Fet Ia blong Prea from Wan Merikel

Oltaem nomo Brata Joseph Price blong Oklan Niu Silan, Papatoetoe Stek, i laekem tumas ol sugabag o bi. Hem i ridim abaot ol sugabag long ol skripja—abaot wei ia we Ol Man blong Jared oli tekem ol sugabag (luk long Ita 2:3), mo hao nao Lihae mo ol famli blong Hem oli bin kaekae hani blong sugabag (luk long 1 Nifae 17:5).

Josef i laekem tu blong singsing abaot ol sugabag long fevret hym abaot Fas Visen mo hem i stap tingting hevi long merikel stamba tingting blong ol bi long wol. Josef i talem se, “sapos oli no stap tekem polen blong ol plant, bae ol fam blong yumi bae oli no save laef.”

Hem i bin drim se, wan dei, bambae hem i lukaotem ol sugabag blong hemwan, mo afta long 2018, Josef, we i bubuman finis, i gat janis ia. Hem i pem tu bigfala haos blong sugabag mo i putum i stap long yad blong hem mo i pem wan sut blong werem evri taem hem i visitim ol bi. I no longtaem, intres blong hem ia i kam samting we i laekem blong mekem i bitim mak.

“Hem i laf mo talem: “Hem i wan glad wei blong laekem wanem we Papa long Heven i krietem, mo ol sugabag ia, oli no stap tokbak long mi.” Hem i givim fulap taem long ol bi blong hem mekem se gel blong hem i askem hem fulap taem olsem wanem nao ol “sugabag pikinini blong hem.” Mo olsem we ol pikinini oli stap mekem, ol sugabag ia oli bin tijim hem ol impoten lesen long laef.

“Wan dei, mi bin visitim ol haos ia be mi no werem sut blong mi,” Josef i tingbaot. “Profet blong yumi, Russell M. Nelson i bin toktok long wan kongregesen long rijin, long Oklan, long nekis dei—mo mi go mekem koling blong mi long miting ia wetem wan sting blong sugabag long ae blong mi.”

Eksperiens ia i tijim mi se i impoten tumas blong oltaem protektem yu, long bodi mo long spirit.

Haelaet blong wokbaot blong Josef i taem we ol sugabag haos blong hem oli givim 60 kilo blong naes hani. Hem i bin givimaot plante glas botel blong hani mo ol man oli laekem. “Iven fren blong mi we i gat wan hani bisnis i talem se hani blong mi i tes gud moa bitim wanem olgeta oli mekem,” Josef i talem wetem bigfala smael. Hem i no save wet nomo blong luk se ol sugabag blong hem bae oli mekem gud long nekis taem blong pikimap hani.

Nao, long wan moning, hem i faenem se wan ful haos i emti. !Ful koloni blong sugabag i ronwe!

Josef i lukaotem long ol ples raonabaot, be nogat. “Samtaem, kwin bi i jes disaed blong aot mo tekem ol bi blong hem wetem hem,” hem i eksplenem. “Samtaem, yu save faenem olgeta, mo samtaem, yu no save.”

Hem i bin save se sapos wan koloni i aot long haos blong hem, bae i no save kambak. Mo tu, ol bi oli neva tekova long koloni blong wan narawan. From ol risen ia, olgeta we oli lukaot long ol sugabag, oli gat fulap haos—be Josef i gat tu nomo.

Sore tumas, tu manis afta, sekenwan tu i aot.

Hat blong Josef i brok: “Mi no harem gud nating. Mi harem se mi lusum wan samting.”

Hem i hangem sut blong hem, mo i go talemaot nogud nius long Atelaite. “Ol sugabag blong yumi oli go,” Josef i talem long hem. Hem i leftemap tingting blong Josef blong prea.

Stat long moning ia, kapol ia i prea strong, evri dei, from ol sugabag blong tufala. Tufala i talem tangkyu long Papa long Heven from janis ia blong lukaotem ol sugabag, mo from glad ia we eksperiens ia i givim long tufala, mo afta, tufala i bin prea from wan merikel—se ol sugabag ia bae oli kambak.

Kolosap tu wik afta, Josef i stat blong lusum bilif blong hem. Hem i talem long Atelaite se hem i rere blong brebrekem ol emti haos ia mo pem ol niu sugabag long niufala taem blong hem. “I hapen olsem,” hem i talem long waef. “Yumi letem nomo neja i mekem wok blong hem.”

Be Atelaite i no rere blong givap. Hem i gat toktok blong Amulek insaed long hat blong hem:

“Yes, putum tingting blong yufala i stap daon, mo gohed long prea, long hem.

“Prea long hem taem we yufala i stap long ol plantesen blong yufala, yes, prea from ol grup blong animol blong yufala. . . . blong oli save kam moa plante (Alma 34:19–20, 24–25).

Atelaite i no stap blong prea.

Wan Satedei moning, Josef i luk se samfala sugabag oli stap tantanem olgeta long ol bed blong flaoa long garen blong hem. Wetem ae blong wan we i lukaotgud long sugabag, hem i luk se plante oli tekem polen i go, mo afta long hemia, oli flae i go from bed blong olgeta.

Josef i hariap blong putum sut blong hem mo i go lukaotem olgeta. Ol sugabag oli tantanem olgeta raon long wan long ol bed haos blong hem, mo taem hem i openem, i fulap wetem ol taosen blong sugabag we oli bisi.

Josef i krae mo talem wan kwaet prea blong talem tangkyu. Hem i lukaotem kwin mo talem tangkyu blong tekem ol sugabag oli kam long bed haos blong hem. Afta, hem i ron i go long haos blong talem long Atelaite.

Hem i se: “Daling, ?yu save wanem? !Ol sugabag oli kambak!” Hem i haggem mo i kisim waef blong hem, mo afta i talem long hem: “Fet blong yu i moa bigwan long hemia blong mi.”

Kasem tedei, Josef i no save se ol sugabag ia oli ol semfala sugabag we oli bin aot, o sapos i wan niuwan. Mo i no posibol blong i olsem; hem i save nomo se wan merikel i bin hapen, mo fet nao i bin kam faswan.

“Kolosap mi gat tu tingting mo jes letem neja i mekem wok blong hem,” Josef i talem, “be waef blong mi i neva givap.” Mi bin lanem blong neva givap long ol prea blong yumi mo blong trastem Papa long Heven. Wan merikel bae i no hapen oltaem, be taem i hapen, i tekem glad i kam.