O Tulaga Tutusa i le Soifuaga Faaletagata ma le Faapolofesa mo Uili Hopoate

O Uili Hopoate, e taalo i le tulaga ogatotonu i le laina i tua mo le Kalapu Lakapi a St. Helens ma o se tagata o le Ekalesia, na te faafetai i aoaoga a le talalelei i le fesoasoani ia te ia e faapaleni lona soifuaga faaletagata ma le faapolofesa.

Fai mai o ia, “I le gaoioiga fetuutuunai o le tau faapaleniina o le galuega, aiga, ma le Ekalesia, ua fesoasoani le talalelei i mea e faamuamua ma vaaiga mo a’u ma lo’u aiga. Faatasi ai ma le fesoasoani a lo’u toalua, ou te taumafai e faamuamua le Alii, sosoo mai ai lo’u aiga ona sosoo ai lea o la’u galuega. O a’u o se tagata taalo lakapi. O la’u mea lea e fai—ae e le o a’u lea.”

O Uili Hopoate na fanau ma ola a’e i se aiga o le Au Paia o Aso e Gata Ai e sefulutasi se fanau o le latou tama, o Sione, sa taalo lakapi foi. Na amata ona taalo lakapi liki faapolofesa i le 2010 i Ausetalia. Na ia teena se konekarate e sili atu ma le miliona tala ina ia auauna atu i se misiona lua-tausaga mo le Ekalesia i Brisbane, Ausetalia.

Ua ia faafetaia le aafiaga o lana misiona i le fesoasoani ia te ia e atinae le taula faaleagaga o loo ia te ia i le asō.

“O le matua tele lava o mea ou te faaaogaina i lo’u olaga i aso faifaipea ia sa ou aoaoina mai i la’u misiona i tulaga o le puleaina o le taimi, mea e faamuamua ma mausa. Ou te vaai i se misiona o se avanoa e sili atu nai lo o se osigataulaga aua o mea faaleagaga na ou mauaina mai e sili atu nai lo le ositaulaga.”

Ina ua mae’a lana misiona, sa mulimuli ane taalo Uili mo le au a Canterbury Bulldogs i Ausetalia. A o faamaeaina lana konekarate, sa valaaulia Uili e le faiaoga o Kristian Wolff e taalo ma tauva mo le au R.F.C. a St. Helens e amata i le 2022 mo le lua tausaga, ma le avanoa e filifili ai mo se tausaga lona tolu.

Ina ua fesiligia o ia po o le a se vaaiga a lana au i lona faatuatuaga, ua tali Uili faapea, “E matua faaaloalo lava i latou. Afai e faatuina ou tulaga faatonuina ma mataupu taua mai lava i le amataga, e aveesea ai le tele o luitau.”

Na ia toe faaopoopo mai, “I le faagasologa o tausaga ua mafai ona ou vaai i auala ua matua fesoasoani ai lava aoaoga o le talalelei i tulaga o le tausia o lo’u saogalemu mai faalavelave i fafo atu o le malae taalo. Faatasi ai ma le usiusitai i se tulafono o le soifua maloloina ma le ola mama, ua puipuia ai a’u mai taunuuga ua maimau ai galuega po o konekarate a nisi tama taaalo ona o a latou amio le taupulea.”

A oo mai aafiaga luitau, e pei o le feagai ma manuaga po o le toesea mai le aiga mo taaloga, fai mai Uili e faalagolago o ia i lana sootaga ma le Faaola ma le tele o tausaga na aoao ai le amio taupulea ma lona avea ma soo.

O le au sili ona taua a Uili o le au na ia fatuina ma lana avā, o Jimicina “Jimi”, ma le la fanau e toafa. E fiafia tele i latou e i ai i Peretania ma aafiaga i lana aganuu, e aofia ai le vaai i le kiona mo le uluai taimi. E ui o o latou aiga o loo i Ausetalia, latou te lagonaina le lagolago a a latou uo i Peretania ma le nuu o le Ekalesia.

Fai mai Uili faapea o Jimi e faia se vaega matua taua i le faamanuiaina o lo latou aiga. “Na te ofoina mai le faamalosiauga ma le lagolago faaletino ma le faalemafaufau ia te a’u ma le fanau.”

“Ou te lagona e pei o maua uma e tatau ona matua mataalia i a ma matafaioi o ni matua,” o le tala lea a Jimi. “A lelei mea i le aiga ma le ma faaipoipoga, e mafai ona alu Uili i le toleniga ma le taulaiga ma le malosi na te manaomia.”

Na ia faaopoopo mai, “O le tasi o mea e foliga mai e musuia ai i latou o e mulimulitaia matou i luga o fesootaiga faaleagafesootai, o le matafaioi faamoemoeina lea a Uili i le aoaoina i le ma fanau o le talalelei. Na te taitaia le fanau i tatalo faaleaiga ma tuuina atu le tele o taumafaiga i le saunia o lesona o le talalelei e pei lava sa na ia faia o se faifeautalai.”

Ua faaauau pea le talanoa a Jimi, “E matua fiafia tele ai le ma fanau aua e aoaoina i latou e Uili i se auala e mafai ai ona latou malamalama. O le afiafi faaleaiga o se faamanuiaga tele mo le matou aiga.”

O le tele o tausaga o aoaoina e avea ma soo ma amio taupulea ua faaleleia atili ai ia tomai o Uili Hopoate i totonu o le aiga ma luga o le malae lakapi.

Ina ua fesiligia e uiga i le tuuina atu o se fautuaga i se tagata o loo tuliloaina se matata faaafeleti ua ia faapea mai, “Ou te manatu o le mea sili ma le muamua lava o le tatau lea ona e fiafia i ai. Ou te fiafia tele e taalo lakapi ma o lena mafaufauga e fesoasoani e uunaia a’u i taimi o luitau po o manuaga.”

Ua faaiu faapea Uili, “Atonu o loo i ai tagata e sili atu ona talenia, televavave, pe sili atu nai lo oe. Afai e te fiafia i le mea o loo e faia ma puleaina oe e pei o le tausia o le taimi, auai ma i ai se mafaufauga lelei, e mafai ona faamanuiaina oe i soo se matata.”