Karikirakean ao Tataekinan Am Koaua

Taai ni bitaki inanon maium a katoatai n roko n te tai ae aki kantaningaaki, inanon naba am tai ni kairake. Kariaia bwa n na tibwa te karaki iaon ataein te kauarinan, Kevin, ae e rineaki ni mwananga nako tinanikun ana kawa ibukin aia botaki ataei aika taan kairiiri, are e bon karakinna.

“E a roko au tai, ao te kiraaka are e tararua n tain te kabae ara e titirakinai arau. E taraa ana ara are irouna ao e taku, ‘Bon ngkoe te teinimwaane are mai Utah.’

“‘Ko nanonna ae bon ti ngai?’ I titiraki.

“‘Ngaia anne, ti ngkoe.’ E anganai te taeki ae arau iaona ma “Utah” ae mwakoro iaan arau. Ngke I kanimwa iaou, I namakinna ae I kaokoroaki.

“I rin ni kaibetutu inanon ana ereweita te outeero ma niman riki ataein te kauarinan ma aia taeki n araia n ai arou. “Ei, ngkoe mai Utah. Ngkoe kaain te Moomon?’ e titiraki temanna ataein te reirei.

“I namakinna ae akea nneu irarikiia ataei aika taan kairiiri man taabo nako n te aba. ‘Eng,’ I waeremwe ni kaeka.

“Bon ngkoe temanna are kam kakoaua Iotebwa Timiti, are e taku bwa e noora taian anera. Ko bon aki kakoauaa anne ke ko bon kakoauaa?’

“I aki ataia bwa tera ae N na taekinna. A bane n taraai ataein te reirei ake n te ereweita. I a tibwa roko, ao angiia a taku bwa I kaokoro. I a moanna ni kaitara teutana ao imwiina I taku, I ataia bwa Iotebwa Timiti bon ana burabeti te Atua.’

“E roko maia anne?’ I bon mimi. I aki ataia bwa N na konaa n taekina anne. Ma a koaua namakinan taeka akanne.

“‘Eng, I a bon tia ni kaongoaki ae kanga kaain te aro ngkami aika a burababa,’ e taku.

“Man anne, ao bon iai te aki kakarongoa teutana ngke e a uki mataroan te ereweita. Ngke ti a booti ara baeki, e boonako ao e ngare.

“Imwiina, I ongo te bwana n titiraki mai ibukiu, ‘Eei, tiaki ae kaain te Moomon iai riki aia Baibara teuana?’

“O akea ngaira. Manga teuana riki. I tanrikaaki ao n noora temanna ataein te reirei ae raoun te ereweita, Christopher.

“‘Arana bon Ana Boki Moomon,’ I taku, n aki tangiria ni manga taetae iaona. I anaa au baeki ao ni boonako.

“‘Anne te boki are e rairia Iotebwa Timiti?’ e titiraki.

“‘Eng, bon ngaia,’ I kaeka. I reitanako mwanangau, ni kataia ni karaba bainrangiu.

“‘E tamaroa, ma ko ataia bwa N na kanga ni karekea teuana?’

“Te kibu ae I reiakinna n te tieminari e waekoa n roko irou. ‘Bwa I aki mama n ana euangkerio Iesu Kristo.’¹ Ngke e roko aei n au iango, I namakina te mama bwa I a tia n namakina te bwainrang.

“Inanon te wiiki anne e bon aki nako man au iango te kibu anne. I kaekai titiraki aika mwaiti iaon te Ekaretia n aron ae I konaa, ao a reke raoraou.

“I kunea bwa I bon rang kakatonga n au aro.

“I angan christopher Ana Boki Moomon. Imwiina e koroboki nakoiu, n tuangai bwa e a tia ni kaoia mitinare nakon mweengana.

“I reiakinna bwa n na aki maamaa n tibwaa au koaua.”²

I kakorakoraaki n ana ninikoria Kevin n tibwa ana koaua. Bon te ninikoria ae okioki karaoana ni katoa bong irouia membwa n te Ekaretia ni kabutaa te aonaaba. Ngkai I tibwaa au iango, I kaoi ngkami bwa kam na iangoi titiraki aika aua aikai:

1. I ataia ao ni mataata raoi bwa tera te koaua?

2. I ataa aron kaotan au koaua?

3. Tera bwaai aika a totokoai n tibwaan au koaua?

4. N na kanga ni kawakina au koaua?

Am koaua bon am bwai ae moan te kakaawaki, ae aki toki n airiiri ma namakinan te tamnei. Namakin aika a aki toki n rooroko n ae rangi n rau ao a kabwarabwaraaki bwa, te “bwana ae maraara n rau.”³ Bon am koaua ke am atatai n te koaua ae e reke bwa te kakoaua n tamnei rinanon ana wirikiriki te Tamnei ae Raoiroi. Karekean te kakoaua aei e na bita te bwai ae ko taekinna ao arom ni mwakuriia. Bwaai aika a boboto iai am koaua, are e kamatoa te Tamnei ae Raoiroi, airi ma aikai:

• Te Atua bon Tamam are i Karawa; ngkoe bon Natina. E tangiriko.

• E maiu Iesu Kristo. Bon Natin te Atua ae maiu ao bon am Tia Kamaiu ao te Tia Kabooa Maium.

• Iotebwa Timiti bon ana burabeti te Atua ae weteaki bwa E na kaoka Ana Ekaretia Iesu Kristo.

• Ana Ekaretia Iesu Kristo Ibukiia Aika Itiaki ni Boong Aika Kaitira bon Ana Ekaretia te Atua ae kaokaki nako aon te aba.

• Ana Ekaretia Iesu Kristo e kairaki iroun te burabeti ae maiu ni boong aikai.

Ko kaota am koaua ngkana ko tibwaa am namakin n tamnei ma tabeman. Ngkai kaain te Ekaretia, Iai ami taai ni kaoti koauai n tataekinna a roko n tain bootaki n te Taromauri ke n ae aki katauraoaki, n te marooro temanna nakon temanna ma am utu, raraomAo ao aomata tabeman.

Te kawai riki teuana n tibwa am koaua bon rinanon anuam aika raraoi. Am kakoaua iaon Iesu Kristo bon tiaki ti n te bwai are ko taekinna—bon tarakim bwa antai raoi ngkoe.

Ni katoa tai are ko kanakoa bwanaam ni kakoaua ke ni kaotia rinanon am mwakuri n am motinnao n iriira Iesu Kristo, ko kaoiia aomata tabeman n “roko nakon Kristo.”⁴

Membwa n te Ekaretia a tei bwa taan kakoaua iroun te Atua n taai nako, ao ni bwaai nako, ao n taabo nako.⁵ Taini karaoan aei n te aonaaba ae e a onrake iai bwaai n rabakau ni kabonganai bon oin ara taeka aika kairaki iroun te tamnei ke n tibwai taeka aika a kaunganano ae mai irouia tabeman bon akea tiaia. Ti kaota te koaua ngkana ti tangira, tibwatibwa, ao ni kakao, n ikotaki ma te aonraain. Baike ko korei, am rongorongo, ao taeka ake ko katokai a na kaota te kantaninga ae rietaata ao ni mimitong ngkana ko kabonganai naba bwaai n reitaki ni kaotia bwa e kanga ana euangkerio Iesu Kristo ni bita maium.

Bwaai aika a totoko n tibwaan am koaua tao e na airi ma te aki koaua raoi iaon te bwai ae ko na taekinna. Matthew Cowley, te Abotoro rimoa, e tibwa te taneiai aei ngke e mwananga n ana mition ae nimaua ririkina ngke 17 ana ririki n nako Nu Tiran:

“I aki kona ni mwaninga ana tataro tamau n te bong are I mwananga iai. I tuai man ongo mai imwaina te kakabwaia ae rang n tamaroa inanon maiu. Imwiina ana kabanea n taeka nakoiu … ‘Natiu, ko na nako n te mition anne … ao n tabetai ngkana ko weteaki, ko na iangoia bwa ko rangi n tauraoi raoi, ma ngkana ko a teirake, are e na bua ma am iango.’ … E a tia n rereke irou anne tiaki ti te taina.

“I taku, ‘Tera ae ko karaoia ngkana e bua am iango?’

“E taku, ‘Ko teirake n te tabo anne ma te korakora are e nako mai inanom, ko kaota koauan ae Iotebwa Timiti bon ana burabeti te Atua ae maiu, ao a na roko iango nakon am iango ao taeka nakon wiim … nakon nanoia naake a ongoraa.’ Ao ngkana e bua au iango, ni mwaitin te tai n au … mition …, e anganai te tai ni kaota au koaua nakon te bong are moan te tamaroa n rongorongon te aonaaba imwiin taurakin te Mataniwi. Kataia n te tai teuana, ataeinimwaane ao ataeinnaine. Ngkana ai akea te bwai ae ko na taekinna, kaota koauana ae Iotebwa Timiti bon ana burabeti te Atua, ao rongorongon te Ekaretia ni kabane a na roko n am iango.”⁶

N aron naba, ae tibwaia Beretitenti Dallin H. Oaks, “Tabeua koaua a reke riki iaon wae ake a tei ni kaotiotia nakon riki bubuan wae ake a tataro ibukin te koaua.”⁷ Te Tamnei e kaota te kakoaua nakon te tia taetae ao nakoia naba taan ongoroa.

Teuana te totoko, are e katuruturuaki n ana karaki Kevin, bon te maaku. E koroboki Bauro nakon Timoteo:

“Ba E aki anganiira te Atua te nano ae mamaku; ma E anganira te nano ae korakora, ae tatangira te aba. …

“Ma ngaia ae ko na tai maamaa n taekina taekan ara Uea.”⁸

Namakinan te maaku e aki roko mai iroun te Uea ma bon mai iroun te tia anga te kakaitara. Reken te onimaki, n aron ae riki iroun Kevin, e na anganiko te kona n tokanikai iaon namakin aikai ao n tibwaa nako te bwai are inanom.

I kakoaua bwa te koaua e bwebwerake inanora, ma, n te aro bwa ti na kawakinna ao ni karikirakea, e reirei Aramwa bwa ti riai ni karikirakea raoi ara koaua n tararuaia raoi.⁹ Ngkana ti karaoa anne, “e na karekea wakaana, ma ni maiu, ma ni karika uaana.”¹⁰ N akean aio “e na bon rai.”¹¹

Kaain te Moan Beretitentii n tatabemaniia a tia ni katauraoa nakoira te kaetieti bwa ti na kangaa ni kawakina te koaua.

Beretitenti Henry B. Eyring n ana tangira e reireiniira bwa “kanuakira iaon ana taeka te Atua, tataro ma nanora ni koaua, n ongeaba nakon ana tua te Uea a riai n booraoi kamwakuraia ao ni kaokiokia bwa e aonga n rikirake ao ni matoatoa am koaua.”¹²

Beretitenti Dallin H. Oaks e kauringiira bwa ni kateimatoa ara koaua, “ti kainanoia n anaa te toa ni katoa wiiki (tara R&B 59:9) bwa ti aonga n tau ibukin te berita ae kakawaki bwa aonga ni ‘memena Tamneina [iaora]’ (R&B 20:77).”¹³

Ao ma te akoi e reirei Beretitenti Russell M. Nelson ngkai a tibwa waaki aki maan n nako:

“Kamwarakea [am kakoaua] n te koaua. …

“… Karikirakeko n aia taeka burabeti ake ngkoa ao aika ngkai. Bubutiia te Uea bwa e na reireiniko bwa ko na kanga n ongo raoi Nakoina. Kabanea riki am tai ni mwakuri n te tembora ao n rongorongon te utu.

“ … Karika am koaua bwa am moanibwai.”¹⁴

Tariu ao mwaneu aika tangiraki, I berita bwa ngkana ko bon mataata raoi bwa tera te koaua, ao ngkai ko tibwaia, ko na tokanikai iaon totoko aika aki ataaki ao te maaku, n anganiko te konaa ni karikirakea ao ni kawakina am bwai ae rangi ni kakawaki, am koaua.

Ti kakabwaiaaki ngkai a mwaiti katooto mai irouia burabeti ake ngkoa ao n taai aikai ake a tataekina aia koaua ma te matoatoa.

Imwiin maten Kristo, e tei Betero ao ni kakoauaa:

“E na ataaki iroumi ni kabane …bwa n aran Iesu Kristo te I-Natareta, are kam tauria, are E kautia te Atua man te mate, … te aomata aio e a tei ni bwanin rabwatana i matami. …

“… Bwa bon akea te ara teuana i ani karawa ae a anganaki aomata, ae ti kona ni kamaiuaki iai.”¹⁵

Amureki n rimwiin ana reirei Aramwa iaon te onimaki, e taekinna ma te korakora: “N na kakoaua nakoimi bwa bwaai aikai a koaua. Nooria, I taku nakoimi, bwa I ataia ae Kristo e na roko i buakoia natiia aomata, bwa e na katokaa iaona riaoan te tua irouia ana aomata, … ao bwa e na karaoa te mwakuri ni kamaiu ibukin buren te aonaba; bwa e a tia n taekinna te Uea ae te Atua.”¹⁶

Iotebwa Timiti ao Sidney Rigdon, ni kakoauaan te mii ae mimitong iaon mangautin te Tia Kamaiu, a taekinna:

“Ao ngkai, imwin taian koaua aika mwaiti ake a tia ni kaotaki ibukina, aio te kabanea ni kakoaua ngkai, ae ti kaotia ibukina: Bwa e maiu!

“Bwa ti nooria, n angatain te Atua; ao ti ongo te bwana ae kaota koauana bwa ngaia te Rikitemanna iroun te Tama.”¹⁷

Tariu ao mwaneu, I kaoingkami bwa kam na karekea ami tai ni kaota ami koaua n ami taeka ao n te mwakuri. E reke irou te tai ae aekan anne tabeua te tai n nako, ni banen te boowi ma te meeia n atuun te kawa i Amerika Maiaki, n ana ruu ma tabeman kaain ana kaebineti. Ngke ti kainiin ma namakinan te karinerine, I bae moa teutana ni iangoia bwa I riai ni kaota au koaua. N ira te wirikiriki, I aanga au kakoaua bwa Iesu Kristo bon Natin te Atua ae maiu ao te Tia Kamaiua te aonaaba. E bitaki bwaai ni kabane n te tai anne. Te tamnei inanon te ruu e bon kakoauaaki. E taraa n ae ni kabane aomata a rotaki. “Ao Tia Karaunano e kaota koauan te Tama ao te Nati.”¹⁸ I rangi ni kakaitau bwa I karikirakea te ninikoria ni kaota au koaua.

Ngkana e roko te tai ae aekan aei, taua ao karaoa nanona. Ko na namakina ana rau te Tia Karaunano inanom ngkana ko karaoia.

I anga au koaua ao kakoaua nakoimii—te Atua bon Tamara are i Karawa, Iesu Kristo e maiu, ao Ana Ekaretia Iesu Kristo ibukiia Aika Itiaki ni Boong aika Kaitira iaon te aba e kairaki iroun ara burabeti ae tangiraki, Beretitenti Russell M. Nelson. N aran Iesu Kristo, amen.