Tera te Koaua?
Te Atua bon Ngaia oin koaua ni kabane. Ana Ekaretia Iesu Kristo Ibukiia Aika Itiaki ni Boong aika Kaitira e mwanei ni kawakin koaua ni kabane are e anga te Atua nakoia Natina.
Tariu ao mwaaneu aika a tangiraki, kam rabwa ni kabane ibukin te tetere ae kaunganano aei! N ara kabanea ni maungatabu n Eberi ae nako, ti noori koauan baika a riki n te aonaaba, are a karika te uruakinnano n te anga teuana ao manga te kimwareirei n te itera teuana.
Ti kukurei n taian ribooti ibukin aia maungatabu kairake are a karaoaki ni kabuta te aonaaba.1 N taian maungatabu aikai, a reiakinaki ara kairake aika a rine bwa e ngae ngke tera bwaai aika a riki inanon maiuia, oin korakoria bon tii mairoun te Uea.2
Ti kimwareirei bwa a mwaiti riki tembora ake a kateaki ni kabuta te aonaaba. Ma katabuan tembora n tatabeua nako, e a raka riki mwaakan te Atua nakon te aonaaba ni kakorakoraira ao n mwakuri ni kaitarai ana waaki teuare buakaka.
Te bwainkirinaki bon kaotan ana kairoro teuare buakaka. Bon te bure ae kakaiaki.3 Ngkai te beretitenti n te Ekaretia, I kamatoa ana reirei te Uea Iesu Kristo iaon te waaki aei. N na kamataata raoi n ae e itiaki: aekan nako bwanikirinaia aine, ataei, ke temanna riki e ribaaki iroun te Uea. E nanokawaki ao I nanokawaki ngkana iai temanna ae bwainikirinaki. E tang, ao ti bane n tang ibukin temanna ma temanna are e kammarakaki ni waaki ni bwainikirinaki n aekaia nako. Naake a karaoi aekan mwakuri n iowawa aika a bubuaka aikai aki tii bukintaeka n tuan te aba ma a na bon kaitaraa naba unin te Atua ae Moan te Mwaaka.
Inanon tebwina te ririki n te tai aei, e a tia te Ekaretia ni karababa ana baire n kamanomano—ni kaonotiia—ataei man te bwanikirinaki. A mwaiti buoka n ana webutiate te Ekaretia. I kaoko bwa ko na reiakin.4 Kainibaire aikai a tia ni barongaaki ibukin kamanoia ake aki kairua. I kaumakingkami n tatabemaningkami bwa kam na taratara raoi temanna are aki akonaki ao ni waekoa karaoa ae riai ibukin kamanoiia. Te Tia Kamaiu e bon aki kataua te bwainikirinaki, ao ngkai ngaira Ana reirei, ti aki naba kataua.
Iai riki ana aanga ni kamangaongao teuare buakaka. Mai ibuakoia bon ana kekeiaki ni kamabubui bwaai aika uoua imarenan te koaua ao ae aki koaua. Korakoran mwaitin taian rongorongo ake a kai warekaki, n tiaki ae kantaningaaki, e a karika te kangaanga n ataakin te bwai ae koaua.
N te kakaewenako aei e kauringai te bwai are ti rinanona Ngai ma Titita Nelson ngke ti kawara te aomata ae kakannato n te kaawa ike e karako mwaitia aomata iai ae atia n ongo taekan Iesu Kristo. Te rao ae e a kara aei, e a tia ni bwaka n rangi ni mamaara. E kaongoira bwa n tain wenena n aorakina n te tai ae maan, e aki toki n tataraa te tiiring ao n titiraki, “Tera te koaua?”
A mwaiti iaon te aba n te bong aei “ae a tii kararoaaki man te koaua ibukina bwa a aki ataia bwa a na kunea iaa.”5 Tabeman a tangiria bwa ti na kakoaua ae te koaua e kaeti nakon te bwai ae riki—ao te aomata e na bon baireia ibon irouna bwa tera te koaua. Te koaua anne bon ti te iango nakon te bwai ae a tangiria naake e kairua aia iango n taku bwa a bon aki bukintaeka iroun te Atua.
Tariu ao mwaane aika a tangiraki, Te Atua bon oin te koaua ni kabane. Ana Ekaretia Iesu Kristo Ibukiia Aika Itiaki ni Boong aika Kaitira e mwanei ni kawakin ni kabane koaua are e anga te Atua nakoia Natina, bwa tao e reiakinaki n te tabo n tiaeanti ke man te kaotioti ae bon roko Mairouna.
Man te tabo n taetae aei n te bong aei ao ningabong, ko na reitinako n ongoraa te koaua. Taiaoka korei rongorongo ake a anaa nanom ao ake a roko n am iango ao n tiku inanom. Tataromwaaka butiia te Uea ni kamatoaa bwa baike ko a tia n ongo a koaua.
I tangiri ngkami, tariu ao mwaaneu aika a tangiraki. I tataro bwa te maungatabu aei e na anganiko kanuaan tamneimi ake kam ukoukori. N aran Iesu Kristo ae tabu, amen.