Aine a Kakorakora ao a Beku

Iaon bwaai n reitaki ao i bon irouna, te Beretitenti ni Kabuta n te Bootaki n Aine a reitanako aia mwakuri ni kakorakorakia utu ao aomata nako ao a beku ibukiia natin te Atua ni kabuta te aonaaba.

Inanon Maati 2022, Beretitenti Jean B. Bingham e taetae n ana ka 180 n ririki te Bootaki n Aine. N te bong aei, e taekinna, iai itiua ao te iterana te mirion aine ake a buokiia aika rawawata, kamaiui tamnei, ao ni kakoroa nanon te kantaninga are e aanaki ni moan katean te Bootaki n Aine n 1842.

Beretitenti Beingham ao Titita Sharon Eubank, te Moan Kauntira n te Beretitentii ni Kabuta n te Bootaki n Aine ao te beretitenti n te Latter-day Saints Charities e kawari tabeua aban te Middle East. I Cairo, Aikubita, Beretitenti Bingham e taekinna bwa e anaaki nanona n “aia tangira ae aki kewekewe aika Itiaki bon imarenaia.” Beretitenti Bingham ao Titita Eubank a kawari naba taabo ni kamanomano ibukiia taan birinako i Kurdistan, are e a tia n ibuobuoki iai te Ekaretia ni katauraoi taabo ni katantan.

Titita Reyna I. Aburto, te Kauoman ni Kauntira, e roko i Spain n raonaki ma Titita Michelle D. Craig, te Moan Kauntira n te Beretitentii ni Kabuta n te Bootaki n Ataeinnaine. “Ana rau te Atua e teimatoa ao e korakora riki nakon te buakaka n te aonaaba,” E taekinna Titita Aburto n tain aia bootaki n taromauri ataei ao te roronrikirake.

Rinanon bwaai n reitaki, te Beretitentii ni Kabuta e katokai rongorongo iaon kanaia ataei, anua aika a raraoi, ao marurungiia, n reitaki ma ana Warebea te Ekaretia ao Ibuobuoki iaon te Riki-Toronibwai ni karokoa te rongorongo irouia kaaro ibukin kakaawakin te tebobai, te ran ni mooi ae itiaki, amwarake aika karekea te marurung, te kammamma, iti n totoko, te kakaitiaki, ao kawaran kiriniki.

Te beretitentii e a tia naba ni kaungaiia aine bwa a na tibwai aia namakin n te bwai are e na kaungai nanoia bwa a na ira ana waaki te Bootaki n Aine ae bwanin ao n aron te Bootaki n Aine bwa e na rangi n anainano riki ao ni boboutoka.