Kaaniia Riki te Tia Kamaiu
N ukeria n ataa ao n tangira te Tia Kamaiu, ti kaokoroira man te aonaaba rinanon ara berita ma te Atua, ni kiraaki, akea aekakina, ao n onoti, n aki kaokoroira mairouia aomata ake e kaokoro aia onimaki.
Tariu ao mwaneu aika tangiraki, n te tairiki aei I taetae nakoia taan iriira Iesu Kristo aika nanorinano ao ni babane nanoia irouna. Ngkai I noori tamaroan maiumi ao ami onimaki iroun ara Tia Kamaiu ikai n te aba aei ao n aba nako ni kabuta te aonaaba, I a tangiri riki ngkami.
N rorokon tokin Ana mwakuri, ana reirei Iesu a titirakinna bwa e na tuangiia “kanikinaean [Kauaokina], ao tokin aonaaba.”1
Iesu e tuangiia bwaai ake a na riki imwain okina ao ni kabaneana e taekinna bwa “ngkana kam nori baikai ni kabane, [kam na] ataia bwa [e a kan] ae I rarikini mataroa.”2
N te kabanea ni maungatabu ni kabuta ae nako, I kakauongo raoi nakon ana taeka Beretitenti Henry B. Eyring: “Ngaira n tatabemaniira,” e taku, “n tabo nako are ti mena iai, ti ataia bwa ti maiu n te tai ni kangaanga are tabe n rikirake. … Ane iai matana n noori kanikinaean taai ao n ongo bwanaia burabeti a na ataia ae a bon koaua.”3
E taku te Tia Kamaiu nakoia ana reirei aika ninikoria: “A kabaia mata mi, ba a noraba: ao taninga mi, ba a ongo.”4 E na reke te kakabwaia aio bwa ara bwai ngkana ti kakauongo nakon ana taeka te Uea rinanon Ana burabeti ao tabeman n te maungatabu aio.
Wiita ao Titania
Te Uea e kabwarabwara bwa n ana kabanea ni bong imwain Okina, “wiita,” are E kabwarabwara bwa “natin uean te Atua,”5 a na uaia n rikirake ma te “titania,” ke naake aki tangira te Atua ao aki kawakin Ana tua. A na “uaia n rikirake,”6 ni kauoua.
Aio ara aonaaba ni karokoa e oki te Tia Kamaiu, are e mwaiti iai te raoiraoi ao e mwaiti naba iai te buakaka n tabo nako.7
Ko na bae n tabetai n aki namakina ae ko korakora, n tau bwa kain te wiita. Bwaina te taotaonaki n nano! E taku te Uea bwa a na iai ibuakon wiita aika a na bwebwerake ao a bon maraurau.8 Ngaira aika Itiaki ni Boong aika Kaitira, ao e ngae ngke ti tuai bane n roko n are ti tangiria, ti taua ma nanora are ti tangiria ni kan riki bwa Ana reirei ni koaua.
Korakora Ara Onimaki iroun Iesu Kristo
Ti ataia bwa ngkai e rikirake te buakaka iaon te aba, maiura n tamnei, ao maiun tamneia naake ti tangiriia, e na kainnanoa kamwarakeana ae tabwanin riki, kamwaitaki riki, ao ni kakorakoraaki n ara onimaki iroun Iesu Kristo. Te Abotoro are Bauro e reireiniira bwa tina kawakaeaki,9 ni kaneneaki, ao aki kamwemweaki10 n ara tangira ibukin te Tia Kamaiu ao n nanomatoa n Iriiria. N te bong aei ao aika imwaira e kainnanoa kabotoan riki ao ni katuruturua te mwakuri, ni kawakiinara man te kamaenakoaki ao, n te aki tarabwai.11
Ma irarikin ae te kariiri n te aonaaba e a rikirake ni katobibiira, ti riai n aki maaku. Te Uea e na bon aki kitaniia ana aomata ni berita. Iai te mwaaka ni kabomwi n te bwaintangira n tamnei ao te kaetieti mai karawa ibukiia aika raoiroi.12 Te kakabwaia are e raonaki ni mwaakan te tamnei, ti aki anganaki ibukina bwa ngaira mwakoron te roro aei. E roko ngkai ti kakorakora ara onimaki iroun Iesu Kristo ao ti kawakin Ana tua, ngkai ti a kina riki ao n tangiria. “Aio te maiu are aki totoki,” e tataro Iesu, “bwa a na ataiko ae te Atua ae ti temanna ae koaua, ao Iesu Kristo, ae ko kanakomaia.”13
Ngkai ti bon ataia ae, reken ara koaua iroun Iesu Kristo ao rikira bwa taan iriiria ni koaua e bon mwaiti riki tain baireana—e mwaiti riki nakon karaoana teuana te tai. Bon waakin te mwakuri ae tabu n reitinako are e rikirake ao n rakanako n tai aika a kakaokoro inanon maiura, n reitinako ni karokoa ti katorobubua i waena.
Ngkai a rikirake uita ibuakon titania n te aonaaba, tina kanga ni kananoa ao ni kakorakora ara motinnano nakon te Tia Kamaiu ni boong aika imwaira?
Aikai iango aika teniua:
Kabanea Nanora ni Maiun Iesu
Te moan, ti kona ni kabanei nanora ae bwanin ni maiun Iesu, Ana reirei, Ana Kaintokanuea, Mwaakana, ao Ana karea ni kamaiu. E taku te Tia Kamaiu, “Tanimai nakoiu n ami iango.”14 E taku te Abotoro Ioane, “Ti tangiria, ba E tangiriira moa.”15 Ngkai ti namakina raoi Ana tangira, e rikirake riki tangirana ao, ni koaua raoi, ni iriira Ana banna ni katooto n tangira ao n tabe ibukiia naake irarikira. Ma mwakuri nako aika a raoiroi Nakoina, ti a kinaa raoi.16 Ti Neboia, ao ni kataia n arora nako aika a beebete ni Katotongnga.17
Karaoi Berita ma te Uea
Imwiina, ngkai tia kina riki ao n tangira te Tia Kamaiu, tina tangiria riki ni berita Nakoina ara motinnano ao ara onimaki. Ti karaoi berita aika tabu ma Ngaia. Ti moana ara berita man te bwabetito, ao ti kamatoai berita aikai ao tabeua riki ngkai ti rairi nanora ni katoabong, ni kabwarabure, ao ngkai ti ingainga ni kana te toa ni katoa wiiki. Ti berita bwa ti na “teimatoa n Uringa ao ni kawakin Ana tua.”18
Ngkana ti a tauraoi, ti butimwaea ao n ongeaba nakon otenanti ao berita n te tembora. Namakinan te bitaki ae akea tokina n ara tai ae tabu, n ana auti te Uea, ti kukurei ni karaoi berita ma te Atua ao ni kakorakorai nanora ni kawakini.
Karaoan ao kawakinan berita e karekea ana tangira te Tia Kamaiu bwa e na tiku n teimatoa inanora. N te Riaona, n te namwakaina aei e taku Beretitenti Nelson: “[Ara] berita [ni bane] e na kairiira ni kaniira riki Nakoina. … Te Atua E na bon aki katoka Ana reitaki ma naake a bakaea reken te reitaki ma Ngaia.”19 N aron taekinana ae tamaroa iroun Beretitenti Nelson n te ingabong aei , “Ma katabuan tembora n tatabeua nako, e a raka riki mwaakan te Atua nakon te aonaaba ni kakorakoraira ao n mwakuri ni kaitarai ana waaki teuare buakaka.”20
Ti kona n noora bukina ngkai te Uea e tuangiia Ana burabeti bwa e na uota ana tembora aika tabu ni kaniia riki nakoira bwa ti aonga ni kona n roroko riki n Ana auti?
Ngkai ti rin n te tembora, ti kiitana ana kariri te aonaaba aika a ibetutu ni kaitaraira ngkai ti reiakin ara kantaninga n te maiu ao bwaintangira ake ti anganaki ae akea tokiia rinanon ara Tia Kamaiu, Iesu Kristo.
Kamanoa te Bwaintangira ae te Tamnei ae Raoiroi
Te kabane, au kateniua n iango: n te mwananga ae tabu aei, tina kakaawakina, kamanoa, tei ibukina, ao n tararuaa ana bwaintangira ae te Tamnei ae Raoiroi. Beretitenti M. Russell Ballard ao Unimwaane Kevin W. Pearson mai imwaaina a taekina ana kauring n taetae burabeti Beretitenti Nelson ae N a manga taekinna riki: “E na bon aki kona ni kamaiuaki te tamnei n akean ana kairi, kaetieti, karau nano, ao korakoran te Tamnei ae Raoiroi ae teimatoa”21 Bon te bwaintangira ae e riaon boona. Ti karaoa ara kabanea n tamaroa ni katani ara mwakuri ni katoa bong bwa e aonga n tiku iroura te Tamnei ae Raoiroi. Ngaira otan te aonaaba, ao ngkana e riai, ti tatauraoi n rineia bwa tina kaokoro mairouia aomata. Beretitenti Dallin H. Oaks e titirakiniia ikawai: “Ko tangiria [ngkoe] bwa ko na kaokoro? … Ae kakaawaki [riki] … bon rinerine ake ko karaoi inanon maium. … Kam waaki nako ni kaitara ana kakaitara te aonaaba?”22
Rineia bwa Ko na Okoro man te Aonaaba
Iaon bwaai n reitaki, I titirakiniia raou n riki bwa ana reirei bwa a na tibwa aia rinerine are e karikiia bwa a na okoro man te aonaaba. I karekei kaeka aika e raka iaon tebubua.23 Aikai tabeua:
Amanda: Ngai te neeti ae I mwakuri n te karabuti n te aono. I kataia n taruaia buure n aron are e tararuaia Kristo.
Rachel: Ngai te tia anene n te opera, ao n angiin te tai I kantaningaaki N na kamanenai onea aika I anganaki, n aki taraia bwa aekakira tararaoina. [Ibukina ngkai I a entaute,] I tuanga [te burotutia] bwa onea a riai n [tau]. A bon aki kukurei … ma e ngae n anne a karaoa e bitaki. I iokinibwaia te rau are e roko ngkana ko riki bwa ana tia kakoaua Kristo n tainako.
Chriss: Ngai te tia manging (ae tabe ni kamarurungaki), tau nakon te tembora, ao te membwa n te Ekaretia. I tataekina au taneiai ma te anua ae kareke ao I karekea au koaua n ana Mwakuri ni Kamaiu [Iesu Kristo].
Lauren: I korean taekan ara kaotioti ma raou n reirei n te kauarinan. A tangiria bwa N na kainabwaabu, anuau are anganaii e taetae buakaka ao n tinara. A kairoroai, ma I rawa ao I teimatoa n au eti.
Adam: A mwaiti aomata aika aki kakoaua ngkana I taekina ae I kawakina tuan te itiaki ao I rineia n totokoi tamnei aika buakaka. A aki ota n tamaroan te kimwareirei ao te rau n au iango are e anganai.
Ella: Tamau ngaia te membwa n te LGBTQ komiunite. N tainako I kataia ni karinea aia namakin aomata ngkai I tei bwa ana tia kakoaua Kristo ni bwainakin te kokoaua n te bwai are I kakoaua.
Andrade: I baireia bwa N na reitinako n nako n taromauri ngke au utu a baireia bwa a nang aki nanako.
Ao n te kabane, mairoun Sherry: Ti ira te bootaki n ana auti te koowana. A waaki n tibwatibwai champagne bwa te “katekeraoi.” I bubuti te ran, e ngae ngke taan mwakuri a taku bwa e na kamatauninga. Ti katekeraoa te koowana, ao I taua i eta au kiraati n ran. E aki matauninga iai te koowana.
E taku Beretitenti Nelson, “Eng, kam maeka n te aonaaba, ma iai ami kainibaire ae rang ni kaokoro man te aonaaba are e buokiko bwa kona totokoa barekan te aonaaba.”24
Anastasia, te kairake n tina mai Ukraine ae mena n te onaoraki e a tibwa tia ni bung te mwaane natina ngke e waaki te kabwaka boom i Kyiv ni Beberuare ae nako. Te neeti e kauka te mataroa man taetae n te bwana ae katawe, “Anaa natim, niiria n te rabuna, ao nakon te hall—ngkai naba!”
Imwiina, e taekinna Anastasia:
“I aki iangoia bwa au moan bong n riki n tina e na rang kangaanga, … ma … I kabotoa au iango iaon … kakabwaia ao kakai ake I a tia n noori. …
“N te tai aei, … e na tara n rang kangaanga kabwaraan aia bure naake a karaoa te urubwai ao te kaikoaki ae korakora …, ma ngkai ana reirei Kristo, Iai au onimaki bwa N na kona ni [kabwarabure]. …
“I aki atai ni kabane ake a na riki n taai aika a na roko … ma I ataia bwa kawakina ara berita e na reitinako n raoniira te Tamnei, … bwa tina kona n namakina te kimwareirei ao te kantaninga, … riki n tain kangaanga.”25
Te Berita n te Maiu ae Akea Tokina ao Mimitongin Teretio
Tariu ao mwaneu, I a tia ni karekea te kakabwaia ae mwaiti n ana tangira ara Tia Kamaiu ae tangiraki, Iesu Kristo. I ataia bwa E maiu ao E kaira Ana mwakuri. Akea te taeka ae e kona ni kabwarabwara au tangira Ibukina.
Ngaira “naati ni berita” aika a roota tabon te aonaaba n aaba nako ao katei iaon kaontenati nako, ae ware mirion, ngkai ti tataningaa mimitongin okin ara Uea ao ara Tia Kamaiu. N otanako n aron te ota nakoia ake irarikira, ti taratara raoi ni katerei nanora, ara iango, ara rinerine ao ara mwakuri. N ukeuke ma nanora ni kabane n ataia ao n tangira te Tia Kamaiu, ti kaokoroira man te aonaaba rinanon ara berita ma te Atua, ni kai kinaaki, akea aekakina, ao n onoti, ngkai ti karinea ao Ana reirei, n aki kaokoroira mairouia aomata ake e kaokoro aia onimaki.
Bon te mwananga ae kakukurei n riki bwa wiita i buakon akanta, n tabetai ni kaonaki n te uruakinnano, ma n aki toki n namakina te rau man mwataira ao karauan nanora n ara onimaki. Ngkai ko kariaia am tangira ibukin te Te Kamaiu ao Ana tangira bwa e na bita nanom, I berita nakoim te mwengaraoi ae raka, te rau ao te kimwareirei ni kaitiboom ma kakaewenako inanon maium. Ao E berita te Tia Kamaiu nakoira: “N [na] ikotiia au aomata, ni kaineti nakon te taetae ni kaikonaki i aon te wiita ao te titania, bwa e aonga te wiita ni kawakinaki n te auti ni wiita bwa a na bwaina te maiu ae akea tokina, ao ni baunaki ni mimitongin te tiretio.”26 N aran Iesu Kristo, amen.