Yu Mekem Tingting blong Yu

Jisas i bin tijim yumi blong prea wetem ful fet mo tras long God. Hem i givim instraksen long ol fasfala disaepol blong Hem se, “Taem yumi prea, yumi talem . . . Papa, nem blong yu i tabu. Mifala i wantem we ol man oli ona long yu, mo we yu yu kam King blong olgeta man” (Luk 11:2).

Ol ki toktok long ples ia i, blong tingting blong Hem i kamtru.

I nomol blong yumi stap wari long ol nid blong yumi, mekem se, long tingting blong mi, yumi stap skipim instraksen ia. O Samtaem yumi talem se “tingting blong Yu bambae i Hapen,” moa olsem wan samting we bae yumi tingting long hem afta, be i no sapos blong i olsem.

God i save evri samting mo i gat olgeta paoa. Yumi folem tingting blong Hem from se Hem i fulap long lav ia we i no save finis, mo Hem nao i gat wan lukluk we i go long taem we i no save finis blong save stretem ol nid blong yumi long wan stret wei. Blong stap trastem tingting blong Hem, i wan fandesen blong ol prea we oli wok insaed long laef blong yumi.

Sevya blong yumi, Jisas Kraes, i eksampol blong tijing ia, taem we, long Getsemane, we Hem i harem nogud tumas wetem ol hevi trabol ia we oli ol sin blong wol ia, Hem i askem strong long Papa blong Hem: “Papa, sipos yu save mekem, plis yu tekemaot ol samting ya we i stap mekem mi mi harem nogud tumas. Be yu no mekem olsem we mi mi wantem, yu mekem olsem we yu nomo yu wantem” (Matiu 26:39).

Bae yumi no oltaem kasem ansa blong ol prea blong yumi long wei we yumi wantem o stap hop from, be taem we yumi letem Hem i win, Papa blong yumi long Heven i bin promesem yumi blong gat pis long ol taem we oli had.

Let long wan naet, taem papa blong mi i bin sik tumas, mi bin nildaon long saed blong bed blong hem, mo mi bin prea wetem ful paoa blong hat mo sol blong mi se Lod bae i helpem mi blong save wanem mi save mekem blong helpem papa blong mi. Mi bin prea wetem ful fet mo tras ia long Papa blong mi long Heven. Bae mi prea, afta mi stop; afta mi prea, mo stop bakegen; mo mi rili traem blong putum ful tingting blong mi long wan samting. Mi rili traem blong lisin gud long Tabu Spirit.

Mo afta, wan filing i kam long mi, mo mi talem long miwan: “Yu stap wokem askem Lod from samting ia we yu yu wantem. ?Be weswe long wanem Hem nao i wantem?”

Ol nekis toktok we oli kamaot long maot blong mi oli: “Papa long Heven, mi rili wantem papa blong mi blong hem i laef. Mi rili wantem hem blong stap ia wetem yumi. Be, sapos hemia i no plan blong yu from hem, nao mi mi glad blong letem hem i go. Mi mi glad blong akseptem tingting blong yu.”

Lod i bin toktok long hat blong mi, mo i talem long mi: “Fetful gel blong mi. From se yu yu glad blong akseptem tingting blong Mi, be i no blong yuwan, bambae mi givim kamfot long yu mo bambae mi blesem yu blong yu gat pis.”

Long nekis moning, swit papa blong mi i gobak hom long Papa blong yumi long Heven. . . . Mo mi bin filim hat blong mi i kwaet evriwan, mi gat wan pis ia we i naes tumas. Mi bin filim lav ia blong God we i klin evriwan.

I nomata we mi harem se mi no hapi tumas, Lod i bin mekem hadtaem ia i sofsof, mo i bin mekem se i isi blong mi tekem. Mi bin gohed blong filim kamfot blong Hem long plante defren wei, mo tru long plante fren mo memba blong famli. Mi bin filim se mi gat blesing, semmak olsem we God i bin promesem long mi.

Mi talem wan nara prea blong talem tangkyu long Hem, mo blong talemaot hamas mi mi lavem Hem.

Mi mi talem tangkyu from presen ia, we i prea, mo presen ia i gud tumas. Blong stap toktok wetem Papa blong yumi we i Stap long Heven, hem i wan tru spesel janis. Bae yumi gat fet blong akseptem tingting blong Hem long saed blong evri samting, mo trastem tabu lav ia blong Hem, se lav ia bambae i sapotem yumi truaot long evri jalenj long laef.