Pāruruhia i roto i tōna nā rima

E toru tamari’i tā māua tā’u tāne ’o Eddie Uele : Indie-Rose, Rollo ’e Kamaukiterangi (Kamau). I te 12 nō Tenuāre 2022, ’ua pohe tā māua tamaiti e 2 matahiti, ’o Kamau.

I taua avatea ra, ’a ha’uti ai ’e ’a ’ata ai māua ’e tā māua mau tamari’i i roto i tō māua piha, ’ua ta’a atura ia māua ē ’ua mo’e o Kamau. Tau taime i muri a’e, ’ua ’itehia mai o Kamau ma te ma’ama’airā’au i roto i tō mātou ’āua. ’Ua rave o Eddie i te ’ohipa fa’aorara’a e tae roa atu i te taime ’ua tae mai te mau tuati ma’i ’a tāparu ai tō’u ’utuāfare ’e ’o vau nei i te tauturu a te Metua i te Ao ra.

’Ua fa’ahoro-rū-hia o Kamau i te fare ma’i i reira te hō’ē pupu taote e tīa’i noa maira iāna. I tō māua taera’a atu, ’ua ’āfa’ihia māua Eddi i roto i te hō’ē piha mo’emo’e i reira māua e tāpe’a ai i te rima, ma te pure tāmau noa. I te pae hope’a, ’ua tomo mai te hō’ē taote, ’ua pārahi i mua ia māua ’e ’ua ha’amata i te paraparau.

’Aita i nehenehe iā’u ’ia fa’aro’o i te mau parau tāna i parau mai ’a riro ai te mau mea ato’a nā piha’iho iā’u ’ei mea hau, te māniania ’ore ’e te marū—i muri iho, ma te māramarama maita’i, ’ua ’ite au i tā’u tamaiti i mua iā’u te ha’uti ra e te hō’ē pere’o’o ha’uti, te ’ata ra ’e te ’oa’oa ra. I reira tō’u ’itera’a ē, ’ua pohe tā’u tamaiti. ’Ua ’ite ato’a vau ē, teie te rāve’a a te Metua i te Ao ra nō te fa’aineine iā’u nō te mau mea e tupu a muri a’e.

I muri a’e i taua pō ra tō’u ta’a-maita’i-ra’a i te aura’a hanahana o taua taime ra.

’Ua tāpe’a maira tō’u metua vahine iā’u i roto i tō’u rima ’a ta’i noa ai au, ma te ’ore e nehenehe e fa’a’oroma’i i te pohera’a o tā’u tamari’i. ’Ua ui mai ’oia iā’u : « ’ua riri ānei ’oe i tō tātou Metua i te Ao ra ? » Nā ’ō atura vau : « ’Aita, ’aita vau i riri, terā rā, ’aita ’oia i tāu’a mai iā’u, e māmā. ’Ua tāparu vau iāna ’eiaha e rave i tā’u tamaiti. ’Ua tāparu vau i tō tātou Metua i te Ao ra ’ia vaiiho iāna ’ia fa’aea mai. ’Aita rā ’oia i tāu’a mai iā’u.

’Ua parau mai tō’u metua vahine iā’u ma te here : « ’Aita te Metua i te Ao ra i tau’a ’ore ia ’oe. ’Ua fa’aro’o ’oia ia ’outou. ’Ua rave ’oia i te hō’ē semeio nā roto i te ’īritira’a i te pāruru i te ra’i ra ’e tē fa’ati’ara’a ia ’outou ’ia ’ite ē, tei piha’i iho ’oia ia Kamau, ’e e vai hau noa o Kamau i roto i tōna nā rima.

I muri a’e i taua matahiti ra, i te ’ōpani ’īriti nō te hiero nō Hamilton Niu Terani, ’ua tupu te mana’o pe’ape’a ’e te hepohepo i roto iā’u. ’Ua parau vau i tā’u tāne fa’aipoipo, « tē mana’o nei au ē tē tīa’i nei ’o Kamau iā’u i roto i te hiero. Tē mana’o nei au ē, e pārahi mai ’oia i piha’i iho iā’u. »

I roto i te hiero, te piha noa tā’u i hina’aro roa e hi’o, o te piha tiretiera ïa. ’A tīa’i noa ai mātou nō te tomo i roto, nā ’ō maira tō mātou ta’ata arata’i i tā mātou pupu ē, « te tātarahapa atu nei au, terā rā, ’aita tō tātou e taime rahi i roto i te piha tiretiera. E nehenehe rā tā’u e fafau atu ia ’outou, te mau taea’e ’e te mau tuahine ē, noa atu e mea poto tō ’outou taime, e nava’i noa te mau ha’amaita’ira’a tā ’outou e fāri’i nō te tāpe’a ia ’outou e a muri noa atu. Hau atu i te faufa’a rahi, ’e fāri’i ’outou i te here o tō tātou Fa’aora ’o Iesu Mesia. »

’A fātata ai māua i te tomo i roto, ’ua tāpe’a maira tā’u tamāhine Indie-Rose i tō’u rima ’e nā ’ō maira ma te ’oa’oa, « Māmā, teie ānei te tao’a ta’a ’ē tā ’oe i parau mai iā’u ? » Nā ’ō atura vau ē, « ’E, ’ua ti’a te reira. » I muri iho ’ua ui mai ’oia iā’u, « Mai te reira ānei te huru ’ia ’ite ana’e tātou ia Kamau ? » Nā ’ō atura vau ē, « ’Oia ïa, mai te huru ē, tē haere ra tāua nā te poro ’e tei reira ’oia. »

’Ua tahe te roimata i ni’a i tō’u mata i te tāpe’ara’a-hia te parau tapu tā tō mātou ta’ata arata’i i fa’ahiti nā mua atu. ’Ua nehenehe iā’u ’ia fāri’i i te here mau o tō tātou Fa’aora ’o Iesu Mesia tei tāmāhanahana iā’u. ’Ua ’ite au ē, ’ua riro mau te mau parau a tō mātou ta’ata arata’i ’ei poro’i nō ’ō mai i te Metua i te Ao ra iā’u nei, ma te parau mai iā’u ē, noa atu ē, e taime poto tō’u i piha’i iho i tā’u tamaiti, ’ua nava’i te mau ha’amaita’ira’a ’e te here tā’u i fāri’i nōna nō te tāpe’a iā’u e a muri noa atu.

I roto i te mau piha ato’a o te hiero—te mau hōho’a ’e te mau mea ri’i ato’a—’ua ti’a iā’u ’ia fāri’i i te vārua o tā’u tamaiti nehenehe roa ’o Kamau. ’Ua riro te reira ’ei ha’apāpūra’a iā’u ē, e ti’a iā’u ’ia haere i te hiero. ’Ua fa’aha’amana’o mai te Metua i te Ao ra ’e o Iesu Mesia iā’u i te tāmāhanahanara’a ’e te fa’aorara’a hanahana tā’u e nehenehe e fāri’i i roto i tōna mau papa’i nā roto i te mana fa’atupu o te Tāraehara a tō tātou Fa’aora o Iesu Mesia.

’Aita ā te hiero i riro a’enei ’ei mea faufa’a a’e i roto i tō’u orara’a i teie mahana.