Baika a Raka Aroia n te ka 192 ni Maungatabu ni Kabuta te Kauatai n te Ririki

Te Tembora Tikuea e rang n rau n tain te ka 192 ni Maungatabu ni kabuta te Kauatai n te Ririki. Te karongoaa man te kateitei iaon tano ao te mwakuri ni kamatoa ibukin te mwaiei n te Salt Lake Tembora e toki.

Ma te aekaki n rau ae okoro e kaoni mweengara ao nanora ngkai ti katoka ongoraean beroron te aonaaba ni kakauongo nakoia burabeti aika a maiu ao abotoro.

“Man te tabo n taetae aei n te bong aei ao ningabong, ko na reitinako n ongoraa te koaua,” Beretitenti Russell M. Nelson e reirei ma matana aika tokatoka. “Tataromwaaka butiia te Uea ni kamatoaa bwa baike ko a tia n ongo a koaua.” (taraa iteraniba 29).

Rinanon nako te maungatabu, taan taetae a taekin koaua ake a kakorakorai kakoaua, n raonaki ma karaoan ao kawakinan berita aika a tabu (taraai iteraniba 95 ao 73), karekean kaotioti ake a kaineti nakoim (taraa iteraniba 16), ao n riki bwa ana reirei (taraa iteraniba 77).

“Ngkai ko reitinako ni kakorakora am koaua iroun Iesu Kristo bwa am moanibwai ae te kabanea n rietata,” e taku Beretitenti Nelson, “taratarai kakai bwa ana kaoti inanon maium” (taraa iteraniba 95).

Imwiin banen te maungatabu ni kabuta, te mwakuri iaon te Tembora i Salt Lake e na manga waakinaki riki. Mwakuri ke katauraoi a na waaki naba iaon 125 tembora ni kabuta te aonaaba ake a tia ni katanoataaki ke a waaki karaoakiia. Aio are e raonaki ma 18 riki tembora aika a boou ake e a tia ni katanoatai Beretitenti Nelson n te kabanea n tetere n te maungatabu (taraa iteraniba 121).

“[Te Uea] e karaoi Ana tembora bwa a na kaan riki ibukin kabonganakiia,” e taku Beretitenti Nelson. “E a kabirimwaaka riki birin are e kabonganaaki ni katean taian tembora. E a karaka riki ara konabwai ni buoka ikotakin Iteraera” (taraa iteraniba 121).