Stap Faenem Rod blong Hem Tru long Fasin blong Talem Tangkyu mo Gat Fet

Blong 30 yia, Afulua Tuivaiti, blong Pesega Wod 6 long Pesega Samoa Stek, i bin drim se, wan dei, bambae hem i save gobak long hae skul blong finisim ol stadi we hem i bin mestem. . . . Mo sapos i posibol, bae i gohed kasem yunivesiti. Hem i jes no save nomo olsem wanem blong mekem.

Wetem wan famli blong lukluk long hem, i no gat fulap salari mo hem i gat fulap responsabiliti long Jos mo long komuniti; Afulua i stat blong filim se i let nao long hem, blong hem i save kasem edukesen we hem i wantem kasem. Nao, wan senia misinari kapol long wod blong hem, i bin talem hem abaot PathwayConnect program we Jos Ia blong Jisas Kraes blong Ol Lata-dei Sent i stap holem.

PathwayConnect i no sas, i blong 4 semesta, i rere olgeta we oli lan blong oli statem wan yunivesiti Digri, we oli save mekem onlaen wetem Brigham Yang Yunivesiti (BYY). Program ia, i stap raon long wol mo Jos i stap promotem long saed blong ol klas blong indipenden laef.

Taem we Afulua i bin lanem abaot PathwayConnect, hem i stat blong gat hop, i stat askem hemwan se drim ia blong hem blong stadi bakegen i wan drim o no. “Elda mo Sista Abbot i presentem Pathway long mi, mo wan nara misinari wetem open han i pem ol skulfi blong mi. !Hem i wan gudfala blesing!

“Olsem wanem Papa long Heven i bin ansarem ol prea blong mi, long mi, hem i wan merikel.”

Afulua, kwiktaem nomo i rejista mo i no longtaem afta, i go long fas klas blong hem, we hem i bin fraet long hem smol.

“Long fasfala semesta blong mi, mi fraet fraet from se mi no bin toktok gud Inglis,” hem i talem; be naoia, long nambatri semesta blong hem, problem ia i finis nao. “Inglis blong mi i stap kam antap, mo mi mi nomo fraet bakegen. Antap long hemia, mi neva bin stap miwan. Ol lida blong Jos, ol tija blong mi mo ol fren long klas oli leftemap tingting blong mi,” Afulua i talem.

Hem i talem tangkyu nao long Sista Ho Chin, waef blong Apia, Samoa misin presiden, mo ol misinari long stek ofis we oli bin helpem hem, speseli wetem ol nid blong hem long saed blong teknoloji, mo hem i talem tangkyu long bisop blong hem, Lautua Fa’aofo mo waef blong hem Apu, we i gohed blong sapotem hem i go.

“Mo tu, mi stap kolosap moa long Lod,” hem i talem. “Eksperiens ia i bin helpem mi blong mekem testemoni blong mi i kam strong moa.”

Hem i wan testemoni we i mekem mi gohed mo i leftemap tingting blong mi truaot long wokbaot ia, we i no bin isi samtaem. Afulua i tekem kea long mama blong hem we i gat 85 yia, mo apuboe blong hem we i gat 5 manis, we, taem oli ademap wetem evri wok blong hem long haos, i mekem se hem i bisi tumas evri dei. Mi save stadi long naet nomo, hem i talem, mo plante taem i stap slip.

Be hem i gohed.

Wetem wan moa semesta we i gohed long PathwayConnect, Afulua i gat strong tingting blong gohed long BYY digri program mo i stap tingting long sam moa step blong gohed.

“Mi mi laekem tumas Hospitality and Tourism Management.” “Mi biliv se mi hemia i save kam wan gudfala bisnis blong mi, wan dei.” Wanem we i stap Afulua i putum sam mani i stap long saed finis blong putum long wan fiuja invesmen, be tu i stap tingting blong stadi long saed blong helt.

Hem i gat taem yet blong disaed se wanem Meja bae hem i mekem, be Afulua i klia long wan tingting. “Mi gat fet long Lod Jisas Kraes.” Hem i stap ansarem ol prea blong mi, i lidim mi i go long raet rod.”

Fet we Afulua i gat long God, mo komitmen blong hem blong kasem ol gol blong hem, i mekem se i givim insperesen blong hem i gat fet long hemwan tu. Oltaem bae i gat ol samting oli kam blokem rod, hem i talem. Be oltaem mi traem blong winim olgeta mo leftemap tingting blong mifala blong mi mas traehad moa blong mi save mekem plan blong mi i kamtru.”