Karoko n te Aonaaba ni Kabuta

Ibukin rongorongon ana mwakuri n ibuobuoki Beretitenti Russell M. Nelson ae kimototo man te kabanea ni maungatabu ni kabuta, taraa iteraniba 135.

N ana taetae n te reirei ae rietaata i Rome, Italy, Beretitenti Dallin H. Oaks, te Moan Kauntira n te Moan Beretitentii, e taekinna bwa inaomatan te aro e uoti kabwaia aika a mwaiti nakon te botanaomata, ao e kaungaiia aomata man aro nako bwa a na “karekei anga n reiakinaki mairoun temanna ma temanna ni kaunga te botoniango are e kabaeira bwa ti na ikotaki.”

Beretitenti M. Russell Ballard, Beretitenti ni Bonomwi, ao Unimwaane aika Jeffrey R. Holland ao Quentin L. Cook a kawarii taabo nako iaon Great Britain, ni kaitibo ma mitinare ao kain te Ekaretia. Ngaiia ake kateniman a karaoa aia mwakuri ni mitinare n te United Kingdom ngke a kairake, ao Unimwaane Holland bon toana Unimwaane Cook.

Unimwaane David A. Bednar e taetae n te bootaki n taromauri i Jordan. I aban Arabia, e kaitibo ma taan kairiiri n te Abu Dhabi Titeiki ao e kawara te tabo are e na kateaki iai te tembora n te tai teuana. I Bahrain, e kaitibo ma membwa n te Manama Uoote ao e karaoa te bootaki n taromauri ma te roronrikirake.

Unimwaane D. Todd Christofferson e riki bwa te moan Abotoro n roko n te Republic of the Gambia. E kaitibo ma te beretitenti, te moan aine, ao te kauoman ni beretitenti n te tautaeka ae inaomata ao a maroroakina te mwakuri n ibuobuoki imarenan te Ekaretia ao aan te moan aine ni buokiia naake a kainnano. Unimwaane Christofferson e karoko naba n te Ivory Coast, Nigeria, ao i Ghana.

Inanon ana marooro ao ana kataneiai i Colombia ao Ecuador, Unimwaane Neil L. Andersen e uringiia kain te Ekaretia aika a mwaiti ake a tia ni motirawa man te COVID. E kaitibo ma mitinare, 36 beretitenti n te mition ao kainabaia, ao taan kairiiri n te titeiki, n taetae n Spanish. N te bootaki n taromauri i Colombia, e taetae iaon kakorakorakin te mare ao te utu.

I Panama, Unimwaane Gary E. Stevenson e riki bwa te moan Abotoro ni kawari mwakorokoron aban te Carti Tupile n te San Blas Archipelago, are e mena n te mwakoro ae Guna Yala ake bon kaain raoi te aba are uoua ao te iterana te aoa kaeana man te Panama City.

Unimwaane Gerrit W. Gong e taetae nakoia te roronrikirake i Biribin iaon karaoan babaire aika a riai ao katokaan aran Iesu Kristo iaoia. E kaitibo ma mitinare ao, n te kanakobwana are e kabuta aon Biribin, e marooro nakoia ikawai ake a tuai n iein.

I abana are e ikawarake iaona i Brazil, Unimwaane Ulisses Soares e marooro ma ikawai bwa a na kabotoi maiuia iaon te Tia Kamaiu. E tuangiia mitinare bwa a na kamwakura aia onimaki iroun Iesu Kristo ao n teimatoa inanon te koaua. Namwakaina ake imwiina, Unimwaane Soares e oki nako Brazil n taetae n te maungatabu iaon inaomatan te aro. E kaitibo naba ma te kauoman ni beretitenti n te Dominican Republic ao te embatita mai Cuba nakon te aba anne. Te Ekaretia iai teuana ana mwakoro ao aua ana mwaanga i Cuba.

N te marooro iaon bwaai ake a maiu man iti, Unimwaane Dieter F. Uchtdorf e taetae nakoia te roronrikirake, mitinare, ao taan kairiiri n te Ekaretia i Asia; Unimwaane Quentin L. Cook nakoia kairake aika ikawai i Europe, Europe East, Africa, ao Middle East Areas; Unimwaane D. Todd Christofferson nakoia kairake aika ikawai n taetaen Portugual; Unimwaane Neil L. Andersen nakoia kairake aika ikawai i Latin America ao Spain; Unimwaane Ronald A. Rasband nakoia kairake ake ikawai n te Ingiriti; ao Unimwaane Dale G. Renlund nakoia kairake n ikawai n te French.