Nanom ni Kabane
Ti riai n riki bwa taan iriira Iesu ae a onrake n te kukurei ao ni kabanei nanora n ara borau ae ana reirei Iesu ngaira.
N taai tabetai, e i buobuoki ataan te bwai ae e na riki.
N raatokin Ana mwakuri Iesu, e tuangiia Ana Abotoro bwa ana roko taai aika a karawawata. Ma E taku naba, “Kam na tarataraingkami ba kam na aki maku.”1 Eng, E na kitaniia, ma E na bon aki kitaniia n ti ngaiia.2 E na kanakomaia Tamneina bwa e na buokiia n ururing, korakora, ao ni kunea te rau. Ekakoroi nanon Ana berita te Tia Kamaiu bwa e na mena i rarikira, Ana reirei, ma ti riai n reitinako n Taraia bwa e na buokira ni kinaa ao ni kimwareirei irarikina.
Ana reirei Iesu a teimatoa ni kaitiboaki ma taai aika a karawawata.
Raraou ae rang n tangiraki irou e karokoa nakoiu te rongorongo ni kawai man te Nebraska Advertiser, a Midwestern United States newspaper, bonginaki Turai 9, 1857. E taku taekana: “N te moaningabong aei te kurubu ni Mormon a mwananga iaon kawaia n nako Salt Lake. Aine (aki rangi ni marurung ni koauaa raoi) a katikitika aia aenikaa n aroia maan, temanna te [aine] e bwaka ni baraaki n te bokaboka ae baereka, are e karika tokin te mwananga teutana, ataei aika a uarereke a nakonako ni karaurau i rarikiia n aia kunikai aika [kunikain] aaba tabeua n taraa n taua n nano n ai aroia tinaia.”3
E korakora irou iangoan temanna te aine ae onrake n te bokaboka. Bukin tera e kokooki n ti ngaia? Tao te tina ae akea buuna? Tera ae karika korakoran nanona, ninikoriana, nanomwaakana ni kaaina te mwaninga ae karuanikai rinanon te baereka, kokokan ana bwai n te kaa ae kookaki nakon te tabo ae na maeka iai ae aki ataaki n te rereua—n taai tabetai a bwai ni ngareaki irouia ake a nooria?4
E taetae Beretitenti Joseph F. Smith iaon korakoran nanoia bwaioniia n aine aikai, ao e taku: “Ko kona ni kabuaa ana koaua ae nene temanna mairouia aine aikai n Ana Ekaretia Iesu Kristo ibukiia Aika Itiaki ni Boong aika Kaitira? Ko kona ni karooi aia iango nakon ae ana mition te Burabeti Iotebwa Timiti? Ko kona ni kamatakiia ma te kakoaua nakon ana mition mai eta Iesu Kristo, natin te Atua? Ko aki, ko bon aki kona n te aonaaba aio ni karaoa anne. Bukin tera? I bukina bwa a tia n ataia. E kaotia nakoia te Atua, ao a ota iai, ao akea te mwaaka n te aonaaba aio ae kona n bitiia man are a tia n ataia bwa bon te koaua raoi.”5
Tariu ao mwaneu, te riki n aroia mwaane ao aine akekei bon te wewete nakoim n ara bong—ana reirei Iesu ake a keniken mwaaka ni kunea te korakora n teimatoa ni kokooki ngkana a weteaki bwa ana nakonako rinanon te rereua, ana reirei Iesu ma kakorakora ake a tia ni kaotaki nakoira iroun te Atua, taan iriira Iesu ake a kimwareirei ma nanoia ni kabane inanon oin mwanangara n riki bwa ana reirei Iesu. Ngkai ngaira ana reirei Iesu Kristo, ti kakoaua ao ti kona n rikirake ni koaua aika a kakawaki aika teniua.
Te Moan, Ti Kona ni Kawakina Ara Berita Aika a Tabu, E Ngae Ngkana E Aki Beebete.
Ngkana am onimaki, am utu, ke am bong aika imwaim a kataki—ngkana ko miakinna bwa bukin tera te maiu ae e rangi ni kangaanga e ngae ngkana ko kabanea am kona ni maiuakina te euangkerio—uringnga bwa e tuangira te Uea bwa ti na kantaningai kangaanga. Kangaanga bon mwakoron te babaire ao tiaki nanona bwa ko a kitanaki; bon mwakorona are e nanonaki bwa bon ngke Natina.6 Ngaia, imwiin bwaai ni kabane, “te aomata ae nananokawaki, ao e ata naba te rawawata.”7
I reiakinna bwa Tamara are i Karawa e nano riki n rikirakeu bwa ana reirei Iesu nakon ae Ngaia bon neu n rau. Tao i aki tangiria n taainako bwa anne arona—ma bon anne!
Te maeka ni mwengaraoi e aki uota te korakora. Te korakora ae ti kainanoia ni kaitaraa kabuebuen ara bong bon korakoran te Uea ao Korakorana e roko rinanon ara berita aika a tabu ma Ngaia.8 N katan irouna n ara onimaki ngkana ti kaitaraaki ni matoan te ang—n kakorakorako raoi ni katoa bong ni karaoa are ti kabaeaki ma te tia Kamaiu bwa ti na karaoia, e ngae ao riki ngkana ti kua, raraoma, ao ni kabo aintoa ma titiraki ni kamangaongao ao bwaai aika a riki—bon karekean Ana ota teutana imwiin teutana, Korakorana, Ana tangira, Tamneina, Ana rau.
Te kaantaninga n touan kawain te berita ae tabu bon kawaran te tia Kamaiu. Ngaia bon te kaantaninga, tiaki rikirakera ae kororaoi. Tiaki te uaia aio, ao ti riai n aki kabotaua mwanangara nakoia tabeman. E ngae ngkana ti bure, E bon mena ikekei.
Te Kauoua, Ti Kona Ni Mwakuri inanon te Onimaki
Ngkai ngaira ana reirei Iesu Kristo, ti ataia bwa te onimaki Irouna e kainanoa te mwakuri—riki n taai aika a kangaanga.9
N ririki aika a bati, a baireia au karo ni manga kawenea kien nanon te auti. Te tairiki imwain rokon kien te auti are e boou, e butiia mwaneu tinara bwa ana kamwaingii bwain nanon te auti ao ni kouti kien nanon te ruu ni matuu bwa e aonga te kie ae boou ni kanimaki. E a kaman matuu, tariu ae Emily, ae 7 ana ririki n te tai anne. Ma, inanon ana tai ni matuu, a karaurau ni kamwaingii kain tekateka ma taibora man ana ruu, ao n katuka te kainiwene, ao imwiina a kouta te kie are e nim ma te timanti. Ma, n aron ae a kakaraoia mwaanem aika a ikawai n taai tabetai, a iangoia bwa ana karaoa te mwakuri ni kewe ke ni kamanga. A kaotinakoi ni kabane ana bwai man te kabwate ni kunikai ao ake n te oo, n bon akea kanoan te ruu. Imwiina a korea te reta ae uarereke ao ni kanimmwa nakon te o: “Nakon Emily ae tangiraki, tia mwaing. Ti na manga koroboki tabeua te bong ma ngkai ao n tuangko bwa ti mena iaa. Tangiriko, am utu.”
N te bong are imwiina ngke e aki roko n te amwarake n te kaingabong Emily, a nako mwaneu akekei ni kakaea—ao e mena ikekei, ti ngaia n nanokawaki i akuun te mataroa are e in. E uringa te bwai ae riki aio rimwii Emily: “I bon rangi ni rotaki n te un. Ma tera ae na tia n riki ngke arona bwa I ti kauka te mataroa? Tera are n na kona n ongo? Tera are n na kona n arokia? I bon kona n ataia bwa I aki tiku n tii ngai. I bon kona n ataia bwa I bon rangi n tangiraki. E bon aki naba roko n au iango bwa na karaoa te bwai teuana i bukin arou arei. I bon ti bwara n nano ao n tiku n te tabo n kunikai n tang. Ao ngke tao I bon ti kauka te mataroa.”10
E karaoa te katautau tariu ae boboto iaon are e nooria, ma tiaki te ururing n aron waakin bwaai ake a tia n riki. E aki ngkanne kakaongora bwa ngaira, n aron Emily, ti kona n taonaki n te nanokawaki ae korakora ke ni maraki ke ni bwara n nano ke raraoma ke ni maroaa ke n un ke ni maraki n nano ao e aki reke iroura bwa ti na karaoa te bwai teuana, n kauka te mataroa, ni mwakuri ma te onimaki iroun Iesu Kristo.
A kaonaki booki aika a tabu ma katooto irouia mwaane ao aine, ana reirei Iesu, are,ngkana a kaitara ma taian kangaanga, a karaoa te mwakuri ae tau—a waaki n te onimaki ao ni mwananga.11
Nakoia reebera ake a kakaea kamaiuaia, e taku Kristo: “Nako kaoti ngkami nakoia ibonga. Ao e koro bukina, bwa, ngke a kume n nakoao a kaitiakaki .”12
A nako bwa ana kaotiia nakoia ibonga n ai aron ae titebo ma a tia ni kamaiuaki, ao i nanon mwakuriana, a tia ni kamaiuaki.
I kan taekinna bwa ngkana iango ni karaoan te mwakuri i nanon am tai n namakina te maraki ae korakora, taiaoka baireia bwa ko na kaongoa temanna ae e na kona ni buokaki—nakon raraom, kaain am utu, te tia kairiiri n te Ekaretia, te tia rabakau n te kangaanga. E kona n riki aio bwa te moan waaki nakon te kaantaninga.
Te kateniua, Ti Kona ni Kaoni Nanora ao ni Kimwareirei n Ara Botaki n Tataro13
Ngkana a roko boong aika a kangaanga ke n karawawata, I keiaki n uringnga bwa I a tia n rineia bwa n na iriira Iesu imwain rokou n te aonaaba ao bwa kangaanga nakon au onimaki, marurungiu, ao teimatoau bon bwaai ni kabane aika a riki ngkai I mena ikai. Ao N na bon riai n aki manga iangoia bwa te kataaki n te bong aei e na karika te nanououa n ana tangira te Atua i bukiu ke n karika te nanououa n Onimakinana. Tiaki nanoa bwa e kabwaka te babaire; bon kanoan te babaire ae nanona bwa karekean te buoka man ukoran te Atua. I riki n ai Arona ngkana I teimatoa ma te tataonakinnano ao, kaantaningaia, n ai Arona, ngkana I bati n rawawata, I kakorakora riki au tataro.14
Iesu Kristo bon te katooto raoi n tangirakin Tamara ma Nanona ni kabane—n karaoan Nanona, n aki taraa kangangana.15 I tangiria n iriira Ana katooto man karaoan are e karaoi.
I kaungaaki iroun te aine are e mate buuna ae anga nanona ni kabane, nanona ae kororaoi n riki bwa ana reirei Iesu are e nnei uoua te rebeta i nanon te nne ni mwane n te tembora. E anga ni kabane ake iai irouna.16
Iesu Kristo e kinaa mwaitin are e anga neiei ngke tabeman a tii noora ae karako. Bon titebo anne nakoira ni kabane. E aki noora kairuara ke aki kororaoira ma te konaa ni kammwakura te onimaki ao n rikirake.
Kabaneana
Raou aika ana reirei Iesu Kristo, ma nanou ni kabane, I rineia n kakaonimaki ao n tei ma te Uea. I rineia n tei ma Ana toro ake a rineaki—Beretitenti Russell M. Nelson ao raona n Abotoro—bwa a taetae i Bukina ao taan tararuaa ana otenanti ao berita aika a tabu ake a kabaeai nakon au tia Kamaiu.
Ngkana I a kan bwaka man karaoan kairua, N na keiaki ni karaoa ae tamaroa riki, n katan n ana akoi ao mwaakan Iesu Kristo. N na kokoaua n au berita ae tabu ma Ngaia ao ni mwakuri rinanon raraoma man kamatebwaian ana taeka te Atua, man te onimaki, ao ma n ana buoka te Tamnei ae Raoiroi, are I onimakina ana kairiiri. N na ukora Tamneina ni katoa bong man karaoan bwaai aika a uarereke man beebete.
Aio bon kawaiu n riki bwa ana reirei Iesu.
Ao ni karokoa te bong are e kamaoaki iai maneka ni katoabong n te maiu aei, N na kakantaninga iroun te Uea ao n Onimakinna—Ana tai, Wanawanana, Ana babaire.17
N na mwakuri korakora ma ngkami, I tangiria n tei ma Ngaia n akea tokina. Nanom ni Kabane Ataakina bwa ngkana ti tangira Iesu Kristo ma nanora ni kabane, E anganira bwaai ni kabane n karaoan anne.18 N aran Iesu Kristo, amen.