“Ko e Laka Atu ki Muʻa ‘i he Tui kia Kalaisí,” Liahona, ʻAokosi 2023.
Talitali Lelei Kimoutolu ki he Makasini ko ʻEní
Ko e Laka Atu ki Muʻa ‘i he Tui kia Kalaisí
Ko e Toʻukupu ʻo e ʻOtuá, tā fakatātā ʻa Yongsung Kim, ʻikai lava ʻo hiki hano tatau
Neongo pe ko e hā e lahi ʻo ʻetau ongoʻi tuʻatamaki mo tuenoa ʻi heʻetau fefaʻuhi mo hotau ngaahi ʻahiʻahí, ka ʻoku ʻi ai maʻu pē ha hala ke laka ai ki muʻa ʻi heʻetau fononga ʻi he hala ʻo e fuakavá mo fekumi ki ha fakahinohino mei ha Fakamoʻui mo ha Tamai Hēvani ʻofa. ʻOku vahevahe ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he makasini ko ʻení ʻa e mahuʻinga ʻo e fekumi ʻi he kotoa ʻo e moʻuí ki he tui kia Sīsū Kalaisí (peesi 4). ʻOkú ne tohi ʻo pehē, “ʻOku ʻikai fuʻu faingataʻa ke fili ʻa e tui kia Sīsū Kalaisí ʻi heʻetau ongoʻi fakaivia fakalaumālié, ka kuo pau foki ke tau fili ʻa e tuí ʻi he fakaʻau ke faingataʻa ʻa e moʻuí.”
ʻOku nofotaha ʻeku fakamatalá mo e taha ʻo e ngaahi fakamatala ʻa e kakai lalahi kei talavoú ʻi he makasini ko ʻení ki he taha ʻo e ngaahi faingataʻa angamaheni ʻoku fepaki mo ha ngaahi fāmili mo e niʻihi fakafoʻituitui ʻi hotau māmani ʻi onopōní: ko e ponokalafí (peesi 8, 34). Naʻe akoʻi ʻe Palesiteni Tāleni H. ʻOakesi, ko e Tokoni ʻUluaki ʻi he Kau Palesitenisī ʻUluakí, ko kinautolu ko ia ʻoku fefaʻuhi mo e ponokalafí “ʻoku ʻikai ko ha kakai kovi kinautolu pe siva ʻenau ʻamanakí” (“Ko e Fakaakeake mei he Tauhele ʻo e Ponokalafí,” Liahona, ʻOkatopa 2015, 55). ʻE lava ke maʻu ʻe ha taha pē ʻa e mālohi ke ikunaʻi e maʻunimā ʻo e ponokalafí ʻo fakafou ʻi hono langaki e tui kia Sīsū Kalaisí mo fakaʻaongaʻi e ngaahi maʻuʻanga tokoni mei he ngaahi kaungāmeʻá, kau mēmipa ʻo e fāmilí, kau taki fakalotú, mo e kau mataotao ki he moʻui lelei fakaeʻatamaí.
ʻI heʻeku fakamatalá, ʻoku ou fakamatalaʻi ai ʻa e ngaahi tuʻunga kehekehe ʻo hono fakaʻaongaʻi ʻo e ponokalafí mo lave ki ha ngaahi founga pau ʻe lava ai e niʻihi fakafoʻituituí ʻo ikunaʻi ʻa e ponokalafí ʻi he ngaahi tuʻunga takitaha ko ʻení. ʻOku ou fakamamafaʻi e mahuʻinga ʻo e ngaahi maʻuʻanga tokoni fakalaumālié mo e fatongia tataki mahuʻinga ʻe lava ke fakahoko ʻe he Laumālie Māʻoniʻoní ʻi he tokoni ki hono ikunaʻi ʻo e ponokalafí.
ʻOku ou fakatauange ʻe tokoni atu ʻa e makasini ko ʻení ke ke ongoʻi ʻa e nonga mo e ʻofa mei hoʻo Tamai Hēvaní pea mo ho Fakamoʻui ko Sīsū Kalaisí, pea tokoni ke mahino kiate koe ʻe lava ʻe he tui moʻoní ʻo ikunaʻi ha faʻahinga fakafeʻātungia pē ʻi he moʻuí.
Brian J. Willoughby
Palōfesa, Akoʻanga ʻo e Moʻui Fakafāmilí, ʻUnivēsiti Pilikihami ʻIongí