Lima Fesoasoani Laiti i Samoa

Ua faapea le tala o fanau o lo tatou faamoemoe mo le lumanai. O fanau lelei o le Uarota o Navu, Samoa 1 (aulotu) o Le Ekalesia a Iesu Keriso o le Au Paia o Aso e Gata Ai ua uma ona latou faapupulaina tele le lumanai.

I le taeao mālū ma puaoa o Mati 25, sa latou totoina ai ni tamai laau se 300 i le Faasao Faafiafia o Malololelei ma le fesoasoani a o latou taitai faalelotu ma matua.

O le poloketi auauna fesoasoani a le fanau sa galulue faatasi ai ma le Matagaluega o Punaoa Faalenatura ma le Siosiomaga (MNRE) O le latou Faalauiloa e Toto Laau e Tolu Miliona, o se taumafaiga e puipuia ai meaola eseese o Samoa.

Sa fiafia le fanau e auauna ai i se auala limalima e faatino ai. Sa latou iloa ai le lagona o le saofagā o se mea lelei i lo latou nuu ma le faia o se eseesega.

Fai mai Charity Manua e sefulu tausaga ma foliga ataata, “Sa matuai ou fiafia lava i le gaoioiga o le totoina o laau. Sa ou aoao ai o laau e maua ai e i tatou le ea e manavaina i aso taitasi ma mo manulele e nonofo ai. E ala i le totoina o laau, ua matou fesoasoani ai i le siosiomaga ma manu ma manulele eseese i le vaomatua. Sa ou lagona le fiafia ma ou alofa tele i lenei gaoioiga.”

“Sa ou maua le fiafia tele,” na faasoa mai ai Jonnie Tuitogamatoe Tuia e valu tausaga le matua. “Sa ou fiafia e faatasi ma a’u uo ma fesoasoani i le lalolagi e ala i le totoina o laau. Na faafiafiaina a’u e iloa o le mea lea e finagalo lo tatou Tama Faalelagi tatou te faia, ma o le a faafiafiaina ai foi o Ia. Ou te fiafia tele i lenei gaoioiga.”

Na lagolagoina e Falefatu Laban, e iva tausaga, ma faaopoopo mai, “Ina ua ta’u mai ia te a’u le mea e fai, sa ou matua fiafia lava ma faagaeetia e aoao e toto laau ma o lea la ua ou iloa o laau e puipuia le lalolagi. Na ou aoaoina latou te aumaia ia i tatou le ea, vailaau ma laupapa e fau ai o tatou fale. Ou te manao e toe faia isi gaoioiga faapea aua e matua taua tele laau mo tagata uma.”

Na matua faafiafiaina taitai faalelotu matutua o e na malaga faatasi ma le fanau e vaai atu o loo latou talisapaia le avanoa e auauna ai.

“O le gaoioiga o le totoina o laau o se aafiaga ofoofogia,” fai mai ai Eric U.J Tuia. “Mai le amataga, na mafai ona matou vaai atu i le tiotio fiafia i mata o le fanau. Ese le maoae o le vaai atu ua auai i latou i le faia o auaunaga i le nuu.”

Na ia faaauau, pea “Sa ou matua lagonaina lava se faatasi malosi mai o le Agaga o Keriso ma i matou i le taimi o lenei poloketi. Sa susulu mai i le fanau le olioli ma le fiafia a o latou totoina le latou uluai laau ma vave lava ona toe tamomoe e aumai isi laau e toto. E ui lava na amata na timu mulimuli ane i lena aso, ae na foliga mai e lei afaina ai lo latou naunautaiga mo le taumafaiga e toto ia tele laau latou te mafai. Oka se vaaiga i lena aso, ma oka se aafiaga matua matagofie lava. O le a le galo lava i tamaiti lenei mea.”

Na faaopoopo mai Eseese Moke Ah Sam, “O se avanoa taua le molimauina o le naunautaiga i a tatou fanau e toto laau. Sa ou lagonaina le faamanuiaina ma i ai se lagona lofituina i le olioli o lea na aoaoina e fanau ina ia faaalu lo latou lava taimi ma le malosi e tausia le siosiomaga. Ua latou malamalama nei o le finagalo lea o le Atua ina ia latou faafaileleina ma tausia le paneta ua Ia faamanuiaina ai i tatou.”

O le a tutupu faatasi ae ia le fanau ma tamai laau, ma i o latou lava ala, o le a latou faia ai lo latou lalolagi e avea o se nofoaga sili atu le lelei e nonofo ai. O le a faamatagofieina e laau ma faaopoopo maia le okesene i le lalolagi ma na aoaoina e fanau o i latou foi e mafai ona auauna atu e faaoaina ma faaopoopo le ola i o latou nuu.