Mei he Fakapoʻulí ki he Māmá

Naʻe fefaʻuhi ʻa Tāliala mo ha maʻunimā ʻe he faitoʻo konatapú ʻi ha taʻu ʻe 10 kimuʻa peá ne fakakaukau ke liliu e huʻunga ʻo ʻene moʻuí.

ʻOkú ne pehē, “Hili ha taʻu ʻe 10, naʻá ku ʻi ha tuʻunga faingataʻa ʻaupito.Ko e ngaahi ʻaho faingataʻa ia.”

“Ko ʻeku ongomātuʻá … naʻe maʻunimā foki mo kinaua ʻe he faitoʻo konatapú mo e kava mālohí. Naʻe ʻi ai ha ngaahi palopalema ʻi hono tauhi kimautolú. Naʻe mālōlō ʻeku fineʻeikí ʻi hoku taʻu faá.”

Naʻe hoko atu ʻa Tāliala, ʻa ia ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻo pehē: “Naʻe ʻikai ke siasi ʻeku kui fefiné, ka naʻá ne ʻave kimautolu ki he lotú mo tokoniʻi hoku tuongaʻané ke papitaiso.”

ʻOkú ne tui naʻá ne ʻi ha tuʻunga faingataʻa ʻaupito kimuʻa peá ne toki fakatokangaʻi ʻoku fiemaʻu ke ne foki ki he lotú. Naʻe fiemaʻu ʻe Tāliala ke foki ʻo lotu mo fakafeohi koeʻuhí he naʻá ne fiemaʻu ke maʻu “ʻa e maama” naʻe lava ke ne mamata ki ai ʻi he fofonga ʻo kinautolu ʻoku nau moʻui ʻaki ʻa e ongoongolelei ʻo Sīsū Kalaisí.

Naʻá ne pehē, “Naʻá ku loto ke tuku kakato hoku lotó ki he ongoongolelei ʻo Sīsū Kalaisí.”

ʻI he taimi naʻá ne fakakaukau ai ke foki maí, naʻe vahevahe ʻe Tāliala haʻane tohi ʻi he Facebook ʻo ʻeke pe ʻoku ʻi ai ha ʻapisiasi ʻo e Kau Māʻoniʻoni ʻi he Ngaahi ʻAho Kimui Ní ʻi Uelifooti, Nuʻu Sila, ʻa ia naʻá ne nofo aí. Naʻe tali mai ʻe ha mēmipa ʻo e kāingalotú ʻo pehē ʻoku fai e lotu ʻi he Sāpate kotoa pē ʻi he 10 a.m. ʻI he Sāpate hono hokó, naʻe ʻalu ʻa Tāliala mo ʻene kiʻi pēpē māhina tolu ko Keisoní ki he lotú.

ʻOkú ne manatuʻi naʻe ʻi ai ha ongo māfana ʻi he falelotú, pea naʻe talitali lelei ia ʻe he kakaí.

“ʻI heʻeku hū atu ki he falé, naʻá ku ongoʻi ʻo hangē ʻoku ou ʻi ʻapi mo hoku ngaahi tokouá mo e tuongaʻané. Ne u ongoʻi e ʻofa ʻa e ʻOtuá, ne u ongoʻi e Laumālié, pea ne u ʻiloʻi ko e feituʻu ʻeni ʻoku finangalo ʻa e ʻEikí ke u ʻi aí.”

Naʻe pehē ʻe Tāliala naʻe hoko hono maʻu ʻo e sākalamēnití ko ha meʻa kehe kiate ia ʻo laka ange ʻi ha toe taimi kimuʻa. Naʻá ne pehē, “ʻI heʻeku fuofua maʻu ʻa e sākalamēnití, ne u fakakaukau ko e mā pē mo e vai, ka ko e taimi ní ʻoku hangē ʻoku ou ongoʻi ʻEne mamahí (ʻa Sīsū Kalaisí). ʻI heʻeku maʻu ʻa e sākalamēnití ʻoku ou manatuʻi ʻa Sīsū, ko Hono tutukí mo e ongo naʻá Ne maʻú.

“ʻOku ou ongoʻi Ia ʻo aʻu ki heʻeku hivaʻi e ngaahi himi sākalamēnití. Ko ha taimi makehe ia. ʻI he hoko mai ʻa e ʻaho Mōnité, ʻoku ʻikai ke u faʻa tatali ke aʻu ki he Sāpaté ke u toe ʻi heni ai.”

ʻOkú ne manatu ki ha momeniti fakaʻofoʻofa ʻi hono maʻu hono tāpuaki fakapēteliaké.

ʻI heʻene fononga atu ke maʻu ʻa e tāpuakí, naʻe pehē ʻe Tāliala naʻe “fakaʻohovale” ʻa e anga e tuʻu ʻa e ʻeá pea naʻa ne hohaʻa naʻa tāpuni ʻa e ngaahi halá ʻi ha faʻahinga taimi pē. Ka naʻá ku lotua pē peá u lava. Naʻe tāpuni e ngaahi halá ʻi he hili ha miniti ʻe hongofulu mei ai.”

ʻI heʻene aʻu atú, naʻá ne maʻu ha fakamoʻoni ki he ʻofa ʻa e Tamai Hēvaní kiate iá. “Naʻe ongoʻi moʻoni ʻe he Pēteliaké ʻa e Laumālié. Naʻá ma fakatou tangi.”

ʻOku pehē ʻe Tāliala, “ʻOku tokoniʻi au ʻe he lau folofolá he lolotonga ʻo e uiké. ʻOku fakamanatu mai kiate au ʻe he lau kimuʻa pea toki mohé ke u fakamuʻomuʻa ʻa e Fakamoʻuí ʻi heʻeku moʻuí. Kapau he ʻikai ke u lau folofola he ʻaho takitaha, ʻoku ʻikai ke u ongoʻi foki mo Ia.”

Naʻá ne hoko atu, “ʻOku akoʻi lahi kimaua ʻe he folofolá. ʻOku hoko ia ko ha fakahinohino kiate kimaua ʻi heʻema moʻuí. Naʻá ku lau e folofolá ki heʻeku pēpeé. ʻOku ou fakaʻamua ha moʻui lelei maʻana. ʻOku ou saiʻia ʻi hono akoʻi kitautolu ʻe he ongoongolelei ʻo Sīsū Kalaisí ke tau ʻofa ʻi he taha kotoa pē.”

ʻOku saiʻia foki ʻa Tāliala he feohi mo e kau faifekaú. ʻI heʻene ongoʻi fiefia ʻi he ongoongolelei ʻo Sīsū Kalaisí, naʻá ne kamata vahevahe ai ʻa e folofolá mo e kakaí, pea fakaafeʻi kinautolu ke nau maʻulotu fakataha.

Naʻe toki hiki mai ʻa Tāliala ki Peefi, ʻAositelēlia, ʻa ia ʻokú ne maʻulotu ai ʻi he Sāpate kotoa pē ʻi he feituʻu Lōkingihamí. Kuó ne maʻu ʻeni ha lekomeni temipale, kuó ne ongoʻi fiefia ʻi heʻene ʻalu ki he Temipale Pēfí. Naʻá ne pehē, ʻi heʻeku sītuʻa ko ʻeni mei he ngaahi ʻaho faingataʻá, “ko e ngaahi ʻaho lelei pē he taimi nī. Kuo faitāpuekina kimaua.”

Naʻe pehē ʻe Tāliala, “ʻI he ʻahó ni, ʻoku ou fie fakamālō ki he kakai fakaʻofoʻofa kotoa pē kuo nau hoko ko ha konga lahi ʻo ʻeku fonongá ʻi hono tokoniʻi au ke u lavaʻi hoku ngaahi taimi faingataʻa fakaelotó. ʻOku ou vilitaki atu ki muʻa ʻi he taimi kotoa pē, ʻoku ou houngaʻia ʻiate kimoutolu kotoa pea ʻoku ou ʻofa ʻiate kimoutolu.

“Meiate au mo Keisoni, ʻokú ma fakamālō atu.”