“Susan H. Porter,” Riaona, Meei 2022.
Susan H. Porter
Beretitenti ni Kabuta n te Moanrinan
“Teuana te bwai are e a tia n anaaki iai nanou inanon ririki aika a nako bwa ti na kanga ni kakorakora maiuia n tamnei ataei?” e taku Titita Susan H. Porter. “Ngkana ti taetae ibukin kakorakoran aia onimaki te roro ae rikirake, anne e na waaki inanon te Moanrinan.”
Titita Porter e noori kakabwaia ake a reke irouia ataei ake a bwabetitoaki ngkai a riki bwa membwa n te berita ae tabu n te Ekaretia.
“Bon kakaraoan te beku ao karikirakean ara koaua n taainako,” e kabwarabwara. “Ataei a kona n reiakinaki bwa a na ukoukori kaotioti mai karawa.”
Imwain weteakina bwa te Beretitenti ni Kabuta n te Moanrinan, Beretitenti Porter e a tia ni beku bwa te Moan Kauntira n te Beretitenti ni Kabuta n te Moanrinan inanon teuana te ririki.
E taekinna bwa a mwaiti ataei ake aki kona n roko n te Moanrinan ni butin te aoraki ae te COVID-19. E noori naba, ao e atai, kangaanga ake a kaitarai tiina ake akea buuia. Kainnabana, Unimwaane Bruce D. Porter man te Itingaun e motirawa inanon 2016.
“A mwaiti Tabati are I aki karekea iai te toa,” e taekinna.
Ngke e tibwa te bwai are e rinanona, aine ake tabeman a tuangnga, “Te koaua are ko a beku n te Ekaretia e anganai te nonori ae tamaroa riki bwa te Ekaretia e kainnanoai naba.”
Susan Elizabeth Holland Porter e bungiaki n Turai 31, 1955, i Ponca City, Oklahoma, USA, nakoia Hans J. ao Charlene Coleman Holland ao e ikawairake i New York, USA.
E mareaki ma Unimwaane Porter n Beberuare 2, 1977 n te Washington D.C. Tembora. A kaikawaia natiia aika aman i mainikun te United States, Germany, ao i Utah ao a kakoroi bukin katabeakiia n te Ekaretia n Aonon Eurobe are i Mainiku.
Titita Porter e karekea ana beeba ae te bachelor’s degree n te chemistry man te Brigham Young University. E a tia ni mwakuri bwa te tia ibuobouki n te lab ibukin te Massachusetts Institute of Technology ao te tia reirei n te numera. E a tia naba n anganano ma komiunite aika a mwaiti ao bootaki aika kinaaki.
Titita Porter e a tia ni beku bwa kain te baba n tararua n te Bootaki n Aine, ao nakoana tabeua ake mai imwaina bon te kauntira n te Beretitentii n te Bootaki n Aine ao te beretitenti n te Bootaki n Ataeinnaine, ao te tia kairiiri n te katangitang n te Moanrinan.