Filisi Kalake, Tuʻu Maʻu mo Faivelenga ʻi he Taʻu ʻe 100

Naʻe ʻikai fiemaʻu ʻe Filisi Kalake ha tokanga makehe pe kātoanga fakafiefia ʻi hono taʻu 100.

Neongo iá, ka naʻe kehe ʻa e ongo ia ʻa e fāmilí mo e ngaahi kaungāmeʻá. Naʻa nau totongi ha pasi ke fakaʻeveʻevaʻi ai ʻa Filisi ʻi he feituʻu Fakatokelaú, maʻu meʻatokoni ika mo e pateta fakapaku—ko e kai lelei taha ia ki he kakai Nuʻu Silá—ʻi he matātahi Paihiá pea mo ha maʻu meʻatokoni fakafiefiaʻi ʻo e makamaile mahuʻinga ko ʻení mo ha ngaahi kaungāmeʻa ʻe toko 200 mei he koló mo e siasí.

ʻOku fakamatalaʻi ʻe he foha ko Peulí ʻa Filisi ko ha “Tokotaha taʻefeliliuaki; ko ha taha kuo ʻikai teitei fakavaivai ka kuó ne faivelenga ʻi heʻene līʻoa ki he fāmilí, siasí mo e koló.”

ʻOku moʻui ʻaki ʻe Filisi ʻa e ongoongolelei ʻo Sīsū Kalaisí. ʻOkú ne pehē, “Kuo tataki ʻeku moʻuí ʻe he ngaahi akonaki fakalaumālie ʻi he Siasi ʻo Sīsū Kalaisí, ʻokú ne ʻomi ha ngaahi fakahinohino ki he meʻa ke u faí mo ʻikai ke fai ʻi he taimi ʻoku ou fakahoko ai ha ngaahi filí.”

Naʻe manatu ʻa Peuli ʻo pehē, “ʻI heʻemau kei īkí, naʻe vahevahe ʻe heʻeku faʻeé ha ngaahi talanoa mei he Tohi ʻa Molomoná ʻi he pongipongi kotoa pē kimuʻa pea mau ʻalu ki he akó. Naʻa mau lotu fakafāmili fakataha mo lotu fakataha ʻi he taimi maʻu meʻatokoní.

“Kuó ne moʻui ʻaki e ongoongoleleí ʻi he ʻaho kotoa pē. Kuo teʻeki ai ke ne foʻi,” ko e fakamatala ia ʻa Peulí.

ʻI he taʻu 70 ʻo Filisí, naʻá ne tali ha uiuiʻi ke ne tataki e houalotu ʻo e Kau Finemui fakalotofonua ʻo e Siasí, ʻa ia ʻoku tokoni ki he fānau fefine taʻu 11–18 ke nau ako mo moʻui ʻaki ʻa e ongoongolelei ʻo Sīsū Kalaisí pea fakatupulaki ʻenau tui kiate Iá.

ʻI hono taʻu 100, ʻoku kei hokohoko atu pē ʻa e tokoni ʻa Filisi ki he kakai fefine ʻi he kāingalotú ʻaki ʻa e ʻofa, mateaki, mo e poupou. ʻOku ʻofaʻi mo fakamahuʻingaʻi ia ʻe he taha kotoa.

ʻOku poupouʻi ʻe Filisi ʻa e kakaí ke nau mālohi ʻi he moʻuí ʻo fakatatau ki he ngaahi akonaki ʻa Sīsū Kalaisí. ʻOkú ne pehē, “Tatau ai pē pe ʻokú ke pehē ʻoku faingataʻa ke moʻuiʻaki e ongoongoleleí, hokohoko atu pē hono fai iá. Hokohoko atu pē.”

Naʻe faʻeleʻi mo tupu hake ʻa Filisi ʻi Malomaku, Fonua Fakatokelaú, Nuʻu Sila. Naʻe nofo ofi mai pē ʻa Kōlini Kalake, ko e husepāniti ʻo Filisi kuo mālōloó. Naʻe fakahoko ʻena malí ʻe Palesiteni Mātiu Kauli ʻi he Falelotu Malomakú ʻi he ʻaho 4 ʻo Sānuali 1945.

Naʻe fakaava ʻe Kōlini ha fale tauʻanga meʻalele naʻe ui ko e Fale Tauʻanga Meʻalele ʻa Kalaké peá ne fakaʻuli ʻi he pasi ako fakalotofonuá. ʻI he taimi naʻe femoʻuekina ai ʻa e fale tauʻanga meʻalele ʻa Kalaké, naʻe ʻikai lava ke maʻu ha taimi ʻo Kōlini ke ne fakaʻuli ai ʻi he pasi akó, ko ia naʻe tokoni leva ʻa Filisi. Naʻe hoko atu ʻene fakaʻuli ʻi he pasi akó ʻi he taʻu ʻe 40 hono hokó.

Naʻe pehē ʻe Filisi, “Kuo hoko e fānaú ko ha fakalahi ki hoku fāmilí. Naʻá ku sio kiate kinautolu ʻi he ʻaho kotoa pē, kae ʻoua kuo ʻosi ʻenau kalasi onó pea nau hū ki he akoʻanga māʻolungá. Naʻa nau ui au ko ʻʻAnitī Filiʻ. ʻOku ou kei fetuʻutaki pē mo hanau niʻihi ʻi he ʻahó ni.”

Kuo tāpuekina ha ngaahi toʻu tangata lahi ʻe he ʻofa ʻa Filisi Kalaké mo ʻene sīpingaʻo e tuí mo e ngāue mālohí.