Unimwaane Denelson Silva

Te raroa ae 4,000-te maire (6,400 km) te mwananga n oki mai Luanda, Angola, nako São Paulo, Brazil, e angan Unimwaane Denelson Silva ma buuna, Regina, aia tai ni kaitara te kangaanga ma te wirikiriki. Imwiin ana beku bwa te beretitenti n te mition, Unimwaane Silva e namakinna bwa ngaia ma buuna a riai n aki kabooa aia auti.

A tia ni kabonakoa mweengaia imwain ae a nako n aia mition. A baireia bwa a na kabooa aia auti ae boou ngkana a oki ma a namakinna bwa a riai n tataninga. “Auti iaon Brazil tiaki bwaai aika ko kabooi ao ni manga waekoa ni kabonakoi,” e taku Unimwaane Silva. “E kona n anaa iraua te bong ke te namwakaina ke te ririki.”

Titita Silva e taekinna bwa a kabotoa aia iango iaon te koaua are Tamara are i Karawa e a tia ni kairiia mai imwaina iaon aia mition ao E na manga kairiia riki. “Ti uaia ni baireia bwa ti na riai n tataninga te tai,” e taku. N oneanmwiina a rineia bwa a na maeka n te auti are e kaboaki n tangoaki.

N aron kabooan te auti i Brazil, te kaeka e aki roko inanon iraua te bong ke te namwakaina ao bon te ririki. E roko te kaeka n te maan ae riaon uoua te ririki ngke e karekea te wewete Unimwaane Silva bwa te Mataniwi ni Kabuta n te Itingaun.

“Ti a tia ni katauraoa ara iango bwa ngkana E tuangiira bwa ti na karaoa te bwai teuana ao ara kaeka n taainako bon eng,” e taku Unimwaane Silva. “Ngkana te kaeka tiaki ‘eng,’ n taainako e karekea te marena ibukin ‘tiaki’ ke ‘tao ngaia.’” E ngae n anne, iroun te Tia Kamaiu, e kabwarabwara, “akea te marena ibukin ‘tiaki’ ke ‘tao ngaia’ i Ketetemwane.”

Denelson Urbano da Silva e bungiaki n Turai 4, 1965, i Recife, Brazil, irouia Domingos Urbano da Silva ao Maria José de Almeida Silva. E ikawairake i Recife ao e kabaeaki ma Regina Maria de Carvalho Silva n te São Paulo Brazil Tembora ni Meei 1987. Te taanga aei iai uoman natiia.

Iai ana beeba ae kinaaki n te business administration (data processing). E mwakuri n te bootaki ni mwakuri ibukin mwamwananga n te maan ae 30 te ririki.

Man 2016 ni karokoa 2019, Unimwaane Silva e beku bwa te beretitenti n te mition ma buuna n te Angola Luanda Mition. E a tia naba ni beku bwa te Itingaun n te Aono, beretitenti n te titeiki, bitiobi, kauntira ae rietaata, ao te mitinare ae bwanin ana tai n te Brazil Curitiba Mition.