Rongorongon te Ekaretia
Taan Kairiiri n te Ekaretia A Ibuobuoki n Aba aika a Mwaiti
Onoua te namwakaina n nako ao a tia taan Kairiiri n te Ekaretia n reitinako ni karaoi mwakuri n ibuobuoki ni kabutaa te aonaaba. Aikai tabeua kaongora man aia waaki aika a mwaiti man te kabanea ni maungatabu ni kabuta.
Beretitenti Oaks E Kauringa aia Bitaki Aine
N ana birim te Ekaretia are e otinako inanon Tebetembwa, Beretitenti Dallin H. Oaks, te Moan Kauntira n te Moan Beretitentii, e maroroakina ana kairoro tinana ao tibuna ni buokakina ni karikirakea ana koaua ao ana onimaki iroun te Uea. Aia kairoro aine inanon maiuna e reitinako iroun kainnabana, Titita Oaks, ao imwiin matena, ma buuna, Titita Kristen Oaks.
“Taan reirei aika a rangi ni kakakawaki are a reke irou iaon reirein te Ekaretia ao te mwakuri n ibuouboki ao tibwanga inanon te utu—are e bon titebo naba ma are mairouia burabeti n te Ekaretia—e a tia n riki mairouia aine,” e taku Beretitenti Oaks.
Unimwaane Uchtdorf E Taetae nakoia Taan Birinako mai Abaia
Unimwane Dieter F. Uchtdorf man te Kooram n Abotoro n te Tengaun ma Uoman e nako Poland inanon Eberi. E tararua te bootaki n taromauri ibukiia taan birinako mai Ukrain ake a karekei neia ni katantan ikekei ae aki teimaan.
N rokona, Unimwaane Uchtdorf, are e a tia n riki bwa te tia birinako mai abana inanon maiuna, e taku bwa e kaonaki nanona n “te rawawata ae korakora ibukin rootakiia” Aika Itiaki ni Boong aika Kaitira ao tabeman riki n aba ake a urubeke ma E namakina te kakaitau naba.
“Taan birinako aikai a tia ni kakorakoraira ao n tabekiira n raoiroia, n onimakinaia, ao aia onimaki iroun ao ibukin te Tia Kamaiu iaon ana kantaninga ae tabu,” e taku. “Harriet ao ngai ti kantaningaia bwa ti na riki bwa taan kakorakoraia ao taan karaunano nakoia, ma a uota te ota mai karawa, te kaantaninga, ao te rau nakon nanora.”
Unimwaane Bednar e taetae nakon te National Press Club i Washington, D.C.
Unimwaane David A. Bednar man te Kooram n Abotoro n te Tengaun ma Uoman e taetae nakon te National Press Club ni Meei, ni kabwaranakoa bwa tera ao bukin tera ana buoka nakoia te botannaomata n te aonaaba Ana Ekaretia Iesu Kristo, n te warebea, te reirei, te tembora, te mitinare, ao te mwakuri ni kateiriki.
“Boton te kantaninga n Ana Ekaretia Iesu Kristo ibukiia Aika Itiaki ni Boong aika Kaitira bwa e na buokiia aomata n reiakina aron ao anuan te Atua, n tangira te Atua, n riki bwa ana reirei Natina, Iesu Kristo, ao n tangiriia ao ni beku ibukiia tarira ao mwanera,” e taku Unimwaane Bednar.
Beretitenti man te Bootaki n Aine ao te Moanrinan A Kawara Amerika Maiaki
Beretitenti Camille N. Johnson, Beretitenti ni Kabuta n te Bootaki n Aine, ao Beretitenti Susan H. Porter, Beretitenti ni Kabuta n te Moanrinan, a kaitibo ma taan kairiiri n te kaawa ao membwa n te Ekaretia i Argentina, Chile, Uruguay, ao Paraguay inanon te 10-ni bong n ibuobouki ao ni kakawari.
A kaitibo ma bootakin te tautaeka ake a buokiia aine n aro ake a kai rootaki iai i Paraguay ao i Argentina.
“Ara Ekaretia e ingainga ni kan mwakuri ma ngkami ni katamaroai anga ibukin te reirei ao toronibwaia aine,” e taku Beretitenti Johnson.
N raonaki ma ana ibuobuoki te tautaeka, Beretitenti Johnson ao Porter a ibuobuoki naba nakoia kaain te Ekaretia. A karaoi boowi ibukiia kaaro aika kairake, bootaki n taromauri ibukiia aine ake a tuai iein, boowi n reitaki ibukiia utu ao ataei, ao kataneiai ibukiia taan kairiiri ni bootaki n taromauri.