Unimwaane Mark D. Eddy

N te tiamwa imwain ana kabanea n ririki Unimwaane Mark D. Eddy n te kauarinan, te tia reirei n te tieminari e kaoia ao membwa ake tabeman ake kain te kauntira irouia ataein te reirei bwa a na wareka ana Boki Moomon. E mwaiti ana tai are e a tia iai ni warekia ma ana utu, ma ai tibwa aio ana tai ni wareware i bon irouna.

E baireia bwa e na tataro imwain ao imwiin ana wareware ni katoabong. E kantaningaia bwa te kaeka ae itiaki ibukin koauan te boki e na roko inanon teuana ke uoua te wiiki. Imwiin ana wareware ae raka iaon uoua te namwakaina, e teimatoa n aki karekea te kamatoa are e kakantaningaia.

Tabeua te aoa imwain “butimwaean te manga oki” bootaki n taromauri n te tieminari are e tuangaki bwa e na kaota iai ana koaua, Unimwaane Eddy e moantaai n roko bwa e na buoka te kataturaoi. Ngkanne e kunea te tabo ae rau are e wareka iai Ana Boki Moomon ao n tataro.

“Ikanne I a karekea te namakin ae itiaki ae aki kona ni kairuaaki bwa e bon koaua,” e taku. “E roko bon imwain au tai ni kaota au koaua n te tairiki anne. Te namakin e roko imwiin au mwakuri ae abwabwaki are e bon tau ibukiu bwa N na aki kona ni mwaninga.”

Unimwaane Mark David Eddy e bungiaki n te Long Beach, California, USA, ni Maati 30, 1973, nakoia Richard Cleighton Eddy ao Mary Louise Savage Eddy. E ikawairake i Orem, Utah, ao e mare ma Annette “Annie” Allen n te Provo Utah Tembora n Aokati 1994. Iai natiia aika onoman.

Unimwaane Eddy e reke ana beeba man te Brigham Young University n 1996 ae te bachelor’s degree n te communications ao e karekea ana Juris Doctor degree man te BYU n 2001. Man te tai anne e mwakuri bwa te attorney ao business executive.

Unimwaane Eddy e a tia ni beku bwa te Itingaun n te Aono, beretitenti n teUruguay Montevideo Mition, kauntira n te beretitentii n te titeiki, bitiobi, kauntira ae rietaata, kauntira n te bitioburiki, beretitenti irouia Ataeinimwaane n te uoote, te mitinare ae bwanin ana tai n te Dominican Republic Santo Domingo East Mition.