Bwa Aonga n Ataiko

Tabeua te ririki n nako, e reke te taneiai ae bita maiu n tain te bootaki n toa n ara uoote i Arizona. Ngke e taekinaki n tataron te toa kukureira ni “katoka [iaora] aran [Iesu Kristo],”¹ e kauringai te Tamnei ae Raoiroi bwa Iesu iai arana ae mwaiti. E roko ngkanne te titiraki inanou: “Enga iai aran Iesu ae I riai ni katoka iaou n te wiiki aei?”

Teniua aran Iesu aika a roko n au iango, ao I korei. Aara nikateniua aikai iai inanona anuan maiun Kristo ae I tangiria ni karikirakea n ae bwanin. N te wiiki are imwiina, I kabotoa au iango iaon aara ake teniua akanne ao ni kataia n anai aekan anuaao aroaro akanne ake a irekereke ma aara akekei. Man te tai anne, I reitinako n tititirakinai irou te titiraki aio bwa mwakoron au nebonebo: “Enga iai aran Iesu ae I riai ni katoka iaou n te wiiki aei?” Kaekaan te titiraki anne ao kataakin karikirakean te anua ni maiu are e irekereke ma anuan Kristo e a tia ni kakabwaiaa maiu.

N Ana Tataro ae korakora Ibukira, e katuruturua kakawakin te koaua aio Iesu: “Ao aio te maiu are aki toki, te ataiko ae te Atua ae ti temanna ae koaua, ao Iesu Kristo, ae Ko kanakomaia.”² N te bong aei I tangiria n tibwauaia ma ngkami te kakabwaia ao te mwaaka ae roko man ataakin Iesu Kristo n Arana aika mwaiti.

Te kawai ae bebete n ataan temanna bon man ataakin arana. E taekinaki bwa “aran temanna i bon iroun te aomata anne bon te kabanea ni karewe ao ni kakawaki n taetae nako.”³ Ko a tia n rinanon te taneiai ae ko wetea temanna ao e bure arana ke ko mwaninga araia? Kainnabau, Alexis, ao Ngai , n taai tabetai, ti wewetea temanna natira bwa “Lola.” Kananokawakina, n aron ae ko ketinna, Lola bon ara kamea! N aki ataia bwa e tikiraoi ke e buakaka, mwaningam aran temanna e kaotia nakon te aomata anne bwa tao ko aki kinaa raoi.

Iesu e kinaia ao ni weteia aomata n araia. Nakon Iteraera rimoa, e taku te Uea, “Tai maaku: ba I kamaiuko ni kaboko, I weweteiko n aram; bon au aomata ngkoe.”⁴ Ni moaningabongin te Itita, ana kakoaua Maria n noran te Kristo ae mangauti e kamatoaaki ngke Iesu e weteia n arana.⁵ Ai arona naba, te Atua e wetea Iotebwa Timiti n arana ni kaekaan ana tataro n onimaki.⁶

N taai tabetai, Iesu e anganiia Ana abotoro araia aika boou are e kaota aroia raoi, aia atatai, ao aia konabwai. Iehova e angan Iakobwa te ara ae boou ae Iteraera, are nanona, “E angan te Atua bwa e na bweena maiuna aomata ae totokanikai iroun te Atua” ke “katokanikaia te Atua.”⁷ Iesu e angan Iakobo ao Ioane te ara ae Boanereke, are nanona “natin te ba-ni-karawa.”⁸ Noran aron ana kairiiri nakon taai aika a na roko, Iesu e angan Timon te ara ae Keba ke Betero, ae nanona te bwaa.⁹

N aekan ae Iesu e kinaira n arara n tatabemaniira, teuana te kawai ae ti kona n roko n ataa raoi Iesu bon man reiakinan Arana aika mwaiti. N aron aran Iteraera ao Betero, aran Iesu aika mwaiti bon aara ae e kinaaki iai are e buokiira ni mataata iaon Ana mition, kantaninga, aroarona, ao anuana. Ngkai ti a moanna n atai aran Iesu aika mwaiti, ti na roko n ataakin raoi Ana mition ae mai iroun te Atua ao aroarona ae e aki ti iangoia. Atakin Arana aika mwaiti e na anganiira naba kairara bwa ti na riki n ai Arona—ni karikirakea anuan maiun Kristo are e uota te kimwareirei ao te kantaninga nakon maiura.

Tabeua te ririki n nako, Beretitenti Russell M. Nelson e kamatebwaia ni kabane koroboki aika tabu iaon Iesu Kristo n te Topical Guide.¹⁰ Imwiina E kaoia kairake ni ikawai ni kamatebwaii koroboki aika tabu naba. Ni kaineti ma aran Iesu aika mwaiti, Beretitenti Nelson e taku, “Kamatebwaia ni kabane bwa antai Iesu Kristo man te tataromwaaka ao ni iburoki n ukora mataatam bwa tera nanon aara ake a katokaaki Iaona nakoim i bon ibukim.”¹¹

Imwiin ana kakao Beretitenti Nelson, I a moana karaoan karinanin aran Iesu ake a mwaiti. Aara ake I karinanii ai nakon ngkai 300 aara, ao I ataia bwa a mwaiti riki ae I tuai ni karekei.

Ngkai iai tabeua aran Iesu aika a bon onoti tii Ibukina,¹² I tangiria n tibwauai nimaua aara ao nakoana ake e kinaaki iai akea a rekereke ma ngaira. I kaoi ngkami bwa kam na korei karinanin oin ami ara ngkai kam a moanna ni kinaa Iesu n Arana aika mwaiti. Ni karaoakin aei, ko na kunea bwa a mwaiti riki aara tabeua—ae a irekereke ma anuan maiun Kristo—ake ko na tangirii ni katokai iaom bwaana reirei ni berita Iesu.¹³

Te moan, Iesu bon te Tia Kawakin Tiibu ae Tamaroa.¹⁴ Ngkai boni ngaia, Iesu e kinaia Ana tiibu,¹⁵ “e weteiia ni araia,”¹⁶ ao, ngkai ana tibu te teei te AtuaE anga maiuna ibukiia Ana Tiibu.¹⁷ N tii te arona, e tangiriira Iesu bwa ti na riki bwa taan kawakin tiibu aika tamaroa, riki nakoia ara utu ao n riki bwatari ao titita ni ibuobuoki. Teuana te kawai ae ti kaota ara tangira ibukin Iesu bon man kamwarakeaia Ana tiibu.¹⁸ Ibukiia tiibu ake tao a boonako, taan kawakin tiibu aika tamaroa a nako nanon te rereua ni kakaia tiibu ao n raoniia ni karokoa a oki ao ni kamanoaki.¹⁹ Ngkai taan kawakin tiibu aika a tamaroa, ao ngkana e kona ni karaoaki n am tabo, ti riai n ukoria ni kabanea te tai ni buokiia aomata ni mweengaia. N ara mwakuri ni ibuobuoki, te tekiti ao bwaai n rabakau aika boou a riai ni kabonganaaki nikatoamaua, n aki onea mwiin, kawarakiia.²⁰

Te kauoua, Iesu bon Mataniwiia Ibonga Ibukin Bwaai aika Raraoi aika Nang Roko.²¹ N ataakina bwa e a kaan roko kamwaneakina, e taku Iesu: “I atongi baikai nakoimi, bwa kam na karekea te rau. Ami bwai i aon te aba te rawawata: ma kam na kabebetei nanomi; I a tia ni kataea ana kai te aba.”²² N te bong aei, ngkai ara aonaaba e a korakora te kakaitara ni iango ao te kakaokoroaki, iai kainanoara ae korakora bwa ti na taetaekina ao ni kaotii aroaroa aika raraoi, kariaan baika a tamaroa n riki, ao te kaantaninga. N aki mutiakin kakaewenakoakira ake mai imwaaina, te onimaki e aki toki ni uotiira nakon taai aika a na roko,²³ ae onrake n te kaantaninga, ni karikiira bwa ti na kakoroa nanon ana kakao Iesu ae e na kabebeteaki nanora.²⁴ Te kukurei ni maiuakina te euangkerio e buokiira n riki bwa taan iriira Iesu ni bwaai aika a tamaroa aika a na riki.

Teuana riki aran Iesu ae e kinaaki iai bon Titebo Ngaia, Ngkoananoa, n te Bong aei, ao n Aki Toki.²⁵ Te Teimatoa bon anuan maiun Kristo. Iesu e aki toki ni karaoa nanon Tamana,²⁶ ao Baina e teimatoa n takinaki ni kamaiu, ibuobuoki, ao ni kamarurungiira.²⁷ Ngkai ti a moana n teimatoa ni maiuakina te euangkerio, ti na kona n riki n aiaron Iesu.²⁸ E ngae ngkai te aonaaba e na rinanon te bitaki ni baika a moanibwai ao aomata a katiotioaki ma ni kakamwaeieiaki nako n te angi nako ae te reirei nako,²⁹ te teimatoa ni maiuakinan te euangkerio e buokiira n nanomatoa ao n aki kamwaingaki n tain buakan te maiu.³⁰ Ti kona naba ni kaota teimatoara man butimwaeakin ana kakao Beretitenti Nelson ni “karekea ara tai ibukin te Uea.”³¹ Korakoran te maiu n tamnei e roko man bwaai aika a uarereke man bebete³² n aron karikirakean “aroarora ao baika ti kakaraoi aika tabu”³³ n tataro ni katoabong, rairannano, kamatebwaian koroboki aika tabu, ao buokaiatabeman.

Te kaaua, Iesu bon Atuan Iteraera ae Tabu.³⁴ Maiun Iesu bon te baeten n te maiu ae tabu. Ngkai ti iriira Iesu, ti kona n riki bwa temanna ae tabu i Iteraera.³⁵ Ti rikirake ni maiura ae tabu ngkana ti nanakon te tembora, are e koreaki n te mataroa n rin “E tabu bwa Ana bwai Iehova”. Ni katoa tai ae ti nebonebo n te tembora, ti otinako ma kabwaiara ae korakora ni karika mweengara bwa te tabo ae tabu.³⁶ Nakoia ake akea ngkai aia kariaia n rin n tembora aika tabu, I kaoko bwa ko na kawara am bitiobi ao ni katauraoiko n rin ke n oki nakon te tabo ae tabu anne. Kabanean te tai n te tembora e na karikirakea te tabu inanon maiura.

Teuana te kabanea n ara iaon Iesu bon Kakaonimaki ao Koaua.³⁷ Ngkai Iesu e rangi ni kakaonimaki ao ni kokoaua n taainako, Nanona e korakora ibukin tangirakira bwa tina kaotii aroaro aikai inanon maiura. Ngkana a memere ara koaua, ti kona n tang nakon Iesu, “Te Uea, kamaiuai,” n aron Betero ngke e a moanna ni inako ni buakan naman Kariraia.³⁸ N te bong anne, Iesu e kanakoa baina ni kamaiua te reirei are e inako. E a tia ni karaoa naba anne nakoiu, ao E na karaoa naba aio ibukim. Tai kitana Iesu—E bon aki kona ni kitaniko!

Ngkana ti kakaonimaki ao ni kokoaua, ti iriira ana wewete Iesu n “Tiku irou,” are e kona naba n nanonaki ni “maeka ma ngai.”³⁹ Ngkana ti a kaitaraaki ma titiraki, ngkana ti kaenaenaaki ibukin ara onimaki, ngkana baai ni bwainingare a koteira mai irouia naake n te kateitei ae bubura n te aonaaba, ti teimatoa ni kakaonimaki ao n tiku ni kokoaua. N taai aikai, ti uringa Ana bubuti Iesu, “Tanimai nakoiu n ami iango n taai nako; tai nanououa, tai maaku.”⁴⁰ Ngkai ti karaoia, E anganiira te onimaki ae ti kainanoia, te kaantaninga, ao te korakora n tiku Irouna n aki toki.⁴¹

Tariu ao mwaaneu aika kam tangiraki, ae tangiria Iesu bon Ataakina ibukina bwa Ngaia bon tii te ara iaan karawa ae ti kona ni kamaiuaki iai.⁴² Iesu bon te kawai, te koaua, ao te maiu—akea ane nako n te Tama, bwa ti Irouna.⁴³ Iesu bon tii te kawai! Ao man bukina akanne, e kaoira Iesu, “Nakomai nakoiu,”⁴⁴ “Iriirai,”⁴⁵ “Nakonako ma ngai,”⁴⁶ ao “Reirei irou.”⁴⁷

Ma nanou ni kabane, I kaota au kakoaua iaon Iesu Kristo—bwa E maiu, E tangiriko, ao E kinako n aram. Bon Ngaia Natin te Atua,⁴⁸ ana Riki Temanna te Tama,⁴⁹ Bon Ngaia ara Bwa, Oora, Otangara, ara tabo ni Katantan, ao te Tia Kainaomataira.⁵⁰ Boni Ngaia te Ota ae Otanako n te Roo.⁵¹ Bon ara Tia Kamaiu⁵² ao te Tia Kabooi Maiura.⁵³ Boni Ngai te Mangauti ao te Maiu.⁵⁴ Nanou ae korakora bwa kam na nakomai ni kinaa Iesu n Arana aika mwaiti ao kam na riki n Aiarona ngkai ko kaota Anuana inanon maium. N aran Iesu Kristo, amen.