Unimwaane Ryan K. Olsen

Ngke e ikawairake Unimwaane Ryan K. Olsen i Sandy, Utah, USA, ana karo aki tangiria bwa e na kiitana te auti n akean te kauring ae tamaroa: “Uringnga bwa antai ngkoe.”

“I rangi n aki atata arou iai ngke I uarereke,” e taku, ma te ngarengare. “Ma taeka akanne a buokai ni kauringa kinaakiu mai karawa. A buokai n uringnga bwa iai Tamau are i Karawa ae e tangirai ao au Tia Kamaiu bon raraou. Bwaai ni kabane ake ti kantaningaia bwa ti na karaoia ke ni katiai bon tii mai Irouna.”

Kamatoan kinakina anne ao aia banna ni katooto ana karo, raona ni mitinare, rekerekena n te Ekaretia, ao taan reirei aika wanawana n te karikirake bon bwaai ni mwakuri aika a rang kakaawaki ake e kabonganai Unimwaane Olsen ngkai e waakina ana beku bwa te Mataniwi ni Kabuta n te Itingaun.

E bungiaki n Okitobwa 11, 1974, ao e ikawairake i Utah Salt Lake Valley, Ryan Kirk Olsen bon te nati te mwaane irouia Kirk ao Cathy Olsen.

Tatangiran te taetae n Latin America ao te Spanish iroun Unimwaane Olsen e kamatoaki ngke e nako ni karaoa ana mwakuri ni mitinare ae bwanin ana tai n te Argentina Resistencia Mition. Imwiina, ngaia ma kainnabana, Julie Dorrington Olsen, a uaia ni beku ngke e tararua Uruguay Montevideo Maeao Mition man 2016 nakon 2019.

Ngaia ma Titita Olsen a mareaki n Nobembwa 20, 1998, n te Salt Lake Tembora. Boni kaaro ae aman natiia.

N te tai are e weteaki iai bwa e na riki bwa te Mataniwi ni Kabuta n te Itingaun, Unimwaane Olsen e beku bwa te Itingaun n te Aono. E a tia naba ni beku bwa te beretitenti n te titeiki, beretitenti n te mition, kauntira ae rietaata, bitiobi, kauntira n te bitiobiriki, ao te kauntira n aia beretitentii Ataeinimwaane.

Unimwaane Olsen e karekea ana tekurii iaon te mass communications man te University mai Utah ao e a tia ni mwakuri ma aekakin nako mwakuri iaon te bitineti. E riki bwa te beretitenti n te aono ibukin Arthur J. Gallagher & Co., te global insurance firm,ni karokoa e weteaki bwa te beretitenti n te mition. N te tai are e weteaki iai nakon te Kaitingaun, e bon mwakuri bwa te kauoman ni beretitenti ngkai e a maan ibukin te bootaki anne.