“Unimwaane Isaac K. Morrison,” Riaona, Meei 2022.
Unimwaane Isaac K. Morrison
Mataniwi ni Kabuta n te Itingaun
Unimwaane Isaac K. Morrison e taku bwa ngaia ma buuna e karako matuia imwiin anganakiia te wewete mairoun Beretitenti Russell M. Nelson bwa a na riki bwa Mataniwi ni Kabuta n te Itingaun.
“Ti ataia bwa aio e na riki bwa te mwananga ibukira,” e taku. “Ti na katan iroun te Uea bwa e na kaoti nakoira bwaai aika ti na riai ni karaoi.”
Unimwaane Morrison e weteaki bwa te beretitenti n te titeiki n 2014, Itingaun n te Aono n 2018, ao te beretitenti n te Ghana Cape Coast Mition i 2020.
“Katabeaki nako a tia n roko n te tai are I aki rang kantaningai iai,” e taku. “Ma I katan iroun te Uea ao tiaki oin au konabwai.”
Unimwaane Morrison e mwatita n te tiaienti imwiin karaoan ana tikurii n te strategic management ao aron te kairiiri man te Kwame Nkrumah University of Science ao Technology i Ghana. E a tia ni mwakuri n te Ekaretia n ana konabwai aika a mwaiti man 2004, riki ae ai tibwa ngkai te tia kairiiri ao te manatia ni boutoka ibukin Aberika Maeao.
Isaac Kofi Morrison e bungiaki n Nobembwa 25, 1977, i Takoradi, Ghana, nakoia Joseph Kojo Morrison ao Mary Efua Obua Sarfo.
Ngke e uarereke, Unimwaane Morrison ma ana utu a taromauri n te aro teuana. Ngke e mwaing ma ana utu ai tamana nakon te kuura n reirei n te kauarinan, e ira aia bootaki Aika Itiaki ni Boong aika Kaitira ao imwiina e ira bootakin ana aro. Te tia reirei n te tieminari e kaoia bwa e na ira te tieminari n te karangaina, are e a kaitibo iai ma Hannah Nyarko.
“E rangi ni wanawana neiei ao e angaanga ana marooro aika tamaroa,” e taku. “E anganna te ungannano bwa e na kamatebwai riki.” Imwiin kamatebwaian Ana Boki Moomon n te ririki anne, “I a tauraoi nakon te bwabetito.”
N Ritembwa 18, 2004, ngaia ma Hannah a mareaki i Takoradi ao a kabaeaki tenibong imwiina n te Accra Ghana Tembora. Iai teniman natiia aika mwaane.
N raonaki ma nakoana ake tabeua, Unimwaane Morrison e a tia ni beku bwa te kauntira n te beretitentii n te titeiki, bitiobi, kauntira n te bitiobiriki, beretitenti n te kooram n unimwaane, tia reirei n te Gospel Doctrine, te tia reirei n te tieminari, ao te mitinare ae bwanin ana tai i Nigeria.