Ana Mwakuri n Ibuobuoki Beretitenti Nelson

Ni kabonganakin rongorongo iaon te bootaki n taromauri ae e kanakoaki n te kanakobwana ao bwaai n reitaki aika maiu man te iti, Beretitenti Russell M. Nelson e reitinako ni kaoia aomata ni kabane bwa a na nakon Kristo ao n reiakinaki Irouna.

N tain te bootaki n taromauri are e kanakoaki iaon te kanakobwana, Beretitenti Nelson e kaungaiia membwa n te Ekaretia i Oklahoma ao Kansas, USA, bwa a na kabotoi aia iango iaon “teuana ana bwaintangira ae te kabanea ni korakora Tamara are i Karawa are e a tia n anganiira bwa ti na kabotoi maiura iaona ao Natina ae Tangiraki,” e taku. “I taetae ni kaineti nakon Ana Boki Moomon. Bon te bwaintangira nakoira mairoun te Atua. Bon atibun maninganingan ara aro ibukina bwa iai inanona, boton Ana Reirei.”

N ana taetae nakoia membwa i California, USA, n tain te kanakobwana teuana, Beretitenti Nelson e kanakoi kakao aika teniua: (1) ukoukora te koaua rinanon te tataro, n ukeuke n koroboki aika a tabu, ao kamatebwaia aia taeka burabeti, taan mamata, ao taan kaotioti; (2) karikirakea mwaakan te tamnei ao motinnano man karaoan berita aika a tabu ma te Atua ao ni kawakini; ao (3) ao karaoa am itera ni kakamwakuri ni buoka ikotakiia Iteraera.

Ao inanon te kanakobwana nakon 48 aaba, Beretitenti Nelson e kauringiia aika Itiaki iaon Eurobe: “A mwaiti mairouia raraomi aika a ukoukoria ni kan ataia bwa bukin tera ngkai a roko iaon te aba. A tangiria n ataia ngkana iai nanon te maiu ao te kantaninga. A tangiria ni kan karaoa te bitaki nakon te aonaaba. A kan ataia bwa antai ae a na kona n onimakinna. Ko ataia ae iai iroum kaekaan aia titiraki raraom aika a ukoukori?”

Iaon bwaai n reitaki, Beretitenti Nelson e kaoiira bwa ti na aki ti namakina te kakaitau ma ti na kaotia. E kaoiira bwa ti na karekea te nne inanora ibukiia naake “iai aia kangaanga n noora otan te Tia Kamaiu ao n namakina Ana tangira.” E kaungaiira bwa ti na “uaia ni beku ni kanakoi anua ni katinanikuia aomata ao mwakuri n kairiribai.” Ao e kakoaua bwa “iai te tabo are ti na kona ni bane n rairaki nako iai ni karekea kamwaitan te tangira ibukiia tabeman ke ni kamaoi nanora ngkana ti namakinna bwa a uruaki—te Tia Kamaiu Iesu Kristo.”