“Ma e mai mea iti e tutupu mai ai mea tetele”

I le tuanai ai o le Taua Lona Lua a le Lalolagi na faamautu ai lo’u tina ma lo’u tama mo sina taimi i Aferika i Saute. O lo’u tama o se alii folau i vaa ma o le kamupani o vaa sa ia galue ai sa faamautu i Aferika i Saute ma sa folau i le lalolagi. Sa i ai i o’u matua se fanau laiti lava e toalua i le taimi lea ma a o i ai lo’u tama i se lalolagi mamao mai le aiga i se tasi o malaga, sa ma’i la laua tama laitiiti, o Gillian. Sa le i atoa se tausaga o lona matua ma o se mea faanoanoa ai sa maliu o ia i le taimi o se taotoga faafuasei.

Sa matuai faanoanoa lo’u tina. Sa le gata ina leai se lagolago mo ia mai lona toalua, ae ona sa le i mautu lelei i latou i Aferika i Saute, sa leai ai sona aiga lautele po o ni uo mamae foi e faalagolago atu i ai. O le mea e lelei ai, e tusa o le taimi lava lena, sa le i leva lava ona tu’itu’i atu ai faifeautalai o Le Ekalesia a Iesu Keriso o le Au Paia o Aso e Gata Ai i lona faitotoa ma sa laua aoaoina o ia i le talalelei a Iesu Keriso. Ou te faafetai tele i na faifeautalai.

Sa laua aoaoina lo’u tina e faapea “o fanau laiti ua ola ia Keriso, mai lava i le faavaega o le lalolagi” (Moronae 8:12).

O se mea sa matou le i iloa lava vagana ua matou faitau i ai i lana tusitalaaga i le tele o tausaga mulimuli ane, e faapea ina ua tuanai le maliu o lana tama, sa auina mai e le Peresitene o le Misiona lana taavale ma se ave taavale e ave lo’u tina i nofoaga uma lava sa manaomia ona alu i ai o ia ina ia faia ai mea uma lava na tulai mai, e aofia ai ma le faatulagaina o toe sauniga. Ou te faafetai tele mo lena Peresitene o le Misiona.

O lona faatinoga o le agalelei i se tagata sa na o na aoaoina e faifeautalai ua i ai se aafiaga tumau umi lava na te le o iloaina.

A o ou toe tepa i tua i lo’u lava talafaasolopito, e toatele i latou na suia le āluga o lo’u olaga. Ou te valaauliaina outou e toe tomanatu i o outou lava olaga. A o outou faia, o le a outou iloa ai o faatinoga o le agalelei ma le popole alofa e le o ni mea e tutupu fua lava. Nai lo lena, latou te atagia mai ai le faatuatuaga ma le alofa o le Alii mo outou, o Lona malamalama i o outou gafatia ma gafatia o i latou tou te auauna atu i ai, ma le alofa o loo ia te Ia mo i latou. E faamanuiaina uma i latou o e foai ma i latou o e taliaina.

E masani lava o i latou o e suia le āluga o lou olaga o taitai o e e i ai tomai faaKeriso e vaai ai ia te oe i le ala e silasila mai ai le Alii ia te oe. A o o’u pulefaamalumalu i se konafesi faalesiteki lata mai nei sa ou faafeiloai atu ai i se uso i le faapaologa o le na faailoa mai o ia o Epikopo Ormsby. O se igoa taatele lava lea i totonu o le Ekalesia, ma sa ou fesili poo ai lona tama. O lona Tama, lea ou te le i vaai i ai mo le pe a ma le 45 tausaga, sa i le au epikopo i la’u uarota a o avea a’u o se tiakono ma se aoao.

Ou te manatua lenei Uso ia Ormsby o se tagata filiga, fiafia, agalelei ma auai. E masani ona ia feaveai tagata i lana taavale i poloketi auauna atu ma sauniga. I le taimi lena sa tausia i matou e lo matou tina e na o ia lava ma alu e faigaluega i aso taitasi, o lea sa faalagolago ai o ia i taitai o le uarota e pei o Uso Ormsby e fesoasoani i mea manaomia. Sa ripoti mai e Epikopo Ormsby o loo soifua pea lona tama, ma na ou talosaga ia te ia e faailoa atu i lona tama lo’u talisapaia tele o lona aafiaga. Sa mafai ona ma feiloai ma Uso Ormsby i le vaiaso na sosoo ai ma sa ou faailoa atu la’u faafetai ia te ia. Na ia saunoa mai faapea sa vaai o ia i se mea sili atu ia i ma’ua ma lo’u uso i tua atu o le ma ulavavale faaletalavou.

Ou te matua faafetai tele mo Uso Ormsby. O ia o se faataitaiga o le tele o auauna a le Atua o e tausia tagata i le tulaga e mafai ona avea ai i latou.

E matua toatele tagata e oo mai i le mafaufau. A o ou matua faapopoleina lava e uiga i se tulaga faaletonu faapisinisi, sa asiasi mai ai lo matou epikopo i lena taimi i lo matou aiga. Sa ia folafola mai ia i matou o le a lelei mea uma. Sa ia faamamafa mai lana folafolaga i le avea ai o i matou ma tagata e totogi atoatoa le sefuluai e le tatau ona matou soona popole. O le a tausia e le Alii Ana folafolaga. Sa suitulaga vave lava le popole i le faamoemoe.

Ou te faafetai i lena epikopo musuia ma mo le Tulafono o le Sefuluai.

I faataitaiga ua ou tuuina atu, o faatinoga lava latou o le auaunaga e le uiga ese, ae i le faasologa o taimi na iu ina avea o ni mea taua tele. E faapena ona e i ai le Fuafuaga a le Atua e aofia ai le aumaia o le tino ola pea ma le ola e faavavau i Ana fanau uma ma o loo faamaonia mai o Ana fanau taitoatasi e mafai ona mauaina Ana faamanuiaga folafolaina. Na te aumaia ia i tatou le avanoa e auai i lenei galuega. Na te tuuina tagata i o tatou ala e mafai ona tatou auauna i ai, ma a o tatou tausia a tatou feagaiga o le papatisoga, Na te auina mai ia i tatou le Agaga Paia e taialaina a tatou faatinoga i aso taitasi. O a tatou faatinoga i aso taitasi e fausia ai o tatou olaga. E leitioa a faamamafa mai e lo tatou Perofeta, o Peresitene Russell M. Nelson, le faagasologa o le salamo i aso taitasi.¹

Sa taitai mai le Faaola e ala i faataitaiga. Na faamatala mai faapea e Elder Stephen A. West:

I le vaeluaga o taimi, faatasi ai ma isi mea, sa tuuina atu e le Faaola se pa’i mai iinei, se upu alofa iina, meaai (moni ma faaleagaga) i e fia aai, aoaoga ma fautuaga i e sa manaomia. Na Ia tuuina atu tatalo faatasi ma e na fefefe, agalelei i e na le amanaiaina, faaaloalo ma le alofa mo fanau, tausiga alofa ia i latou o e ua mafatia i avega. ‘Ma ua faapea e mafai ona tatou vaai ai e mafai e le Alii ona faataunuu mea tetele i ala faatauvaa’ (1 Nifae 16:29). ‘O le mea lea, aua le faavaivai i le faia o mea lelei, ona o loo oulua faataatiaina le faavae o se galuega tele. Ma e mai mea iti e tutupu mai ai mea tetele’ (Mataupu Faavae ma Feagaiga 64:33).”²