E Katauraoi Ibuobuoki ao Buoka te Ekaretia

Ni kabuta te aonaaba, Aika Itiaki ni Boong aika Kaitira a rangi ni kakamwakuri n ibuobuoki ibukiia taan birinako mai abaia. I Eurobe, a ibuobuoki ni katauraoi amwarake, kunnikai, aia bwai ataei, auti ni katantan, ao a mwaiti riki ni buokiia ake akea aia bwai. Te Ekaretia e a tibwa tia ni kanakoa US$2 te mirion nakon te United Nations High Commissioner ibukiia Taan birinako mai abaia ao US$2 riki te mirion nakon te World Food Programme. Te angabwai e na buoka katauraoan amwarake n te WFP ibukiia 11,000 aomata ibukin aua namwakaina.

“Iai naba ara membwa n aba nako aika a rootaki,” e taku Titita Sharon Eubank, te Moan Kauntira n te Beretitentii ni Kabuta n te Bootaki n Aine ao te beretitenti n te Charities ibukiia aika Itiaki ni Boong aika Kaitira. Ibukina bwa te Ekaretia e kawakina te mwane n tania, e kona ni katauraoi amwarake ao te ran imwain ae e riki te kangaanga i Ukraine, e taku, n taekinna bwa e kabaeaki te Ekaretia ibukin kainnano aika a maan taia n te aba are e rootaki.

I Paraguay ao Peru, Te Ekaretia e buoka mwanenakin bwain aoraki ibukiia onaoraki, ao i Peru te Ekaretia e karekei iriba, taura, bwain nanon te auti, kaintekateka ake abwabwaki, ao itiua kaombiuta aika raebutaobu nakon te bootaki are e tabeakiniia ataei ao kaara, n te kauntira are e tabeakin aro aika kakaokoro, ao aia auti ataeinnaine. I Colombia, te mwane n aki mamatam e kabongnaaki ibukin karekean 1,200 bwaoki n amwarake ao aia bwai naake a kainnano. I Panama, te Ekaretia e anga bwai ni mwakukri ni buoka kateimatoan iti n totoko ibukin te COVID-19.

Aomata ni kaawa aika bubura aika 10 n te United States a roko n te Light the World Giving Machine n tain te Kiritimati n 2021, n ana buoka are ikotana $5.8 te mirion te US. Mitiin aikai a kona ni buoka te aomata ni karekei bwaai (n aron kunnikai, amwarake, ran aika itiaki, ao irikomaiu) ake a na manga tibwatibwaaki nakon 44 taabo n ibuobuoki n te United States ao bootaki naba n ibuobuoki aika nimaua n te aonaaba.

Te Ekaretia e buokiia naba naake a rootaki n te ukeuke n anti n aaba ake i nuuka nako maeaon te United States, te angibuaka i Biribin, ao koburaken te warekeno ao te tsunami i Tonga.