Kabanea am iango iaon te Tembora

Mauri tariu ao mwaneu, n tain tetere aika nimaua aika tamaroa n te maungatabu ni kabuta, ti a tia ni manga namakinna bwa a kaukaki karawa! I tataro bwa kam a tia n rawei bwaai ake kam riingaki iai ao n irii nanoia. Tamara arei i Karawa ao Natina ae tangiraki, Iesu Kristo, a tei n tatauraoi ni buokiko. I kaungai ngkami bwa kam na karikirakei ami mwakuri n ukoukora Aia ibuobuoki.

N te tai ae aki maan nako, e reke ara tai ngai ma Titita Nelson ni mataku n mwakoro 4 ae boou n taian Witeo man Ana Boki Moomon ae reireitaki.¹ A rang kaungaaki nanora iai! N na kaota teutana man te tamnei are e kaota kaotin te Tia Kamaiu nakoia Nibwaite.

E rang kakaawaki bwa te Tia Kamaiu e rineia bwa e na kaoti nakoia aomata n te tembora. Bon Ana auti. E kaonaki ni mwaakana. Tina aki kabuai noorakin bwaai ake e karaoia te Uea ibukira. E a karaoi riki ana tembora bwa ana kona ni kabonganaaki. E a kabaiti riki katiaan ana tembora bwa a na kateaki. E karikirakei riki ara kona ni buoka ikotakiia Iteraera. E a kabebetea riki nakoira bwa tina kona ni kaitiakaki n te maiu n tamnei. I berita bwa kamwaitan riki te tai n te tembora e na kakabwaia maiumi n aro ake bon akea ae e kona.

N te tai aei iai 168 tembora aika mwakuri ao 53 tembora aika boou aika a kateaki, ao 54 riki aika iaon kawaia ni kateaki ma teia ngkana a tei!² I kukurei ni katanoata ara baire ni katei tembora aika a boou ni katoai taabo aikai: Busan, Korea; Naga, Philippines; Santiago, Philippines; Eket, Nigeria; Chiclayo, Peru; Buenos Aires City Center, Argentina; Londrina, Brazil; Ribeirão Prêto, Brazil; Huehuetenango, Guatemala; Jacksonville, Florida; Grand Rapids, Michigan; Prosper, Texas; Lone Mountain, Nevada; ao Tacoma, Washington.

Ti baireia naba bwa tina katei tembora aika a mwaiti n aonon te metropotitan are te tai ni mwamwananga nakon tembora bon te kangaanga iai. Ai ngaia are, I kukurei ni katanoatai tabo riki ake a uakaan ma kaawan Mexico are a na kateaki iai tembora aika a boou i Cuernavaca, Pachuca, Toluca, ao Tula.

Tariu ao mwaneu aika tangiraki, kam bia kabotoi riki ami iango iaon te Tembora n aro ake kam tuai ni karekea mai imwaina. I kakabwaiai ngkami bwa kam na rikirake ni kaniiaki riki nakon te Atua ao Iesu Kristo ni katoa bong. I tangiri ngkami. E na raoni ngkami te Atua ni karokoa manga kaitibora, I tataro n aran Iesu Kristo ae tabu, amen.