Fakaʻilekitulōnika Pē
Ngaahi Moʻoni Fakatokāteline ʻe 4 ke Tokoni ki Hono Ikunaʻi ʻo e Loto-foʻí
ʻE lava ke tokoni ʻa hono ako ʻo e ngaahi ʻahiʻahi ʻo Sōsiua mo Siosefa Sāmitá ke tau ikunaʻi mo hotau ngaahi ʻahiʻahí.
ʻI he taimi naʻe ui ai ʻa e palōfita ko Sōsiuá ke ne tataki ʻa e fānau ʻo ʻIsilelí ki he fonua ʻo e talaʻofá, naʻá ne ongoʻi lōmekina ʻi he ngāue naʻe hanganaki mai mei muʻá.
Naʻe folofola ange ʻa e ʻEikí ʻo fakalotolahiʻi ia, “Ke ke mālohi koe peá ke loto toʻa; ʻoua naʻá ke manavahē, pea ʻoua naʻá ke puputuʻu: he ko [e ʻEiki] ko ho ʻOtuá ʻoku ʻiate koe ia ʻi he potu kotoa pē ʻokú ke ʻalu ki ai” (Sōsiua 1:9).
ʻI he taimi naʻe tuku pōpula ai ʻa e Palōfita ko Siosefa Sāmitá ʻi he Fale Fakapōpula Lipetií, naʻá ne loto-foʻi koeʻuhí ko e fakatanga fakalilifu ki he Kāingalotú.
Naʻe folofola ʻa e ʻEikí ʻo pehē:
“ʻE hoku foha, ke ʻi ho laumālié ʻa e melinó; ʻe kiʻi fuofuoloa siʻi pē ʻa hoʻo faingataʻaʻiá pea mo hoʻo ngaahi mamahí;
“Pea ʻe toki hākeakiʻi koe ʻe he ʻOtuá ʻi ʻolunga ʻo kapau te ke kātakiʻi ia ʻo lelei; te ke ikunaʻi ʻa ho ngaahi fili kotoa pē” (Tokāteline mo e Ngaahi Fuakava 121:7–8).
Naʻe fakafiemālieʻi foki ʻe he ʻEikí ʻa Siosefa ʻaki ʻEne folofola ʻo pehē:
“Ke ke ʻiloʻi, ʻe hoku foha, ʻe foaki ʻe he ngaahi meʻá ni kotoa pē ʻa e potó kiate koe, pea ʻe hoko ia ʻo ʻaonga kiate koe.
“Naʻe ʻalu hifo ʻa e Foha ʻo e Tangatá ʻo māʻulalo ange ʻiate kinautolu kotoa pē. ʻOkú ke lahi ange koe ʻiate ia?” (Tokāteline mo e Ngaahi Fuakava 122:7–8).
Naʻe hanga nai ʻe he ʻEikí ʻo toʻo ʻa e ngaahi faingataʻaʻia ʻa e ongo palōfitá ni, ʻa Sōsiua mo Siosefá? ʻIkai. Ka naʻá Ne vahevahe ʻa e ngaahi moʻoni fakatokāteline ko ʻení:
-
ʻOku ʻiate kitautolu maʻu pē ʻa e Tamai Hēvaní pea mo Hono ʻAlo ko Sīsū Kalaisí.
-
ʻI he taimi ʻoku tau vakai ʻaki ai ʻa e fakakaukau ʻoku taʻengatá, ʻe mole atu leva hotau ngaahi faingataʻá.
-
ʻE ʻomi ʻe hotau ngaahi faingataʻá ha taukei kiate kitautolu.
-
ʻOku ʻafioʻi moʻoni mo kakato ʻe Sīsū Kalaisi kitautolu pea mo e meʻa ʻoku tau fouá.
ʻI he taimi pē ʻoku tau ongoʻi loto-foʻi aí, te tau lava ʻo lotu ki heʻetau Tamai Hēvaní ke maʻu ha fakamoʻoni ki he ngaahi moʻoni fakatokāteline ko ʻení ʻi he mālohi ʻo e Laumālie Māʻoniʻoní.
Ako lahi ange ʻo kau ki hono tokangaekina ʻo e loto-foʻí ʻi he konga “Moʻui Lelei Fakaeʻatamaí” ʻo e ngaahi maʻuʻanga tokoni ki he Tokoni ʻo e Moʻuí ʻi he Gospel Library.