Nooran Riki Iesu n Maiura

Tariu ao mwaneu, I nanorinano ngkai I tei imatami n te ingabong aei. I reita nanou ma ngkami ni karabwarabwa ngkai ti bootaki, man te tabo are ko mena iai ni kabuta te aonaaba, n ongora rongorongo mairouia burabeti, abotoro, taan mamata, taan karekea te kaotioti, ao taan kairiiri n abanuean te Atua. Ti kona n riki n ai aroia ana botanaomata n ana bong te Uea Beniamina, kanimwii ara auti n riana ma mataroana aika a uki ni kaitara nakoia ana burabeti te Atua iaon te aba,¹ Beretitenti Russell M. Nelson.

E a kaman aki raoiroi au taratara n tai ae rang maan ngkana I kona n uringnga ao ni kainanoa n taainako te ibuobuoki ni karekean taian renti ni kanakoaroa au taratara. Ngkana I kaurei matau ni katoa moaningabong, e taraa n rangi ni mangongao taraan te aonaaba. Bwaai ni kabane aki mataata raoi, kiribeubeu, ao ni kaokoro teia. Ao kainabau ae tangiraki naba kanga ai aron riki te korobanna ae okoro nakon bon teina raoi ae e rangi n tangiraki man karaunano! Kainanou, imwain ae I karaoa te bwai teuana riki ni moa man moanan au bong, bon anaakin matau te kiraati bwa e na buokai ni kamatatai raoi bwai ake a katobibiai ao ni karekea kakukurein te bong are e bati kanoana ngkai a buokai ni kairai i nanon au bong.

I nanon ririki imwiina, I a tia ni kiinaa bwa te bwai ae riki aio e kamataatai kanoan au bong ni katoa bong n onimaki iaon uoua bwaai: te moan, te bwai ni ibuobuoki are e buokai ni kamataata, katurua, ao ni kaota te bwai ae riki i rarikiu; ao te kauoua, kainanoan te bwai ni kairiiri ae rabwata ae na reitinako ni kairai n te kawai ae eti. Karaoan te bwai ae okioki aei, man bebeete e katamneia nakoiu te noonori ae rangi n tamaroa i bukin ara reitaki ma ara tia Kamaiu, Iesu Kristo.

Inanon maiura ti teimatoa ni kaonaki ma titiraki, raraoma, karawawata, ao taai ae nakoraoi ni karaoan bwaai, ana tangira ara tia Kamaiu i bukira n tatabemaniira ao ngkai Natira ni berita ngaira ma Ana reirei ao ana tua naba, a tauraoi bwaai ni ibuobuoki ni katoabong are ti kona n onimaki iai bwa te “ota are e otanako, kaot[ai] matara [ao] kabiri mwaaka ota[ra].”² Ngkai ti ukeuke ibukin ana kakabwaia te Te tamnei ni maiura, ti na kona ni riki, n aron ae reirei iai Iakoba, “bwaai ngkai … ma aika a na roko.”³

Ngkai natin te Atua ni berita ngaira, ti a tia ni kakabwaiaaki n te aro ae okoro ma karekean bwaai ni mwakuri aika a katauaki man kakanoa i bukin kanakoraoan ara taratara n tamnei. Taeka ao ana reirei Iesu Kristo aika a koreaki ni booki aika tabu ao rongorongo mairouia Ana burabeti aika rineaki, ao Tamneina ae karekeaki i nanon te tataro ni katoabong, kakawaran te tembora n taai nako, ao otenanti ni katoa wiiki n te toa e kona ni buokira ni kaoka te rau ao karekean te bwai n tangira ae tau ibukin te motikiraeka are e uota ana ota Kristo ao Otana nakon koonan maiura ao n te aonaaba ae maabubu. Te Tia Kamaiu e kona naba n riki bwa ara kambwati ao ara bwairati ngkai ti toua kawaira i nanon marawan te raoi ao te buaka n te maiu. E kona ni kamataata te kawai ae eti are e na kairiira nakon ara tabo ae akea tokina. Ma ngaia are tera ae iai Irouna i bukira bwa ti na nooria, ao iaa ae Tangiria bwa ti na nako iai?

Ara burabeti ae tangiraki e reirei bwa “ara kantaninga e na matoa iaon te tia Kamaiu ao Ana euangkerio” ao ti riai ni “karaoa ara kabane ni konaa n Taraia n kabane iango.”⁴ E a tia naba ni berita Beretitenti Nelson bwa “akea ae kaoa te Tamnei riki nakon kanakoraoan ara kantaninga iaon Iesu Kristo. … E na kairiko ao n taruaiko inanon maium ngkana ko bairea am tai Ibukina inanon maium—ni katoabong.”⁵ Raoraou, Iesu Kristo bon ngaia raoi bukin ara kantaninga ao nano mwaaka ibukin ara tia. Bwa ti na buokaki ni teimatoa n rokoraoi ao ni waaki n te kawai ae eti, e kaoira te Tia Kamaiu bwa ti na tirobaea maiura irouna bwa to aonga n nora ae bati Irouna ni maiura. I a tia n reiakina riki taekan te kakao ae onoti aei rinanon au kamatebwai n te O Tetemanti.

Ana tua Mote a karekeaki nakoia Iteraera ngkoa bwa te euangkerio ni katauraoi, ae baireaki ni katauraoia aomata ibukin te reitaki n te berita ae rietata riki ma te Atua rinanon Iesu.⁶ Te tua, ae onrake n te kanikinaa ae kairiia taan kakoaua ke onimaki n “kariariaa rokon” ao Ana mwakuri ni kamaiu Iesu Kristo,⁷ e karaoaki bwa buokaia Iteraera ni kantaninga iaon te tia Kamaiu man kammwakuran te onimaki i Irouna, Ana anga karea, ao Ana tua i nanonmaiuia⁸—e bon baireaki bwa e na uotiia nakon te ota ae korakora iroun aia tia Kabooi Maiuia.

N arora n boong aikai, ana aomata te Atua ni boong ake rimoa a kaoaki bwa ana noora maiuia irouna bwa aonga n Noora ae bati Irouna ni maiuia. Ma n ana tai ni karaoa ana mwakuri te tia Kamaiu, tibun Iteraera a kabuaa taraan Iesu Kristo n aroia nako, katinanikua ao ni karinii nakon te tua mwakuri aika aki katauaki ae akea kanikinaean te kairi nakon are bon ti ngaia te buoka nakon kamaiuakiia ao kaboakiia—Iesu Kristo.⁹

Aia aonaaba ni katoabong tibun Iteraera e riki ni mangaongao ao aki kinaaki. Tibun Iteraera, n te aro aei, a kakoaua bwa mwakuri ma waaki ni katerea aron te tua bon kawai nakon kamaiuan temanna ao ni iterana kauarerekean ana tua Mote ni kawenei kainibaire ae baireaki ni kaira maiuia aomata.¹⁰ Ai e kainanoa te tia Kamaiu ni kaoka katuruturuan ao kamataata nakon Ana euangkerio.

Ni kabaneana e korakora mai buakoia Iteraera ake a totokoa Ana rongorongo, ao ni karaoa ae aki tau ni kabuakaaka te tia Kamaiu—Are ngaia e anga te tua ao ni katanoata bwa Ngaia bon “te tua, ao te ota”¹¹—n uruakana. Ma n ana kabwarabwara Iesu i aon te Maunga, marooro iaon ana tua Mote, e katanoata, “Tai taku i nanomi ba I roko ba N na kaki te tua ma burabeti: I aki roko bwa n na kaki, ma I roko ba N na kakoroa bukina.”¹² Imwiina te tia Kamaiu, rinanon ana mwakuri ni kamaiu ae akea tokina, katoka te karaba, tua ake a kateaki, ao waaki ni bobotaki ake a waakinaki irouia Iteraera n te tai arei. Ana kabanea n anga karea e kaira te bitaki man te anga karea ae kabuekaki nakon nanora are ti anga ibukin “ake a uruaki nanoia man raraoma tamneia,”¹³ man te otenanti n anga karea nakon te otenanti n te toa.

Beretitenti M. Russell Ballard, reirei iaon anne, ao e taku, “N taekana raoi, te anga karea e bitaki man te angabwai nakon te tia angabwai.”¹⁴ Ngkana ti uoti ara anganano nakon te tia Kamaiu, ti butimaeaki bwa ti na noora riki Iesu Kristo i nanon maiura, ngkai ti anga nanon Nakoira ma te nanorinano ni kinaa ao n oota n Nanona ae kororaoi nakon nanon te Tama. Ngkana ti katuka ara taratara i aon Iesu Kristo, ti kina ao n oota bwa ti Ngaia te buoka ao te kawai ni karekei kabwaraan bure ao kabooan te maiu, ao karekean naba te maiu ae akea tokina ao te karietataaki.

Ngke I moan riki bwa te iriira te eungakerio, I kaitiboo ma aika a mwaiti ake a tarataraa ao noori ma te mimii bitaki n aroarou, au mwakuri, ao rinerine imwiina ngke I kaina te Ekaretia. A rangi ni kan ataia “bwa bukin tera” n ake a nooria—bukin tera I rineia bwa n na bwabetitoaki ao ni kaaina te bootaki n onimaki, n ana Ekaretia Iesu Kristo ibukiia Aika Itiaki ni Boong aika Kaitira, bukin tera I katoki karaoan waaki tabeua n te bong ae te Tabati, bukin tera I kakaonimaki ni kawakinan Tuan te Mauri, bukin tera I wareka Ana Boki Moomon, bukin tera I kakoauaa ao n anai reirei mairouia burabeti ni boong aikai ao abotoro nakon maiu, bukin tera I kaakaei botaki n taromauri ni katoa wiiki, bukin tera I kaoia tabeman bwa a na “roko ao n nooria, n roko ao n ibuobuoki, … n roko ao n tiku,”¹⁵ ao “n roko ao n riki bwa kaaina ni koaua.”¹⁶

N te tai anne, titiraki akanne a karika te namakin ae korakora ao, kaotan te kokoua, ao n taai tabetai te anga ni kabuakaka. Ma ngke I a kaan n rotaki ao n un ma aia taratara ibukiu aomata, I kunei aia kataunaari bwa, ni koauana, karekean te moan kakao nakoiu bwa n na karina au kiraati n tamnei ni kamataata, kunea raoi, ao ni kamatoaa au koaua nakon waakin te euangkerio ao aroaro. Tera te bwai ni i buobuoki nakon au kakoaua? I bon ti kakoroi nanon “mwakuri ake a karaoaki itinaniku” n akean kariaiakan mwakuri akanne n reitaki ma ana tua te Atua ni “kamatoatoa [au] onimaki iroun Kristo,”¹⁷ ke ni kaotia bwa I oota bwa Iesu kristo bon ti ngaia te buoka ae korakora n au mwakuri ni kakoroi nanon tuua?

Rinanon mwakuri aika a kororaoi n taraa nakon ao i bukin Iesu Kristo n au iango ao mwakuri ni kabane, a kaotaaki matau, ao ni waekoa otau iai n kinaa bwa Iesu Kristo e weteai bwa “n na Nako” ina.¹⁸ Man te moan tai anne n moan ngke I riki bwa te tia iriira Iesu n au bong ni kairake, I kona n uringa te kakao are e karokoaki nakoiu mairouia mitinare n raonia ngke a reireia te euangkerio nakon te kurubu n kairake n ataeinaine ae bon rorou. N te tairiki teuana, ngke ti tekateka ni mwengan temanna te ataeinaine, aia titiraki ae tabekaki raoi bwa bukin tera I kakoaua e riinga nanou, ao n anganai au tai ni kakoaua nakoia ma te oota ae nano n ana taratara te Uea ibukin kaunga nano n tamnei n rikiu bwa te tia iriira Kristo, ao ni karikirakea au kakoaua bwa n na teimatoa ni waaki nako.

I reiakinna n te tai arei, n aron ae I ataia ngkai, bwa ara tia Kamaiu, Iesu Kristo, e kairii waera nakon auti ni bootaki ni katoa wiiki n kana Ana toa, nakon ana auti te Uea ni karaoi berita aika a tabu ma Ngaia, nakon koroboki aika a tabu ao aia reirei burabeti n reiakina Ana taeka. E kairi marooro ake a nako mai wiira n kakoaua i Bukina, baira n buokia ao n beku n Arona ngke e ibuobuoki ao ni beku, matara n noora te aonaaba ao n noorira ni kabane n aron are e Karaoia—“n bon aroia, ao … n aron are ana riki nakoia.”¹⁹ Ao ngkai ti kariaia bwa E na kairiira ni bwaai ni kabane, ti karekea te kakoaua bwa “bwaai ni kabane a kaotia bwa iai te Atua,”²⁰ i bukina bwa ike ti Ukoria iai ti na Kunea²¹—ni katoa te bong ae koraki. Man aei I kakoaua n aran Iesu Kristo ae tabu, amen.