Ngāue Fakaetauhi ʻo fakafou ʻi he Ngāue Tokoní

Te tau lava ʻo hoko ʻo hangē ange ko e Fakamoʻuí ʻi heʻetau ako ke ngāue fakaetauhi ʻo hangē ko ia naʻá Ne fakahokó. Te tau lava ʻo fakahoko ha faikehekehe lahi ʻi heʻetau ngāue fakamātoato ʻi he ngaahi founga angamahení.

ʻĪmisi

Ko e ala atu ʻa Sīsū ki he tangata ʻoku faingataʻaʻia fakaesinó

“Naʻe ʻikai haʻu [ʻa Sīsū Kalaisí] ke tauhia ia, ka ke tauhi” (Mātiu 20:28). Ko e ngāue tokoní ko ha konga ia ʻo e ngāue fakaetauhí koeʻuhí ko e ngāue tokoní ʻa e meʻa naʻe fai ʻe he Fakamoʻuí. Naʻá Ne toutou tuʻu ke fakafanongo, fakamoʻui, akoʻi, lotua, pea aʻu ʻo ngāue maʻá e kakai naʻa nau feohí, neongo ʻEne ongosiá, ngaahi fiemaʻu lahi ʻo ʻEne ngāué, pe ko e fiemaʻu ʻa e kakaí.

ʻOku fakamatala foki ʻa e Fuakava Foʻoú ki ha kakai kehe naʻa nau ngāue taʻesiokita ke langa ʻa e Siasí ʻi he kuonga muʻá, kau ai ʻa Fīpē, “kuó ne tokoniʻi ʻa e tokolahi” (vakai, Loma 16:1–2); Pīsila mo hono husepāniti ko ʻAkuilá (vakai, Ngāue 18:1–3; Loma 16:3–5); mo ha niʻihi kehe (vakai, Loma 16:6–15). Neongo naʻe ʻikai lekooti e fakaikiiki ʻo e konga lahi ʻo ʻenau ngāué, ka naʻe fakatokangaʻi ʻe he Kāingalotu ko ʻeni ʻi he kuonga muʻá ha fiemaʻu pea nau fakakakato ia.

Ko e taimi ʻe niʻihi ko e ngāue tokoní ko ha feilaulau, ʻoku kau ai ha ngaahi houa, ʻaho, pe naʻa mo ha ngaahi taʻu ne fakatapui ki ha ngāue—pea taimi ʻe niʻihi ʻoku faingofua pē ʻo hangē ko hano fai ha lotu maʻa ha kaungāmeʻa. Ko e taimi ʻe niʻihi ʻoku ʻikai ko e meʻa ʻoku tau fakahokó ʻokú ne fai ha liliu ʻi he moʻui ʻa e niʻihi kehé ka ko e foʻi moʻoni ko ia ne tau ʻi aí maʻanautolu.

Ko e uho ʻo e ngāue ʻo hangē ko ia naʻe fakahoko ʻe he Fakamoʻuí—ʻo aʻu pē ki he taimi ʻoku ʻikai faingamālie aí—ke ngāue fakamātoato ʻi he ʻofa, mo loto ʻaki.

ʻĪmisi

tangata ʻoku hū ki tuʻa ʻi ha matapā, mo ha niʻihi kehe ʻoku nau tuʻu ʻi mui ʻiate ia

Ko Hono Fakatupulaki ha Loto ki he Ngāue Tokoní

ʻI he fakaʻau ke tau ʻiloʻi ʻa e Fakamoʻuí, te tau ʻiloʻi lelei ange ʻa e meʻa te tau lava ʻo fakahoko ke ngāue fakaetauhi ʻi Hono tuʻungá. Te tau lava fēfē nai ʻo fakatupulaki ʻa e ʻulungaanga faka-Kalaisi ʻo e ngāue tokoni loto-fiemālié?

Fakakaukau ki he ʻuhinga ʻo e ngāue tokoni ʻo hangē ko Ia naʻe fakahoko ʻe Sīsū Kalaisí. Ko e hā naʻá Ne fakahokó? Naʻá Ne fakahoko fēfē nai ia? Te tau fakaʻaongaʻi fēfē nai ʻa e ngaahi meʻa ko iá ʻi heʻetau ngāue tokoní?
ʻOku lahi ha ngaahi tāpuaki ʻoku maʻu mei he ngāue tokoni taʻesiokitá, kau ai hono toʻo ʻetau tokangá mei heʻetau ngaahi kavengá mo e meʻa ʻoku tau hohaʻa ki aí, neongo kapau ʻe taimi siʻi pē. Ka naʻe ngāue ʻa Sīsū koeʻuhí ko e ʻofá, pea ʻoku tau ʻamanaki foki ke tokoni ʻi he foungá ni!
Ko e tokoni ki he niʻihi kehé ko e ngāue tokoni ia kiate Iá (vakai, Mātiu 25:40).
ʻOku ʻikai ke tau teitei fuʻu māʻolunga ke tokoni: “Ko ia ʻoku lahi ʻiate kimoutolú, ʻe hoko ia ko homou tauhi” (Mātiu 23:11).
Te tau lava ʻo fekumi ki ha fakahinohino mei he Laumālie Māʻoniʻoní ʻo fakafou ʻi he lotú. Kapau ʻoku haʻu ha fakakaukau ke fai lelei, ʻoku ueʻi fakalaumālie ia (vakai, Molonai 7:13). “ʻOua naʻa teitei fakatoloi ʻa e muimui ki ha ueʻi fakalaumālié” (Thomas S. Monson, “The Spirit Giveth Life,” Ensign, May 1985, 70).
“ʻOku totonu ke femoʻuekina ʻa e tangatá [mo e fefiné] ʻi he holi lahi ʻi ha ngāue lelei, pea fai ʻa e ngaahi meʻa lahi ko ʻenau fili tauʻatāina ʻanautolu pē, pea fakahoko ʻa e māʻoniʻoni lahi” (Tokāteline mo e Ngaahi Fuakava 58:27).
ʻOua naʻá ke manavasiʻi ke ngāue ʻo fakaʻaongaʻi hoʻo mohu foungá, ngaahi talēnití mo e ngaahi meʻa fakataautaha ʻokú ke manako aí.
ʻOku ʻikai fiemaʻu ia ke lahi ʻa e ngāue tokoní. Manatuʻi naʻa mo e fanga kiʻi meʻa faingofuá—hangē ko e tokoni ki ha kaungāmeʻá, ʻo tatau ai pē pe ko ha maʻu meʻatokoni mafana, kaati naʻe tohinima, pe ko ha pōpoaki text—ʻoku fakahoko ai ha meʻa mahuʻinga. Ko e meʻa mahuʻingá ke hoko ko e toʻukupu ʻo e Fakamoʻuí ʻi he māmaní.

Neongo ʻe lava ke ongoʻi ʻoku faingataʻa ʻi he taimi ʻe niʻihi ʻa e ngāue tokoní, ka te tau fakatupulaki ʻetau malava ko ia ke tokoni ʻi he founga lelei tahá, ʻi heʻetau toutou fakahokó mo hono lotuá. ʻE aʻu ki ha taimi ʻe hoko ʻa e ngāue tokoní ko e taha ʻo e ngaahi konga fakanatula mo fakafiefia taha ʻo ʻetau moʻui fakaʻahó.

ʻIlo Lahi Ange

Ako fekauʻaki mo e lotu faivelenga ke fanongo ki he leʻo ʻo e ʻEikí ke ʻiloʻi lelei ange ʻa e meʻa ʻokú Ne fiemaʻu maʻá e tokotaha ʻoku tau tokoniʻí (vakai, Henry B. Eyring, “Tāpuaki ʻi Hono Huafá,” Liahona, Mē 2021, 68).
Lau ʻa e founga naʻe fehangahangai ai ha ongomeʻa mali mo ha tūkunga ngāue fakaetauhi taʻefakafiemālie peá na fakaleleiʻi ia kimui ange (vakai, Joy D. Jones, “Fai Ia Maʻana,” Liahona, Nōvema 2018, 50).
Lau ʻa e founga ʻo e ʻafio mai ʻa Sīsū ki heʻetau ngāue tokoní ʻi heʻetau ngāue ʻi he “taumuʻa moʻoni” kae ʻikai ko e “ʻamanaki ʻe fakatokangaʻi, ʻiloʻi, pea fakahīkihikiʻi kinautolú” (vakai, Cristina B. Franco, “Ko e Fiefia ʻi he Tokoni Taʻesiokitá,” Liahona, Nōvema 2018, 56).
Mamata ʻi hono fakamatalaʻi ʻe Palesiteni M. Lāsolo Pālati ʻa e talanoa ki he taimi naʻe fehuʻi ai ʻe Sīsū kia Pita pe ʻokú ne ʻofa ʻiate Iá. ʻOku fakatatau ʻe Palesiteni Pālati ʻa e fehuʻi ko ʻení ki heʻetau moʻuí pea mo e founga te tau lava ai ʻo tokoni ʻi he lotolotonga ʻo e veiveiuá (“Lovest Thou Me More Than These?,” ChurchofJesusChrist.org/media).