2022
Tabekaki Nako Aon te Kaibangaki
Okitobwa 2022

Tabekaki Nako Aon te Kaibangaki

Iroun Unimwaane Jeffrey R. Holland

Man te Kooram n Abotoro n te Tengaun ma Uoman

Ngkana ko na iriira Iesu Kristo, ko na riai n taai taetai ni uouota te rawawata ao n nakon te tabo ae ko na anga nanom iai ao n rinaon te maraki ae kantaningaaki.

N ririki aika nako, imwiin te marooro irouia ataein te reirei ake a bane aia tai n rongorongon te aro iaon Amerika, ao e titirakinai temanna raou n reirei, “Bukin tera aki kabongana te kaibangaki are a kabonganaa aaro ni Kiritian ake tabeua bwa kainikinaean aia onimaki Aika a Itiaki ni Boong aika Kaitira?”

Ma ibukina bwa angiin titiraki iaon te kaibangaki bon kan ataakin nanora ibukin Kristo, I waekoa n tuangnga ae Ana Ekaretia Iesu Kristo ibukiia Aika Itiaki ni Boong aika Kaitira e rangi n taraa riki ana mwakuri ni kamaiu Iesu Kristo bwa oin raoi te koaua, aan raoi te rongorongo, te moan reirei, ao kaotan ana tangira ni koaua te Atua inanon ana babaire ni kamaiu ibukiia Natina.1 I kabwarabwara ae bongana ana mwakuri n tangira are karaoia ibukiia kaain aonaaba ni kabaneia e moa man ana tai Atam ao Ewa nakon tokin te aonaaba.2 I taekina ana taeka te Burabeti Iotebwa Timiti, are e taku, “Bwaai ni kabane … ake a kaineti nakon ara aro bon ti kaineti” nakon Ana mwakuri ni Kamaiu Iesu Kristo.3

Imwiina I wareka nakoina te bwai ae e koroia Nibwaai 600 te ririki imwain bungiakin Iesu: “Ao … e taetae te anera nakoiu … , ni kangai: Nooria! Ao I taraia ao I a noora Ana Tiibu te Teei te Atua, … [Are] e tabekaki rake aon te kaibangaki ao n tiringaki ibukin buren te aonaba.”4

Ma au “tangira, tibwatibwa, ao kakao” ma te ingainga ngkai ni kan tibwa te euangkerio, I teimatoa ni wareware! Nakoia Nibwaite n te Aonaaba ae Boou e taku te Kristo ae mangauti, “Ao e kanakomaiai Tamau bwa I aonga n tabekaki rake iaon te kaibangaki; … N na burimaunia aomata nakoiu, … ao aio bukin ae I tabekaki rake iai.”5

N nang taekina ana taeka te Abotoro Bauro ngke I kunei matan raoraou bwa e a moanna ni karekea tarakiu. Waekoan tarakin ana tainibai e kaotia bwa iai te tabo ae e na nako iai—te tabo teuana—ao e kabaitiia n taonnako nakon tabena are e a tibwa karioa. Ao ikanne are e a toki iai ara marooro.

N te ingabong aei, 50 tabun te ririki iimwiina, ao e korakora nanou ni kan taekina kabanean au kabwarabwara arei—e ngae ngkana iai mai ibuakomii, ae manga bakaea naba tataraakin ana tai ni bai. Ngkai I a moana au kabwarabwara bwa ibukin tera ngkai tiaki kabonganaa tamnein te kaibangaki, ao iai nanou ae bati ni kaota ara karinerine ma ara kamoamoa nakoia ake iai aia onimaki iai ao ni kabanea maiuia nako iai.

Teuana bukina ae tiaki anaa tamnein te kaibangaki e moan kaotaki inanon rongorongo ake a koreaki inanon te bwaibwara. Ibukina bwa taurakin temanna iaon te kaibangaki bon teuana ana aanga n motikitaeka te Tautaeka n Rom ae rangi ni kammaraki, a mwaiti taan iriira Iesu ake aki kan taekina te waaki n tiriaomata iaon te kaibangaki. Maten Kristo e rangi ni moanibwai inanon aia onimaki, ma 300 te ririki imwiina ao a manga karaoi aanga aika boou bwa kanikinaean aia euangkerio.6

Inanon te kaaua ao te kanimaua n tienture, e kabonganaaki te kaibangakai bwa kanikinaean te bootaki ni Kiritian ni kabutaa, ma ngaira bon tiaki kaain te “botaki ni Kiritian ni kabutaa.” Bon tiaki ngaira Katorika ke Boretetanti, ma ngaira, bon te ekaretia are kaokaki, te Ekaretia n te Nu-Tetemanti are e a manga tibwa kaokaki. Ao, moan reken te mwaaka ao te kariaiakaki iroura e taekinaki imwaain aia tai kauntira, bootakin aro, ma taai ake a kabonganaaki iai kanikinaa.7 N otara aei, ao kakeaan te kaibanganaki iroura are e a bon tibwa kabonganaaki riki imwiina bon ti kaotan ae ana Ekaretia Iesu Kristo Ibukiia aika Itiaki ni Boong aika Kaitira bon manga kaokan aia waaki Kiritian ni koaua.

Bukina naba teuana ngkai tiaki kabongana tamnein te kaibangaki bon ibukin kakawakin teuana mai buakon kamiimi ake e karaoi Kristo inanon ana mition—Manga utina ae mimitong ao marakina ma matena n anganano ibukira. Ngkana ti karaua raoi n taraa ana mwakuri aikai, ao I kona n taekin uoua koro banna8 ake a kaotaki iakuuia kaain Te Moan Beretitenti ao te Kooram n Abotoro ake te Tengaun ma Uoman inanon boowi ibukin te tembora are kakaraoaki ni katoa Kaabong n te Salt Lake City. Tamnei aikai a tei bwa bwaai ni kauring nakoira mwaitira are e a tia n anga ao te tokanikai are e reke Irouna ake ngaira aika Ana toro.

Tamnei
Te Tauraki n te Kaibangaki, iroun Harry Anderson
Tamnei
Te Mangauti, iroun Harry Anderson

Teuana te tamnei ae rangi n taabangaki are kaota iai uoua mwakoron ana tokanikai Kristo bon arora ni kabongana te tamnei a euarereke manThorvaldsen are kaota manga utin Kristo ma tokanikaina ae mimitong man te rua ni mate ma Ikoakina imwiin Taurakina iaon te kaibangaki ake a kona n nooraki.9

Tamnei
Ana kanikina te Ekaretia

Kabaneana, ti kuringiira anareirei Beretitenti Gordon B. Hinckley ngke e kangai, “A riai maiuia ara aomata n [riki] … ba te kanikina n ara [onimaki].”10 Iango aikai—riki aika imwiina—e uotia nakoiu te bwai ae te kabanea ni kakawaki mai ibuakon kiibu n booki aika tabu nakon te kaibangaki. Bon akea irekerekena ma bwaai ibukin katamaroaan te rabwata ke te tirewa, ma tenaan taua ke boua ni kanikinaa. Ma e na riai n iai irekerekena ma, aron te koaua ae matoa kaanga te bwaa ao korakorara ni karaoa te koaua are a na uotia Kiritian ni kabane nakon te mwioko are e a tia n anga Iesu nakoia Ana reirei. N aba ao rooro nako, E a tia n tuangiira ni bane, “Ngkana iai te mwaane [ke te aine] ane e kan ri rimwiu ao ke e kaakea n taona nanona, ao ke e tabeka ana kaibangaki, ao e irirai.”11

E nanonaki ikai te kaibangaki are ti amoia iaora ma tiaki ake ti bwainii iaora. N riki bwa te tia iriira Iesu Kristo, kona riai n uouota te rawawata n tabetai—rawawatam ke tao temanna—ao n nakon te tabo are ko kona n anga nanom iai ao rinanon te maraki ae kantaningaaki. E aki kona te Kiritian ni koaua n iriira ana Mwatita ti inanon babaire ake e kariaia bwa e na karaoi. Bon tiaki. Ti Iriiria n taabo ni kabane, ngkana e riai, nakon taabo ni bo kakano ake uotaia te tang ao te rawawata, ao n tabetai ao ti kona n tei n akea raora.

I ataia aomata, ake kaain ao tiaki kaain te Ekareteia, ake a teimatoa n iriira Kristo ma te kakaonimaki. I ataia ataei ake iai toaraan rabwataia, ao I ataia kaaro ake a teimatoa n tararuaiia. N tabetai ao I noriia ni kabane ni mwakuri ni karokoa banen te bong ao e a taoniia te kua, ni kakaea korakoraia, ma kamanoaia, ao te kukurei are bon akea ni kan kaoti. I kinaiia ikawai aika mwaiti aika a tuai iein ake a ingainga ao n tauraoi ibukin reken toaia ae e na tangiriia, ma aia mare ae rangi n tikiraoi, ao mwengaia ae kaonaki irouia natiia. Bon akea riki te aekaki n iango anne ae rangi ni tamaroa, ao imwiin ririki ake imwiina ao bon akea toaia ke aia utu ae reke. I kinaia tabeman ake a teimatoa n inimaki ma aorakin aia iango aika bati, ake a teimatoa n tataro ibukin buokaia ao n ingainga ibukin manga reken te aba ni berita are a kaman uaiakinna. I kinaiia tabeman ake a maeka ma te kainnano ae korakora, ma te bwara n nano, ao ni bubuti ibukin te tai riki teuana are a kona ni manga anangaki bwa ana katamaroai maiuiia ibukiia ake a tangiriia ma ake a katan iaaia. I kinaia ake a inimaki ma kangaanga ake a irekereke ma aron rikiia n aine ao ni mwaane. A bwaro ranin matau ibukiia, ao I nanoangaiia, bwa I ataia bwa aekakira tein uaan aia babaire ake a tia n rinei.

Aikai bon tii tabeua mai buakon bwaai aika bati ake ti kaitarai inanon maiura, kauringa ae bon iai boon te riki bwa ana reirei Iesu. Nakon Arauna, are e kataia n anganna te kao ma taian aia ae akea booia ibukin ana anga karea, te Uea Tawita e taku, “Tiaki; ma N na boni kabo moa mai roum ni bon boia: … [bwa n] na [aki] angan … Iehova ae Atuau … aika e aki nako au bwai iai ni kabo.”12 Ngaia are aio naba ae ti na taekinna.

Ngkana ti tabeki rake ara kaibangaki ao n Iria, ao e na bon rangi ni kananokawaki ngkana tinebun te rawawata are ti uotia iaora e aki anganiira norakin riki te rawawata are irouia ake tabeman. Teuana mai ibuakon rongorongon te Tauraki n te kaibangaki ae rangi ni korakora aron iangoana bon aron ara Tia Kamaiu ngke e taakin baina ao a neeranaki, n akea iangoana irouna ma e a kaota raoi nanona nakoia mwaane, aine, ma ataei ni kabane ake n te utu n aomata bwa aki tii butimwaeaki ma a kaoaki nakon Ana tangira ni kamaiu, are moan te rietata.13

N aron te Mangauti ae mimitong are e rimwiin te kammarakin te Tauraki iaon te kaibangaki, ai bon aron naba bwaron kakabwaia nakoia ake a kariaia, n aron are taekinna te burabeti ae Iakobwa n Ana Boki Moomon, “ni kakoaua Kristo, ao n iangoa matena, ao n namakina rawawatan ana kaibangaki.” Tabetai ao kakabwaia aikai a kona ni moantaai n roko ao n tabetai a kona n roko rimwii, ma tokin kawaira inanon uotan te kawai ae kangaanga14 bon te berita mai irouna Ngaia are bon te Mwaatita are a karaoia ao a na bon roko. Bwa ti aonga ni karekei kakabwaia aikanne, ke ti Iria—n aki bwaka, n tatauraoi n tainako, n aki nanououa ke ni birinako, n rawa ngkana nakon tibwanga, tiaki ngkana a rawawata ara kaibangaki ao tiaki ngkana, n te tai, e na moanna n roo te kawai. I anga au kakakaitau ibukin korakoram, am karinerine, ao am tangira. N te bong aei ao I kaota au koaua Ibukina are e “tabekaki rake”15 ao ibukin kakabaia aika akea tokiia ake E anganiia naake a “tabekaki rake” ma Ngaia, riki ma te Uea Iesu Kristo, amen.

Bwaai aika a na taraaki

  1. Jeffrey R. Holland, Encyclopedia of Mormonism (1992), “Ana Mwakuri ni Kamaiu Iesu Kristo,” 1:83.

  2. Amureki e taekinna bwa Ana Mwakuri ni Kamaiu Kristo bon “te kabanea n anga karea ae kakannato” ao n “akea tiana” ao akea tokina (Aramwa 34:10) Bukina bwa “a bane ni bwaka ao a bua, ao a na bane ni mate ma ti ngkana a rinanon te mwakuri ni kamaiu” (Aramwa 34:9; tarai naba kiibu 8–12). E reitia Beretitenti John Taylor: “N aron teina ae kuri kaanganga otara iai ma aron kabwarabwaraana, [Iesu] e uota iaona rawawatan buren te aonaaba; tiaki ti nakon Atam, ma nakoia naba ana kariki; ao ni karaoan anne, e kauka abanuean karawa, tiaki ti nakoia taan onimaki ao naake a karinea ana tua te Atua, ma nakoia e raka iaon teuana ma teiterana utu n aomata ake a mate imwain ae a roko n roroia n ikawai, n raonaki naba ma [naake] a, tia ni mate n akea ataakin te tua, ana, rinanon Ana Iango ibukiia, bwa ana manga uti n akea te tua, ao ni motikaki taeka m akea te tua, ngaia ae a iri … inanon kakabwaia man Ana mwakuri ni kamaiu” (An Examination into and an Elucidation of the Great Principle of the Mediation and Atonement of Our Lord and Savior Iesu Kristo [1892], 148–49; Teachings of Presidents of the Church: John Taylor [2001], 52–53).

  3. Aia Reirei Beretitenti n te Ekaretia: Iotebwa Timiti (2007), 49.

  4. 1 Nibwaai 11:32–33.

  5. 3 Nibwaai 27:14–15.

  6. Ni bon arona, ao bon iai taekan te kaibangaki n ana reirei Bauro (taraa, te katooto, 1 I-Korinto 1:17–18; I-Karatia 6:14; I-Biribi 3:18). ma aikai a taetae nakon te bwai ae korakora riki nakon biim kaai aika uoua n uaia n neranaki ke kanikina aika uarereke riki. Ngaia ae ngke e taekina taekan te kaibangaki Bauro, e kabongana te taetae ni kauarereke iaon mimitongin te Mwakuri ni kamaiu, te tabo ni kamataku are a tauraoi iai Aika Itiaki ni Boong aika Kaitira n raonna ao n taekinna.

  7. Aekaki n aomata n taai akekei ao aekakin kateia ni Kiritian n aron ana reitaki Martin Luther ae Andreas Karlstadt (1486–1541) a kauntaeka inanon rabanen te Middle Ages (Nnuuka n Roro) bwa “te kaibangaki [bon irouna] e kaota ti karawawatakin Kristo n rabwata ao n aki kaota Mangautina ao [mwaakana] ni kamaiu” (in John Hilton III, N iangoan te Kaibangaki: E Kanga Calvary (Te Tabanou) n Reitiira ma Kristo [2021], 17).

  8. Harry Anderson, The Crucifixion; Harry Anderson, Mary and the Resurrected Lord.

  9. Taraa Russell M. Nelson, “Kaukakin Karawa ibukin te Buoka,” Liahona, Meei 2020, 72–74.

  10. Gordon B. Hinckley, “The Symbol of Christ,” Ensign, Meei 1975, 92.

  11. Mataio 16:24.

  12. 2 Tamuera 24:24.

  13. “E arora baina nakoia aomata ni kabane ake a rairinanoia ma ni kakoaua arana” (Aramwa 19:36; taraa naba 2 Nibwaai 26:33; Aramwa 5:33).

  14. Via dolorosa bon te taeka n Ratine nanona “te kawai ae kangaanga, kawai n nakonako, ke karinan n atatai” (Merriam-Webster.com Dictionary, “via dolorosa”). E rang n irekereke riki ma mwaingingin Iesu man Kabuakakakina ni bain Birato nakon Taurakina n te tabo ae te Tabanou.

  15. Taraa 3 Nibwaai 27:14–15.