmak fasin, ?wanem we yu stap lukaotem ia, bae i givim wanem long yu? ?Wanem waes nao yu no gat? ?Wanem nao yu filim se yu mas save o andastanem kwik naoia? Folem eksampol blong Profet Josef. Faenem wan kwaet ples we yu save go long hem oltaem. Putum tingting blong yu i stap daon long fes blong God. Talemaot hat blong yu long Papa blong yu long Heven. Tanem yu long Hem blong yu kasem ansa mo kamfot.

“Prea long nem blong Jisas Kraes abaot ol wari blong yu, ol fraet blong yu, ol wiknes blong yu—yes ol samting we oli hevi long hat blong yu. !Mo afta, yu lisin! Raetemdaon ol tingting we oli kam long maen blong yu. Raetemdaon ol filing blong yu, mo folem wetem ol aksen we Spirit i talem yu blong mekem. Afta we yu ripitim paten ia dei afta dei, manis afta manis, yia afta yia, bambae yu “gro long prinsipol ia blong revelesen”.³