ʻOku Fakahaaʻi Mai ʻe Sīsū Kalaisi ʻa e Founga Ke Tau ʻOfa ai ki he Niʻihi Kehé

Fakaafeʻi ha taha ʻo e fānaú ke ne fai ʻa e fua lotú.

Talaange ki he fānaú, naʻe akoʻi kitautolu ʻe Sīsū Kalaisi ʻi he taimi naʻá Ne nofo ai ʻi he māmaní ke tau ʻofa ki he niʻihi kehé; naʻá Ne fakahā mai kiate kitautolu ʻaki ʻa e ngaahi meʻa naʻá Ne fakahokó. Hivaʻi pe lau ʻa e tau ʻo e “ʻOku ou Feinga ke Hangē ko Sīsuú” (Tohi Hiva ʻa e Fānaú, 40–41) pea fai ʻa e fakatātā ʻoku hā atu ʻi laló. Fakaafeʻi ʻa e fānaú ke nau kau fakataha mo koe.

Fakahā ki he fānaú ha tatau ʻo e folofolá. Talaange kiate kinautolu ʻoku tau ako ʻi he folofolá ʻa e founga naʻe fakahā ʻaki ʻe Sīsū ʻa e ʻofá. Fakamatala fakanounou ʻa e ngaahi talanoa ko ʻení:

Talanoa 1 (fakaʻaliʻali ʻa e fakatātā ʻi he peesi 27): Naʻe tokolahi ʻa e kakai ne omi ke fanongo ki he malanga ʻa Sīsuú. Naʻa nau ʻi ai ʻi ha taimi lōloa pea ne nau fuʻu fiekaia (ʻai ʻa e fānaú ke hangē ʻoku nau fiekaiá). Naʻe ʻi ai ha kiʻi foʻi mā siʻisiʻi mo ha mataʻiika ke fafangaʻaki ʻa e kakaí kotoa. Naʻe tāpuakiʻi ʻe Sīsū ʻa e meʻakaí peá Ne fekau ʻEne kau ākongá ke tufa atu ki he kakaí. Naʻe maʻu ʻe he tokotaha kotoa ha meʻa ke ne kai pea toe lahi pē mo e meʻakai naʻe toé (ʻai ʻa e fānaú ke hangē pē ʻoku nau kaí). (Vakai Mātiu 14:13–21.)

ʻAi ʻa e fānaú ke nau lea fakataha mo koe, “Naʻe fakahā mai ʻe Sīsū kiate kitautolu ʻa e founga ke tau ʻofa ai ki he niʻihi kehé.”

ʻĪmisi

coloring page, sharing basket of food

Talanoa 2 (fakaʻaliʻali ʻa e fakatātā ʻi he peesi 26: ʻI he ʻaho ʻe taha naʻe vakai atu ʻa Sīsū ki ha tangata naʻe kui—naʻe ʻikai ke ne lava ʻo sio (ʻai ʻa e fānaú ke fakapuliki honau matá). Naʻe tāpuakiʻi ʻe Sīsū ʻa e tangatá kae lava ke ne sio (ʻai ʻa e fānaú ke fakaʻasi honau matá). (Vakai ki he Sione 9:1–12.)

ʻAi ʻa e fānaú ke nau lea fakataha mo koe, “Naʻe fakahā mai ʻe Sīsū kiate kitautolu ʻa e founga ke tau ʻofa ai ki he niʻihi kehé.”

ʻĪmisi

Jesus blessing blind man

Talanoa 3 (fakaʻaliʻali ʻa e fakatātā ʻi he peesi 22): Hili ʻa e toetuʻu ʻa Sīsuú, naʻá Ne ʻaʻahi ki he Kau Nīfaí. Koeʻuhí naʻá Ne ʻofa ki he fānaú, naʻá Ne tāpuakiʻi tahataha kinautolu (ʻai e fānaú ke nau fefāʻofuaʻaki). (Vakai ki he 3 Nīfai 17:21–24.)

ʻAi ʻa e fānaú ke nau lau fakataha mo koe, “Naʻe fakahā mai ʻe Sīsū kiate kitautolu ʻa e founga ke tau ʻofa ai ki he niʻihi kehé.”

ʻĪmisi

Jesus with Nephite children

Toe Hivaʻi pe lau ʻa e tau ʻo e “ʻOku ou Feinga ke Hangē ko Sīsuú”. Fakaafeʻi ʻa e fānaú ke nau hiva pea fakatātaaʻi fakataha mo koe.

Vahevahe hoʻo fakamoʻoní, te tau lava ʻo ʻofa ki he niʻihi kehé ʻo hangē ko ia naʻe fai ʻe Sīsuú.

Fakaafeʻi ha taha ʻi he fānaú ke ne fai ʻa e lotu tukú.

• Ki he pāsoló: ʻOmai ha fakatātā ʻo e Fakamoʻuí (te ke lava ʻo ngāueʻaki ʻa e fakatātā ʻi he peesi 106 kapau ʻe fie maʻu). Kumi ha laʻi pepa ʻa ia ʻe lahi tatau mo e fakatātaá (pe kosi ha laʻipepa ke na lahi tatau) pea kosi ʻa e pepá ki he konga ʻe tolu pe fā ke faʻu ʻaki ha pāsolo. Tohiʻi ʻi he tuʻa ʻo e laʻipepa takitaha ʻa e “Te u ʻOfa ki he Niʻihi Kehé”.

  ʻĪmisi

  puzzle diagram

• Ki he ʻekitivitī folofolá: ʻOmai ha tatau ʻo e Tohi Tapú. Fakaʻilongaʻi ʻa e Sione 15:12 ke faingofua hoʻo huke ki aí.

• Ki he ʻekitivitī fakatātaaʻí: Paaki ʻa e fakatātā ʻi he peesi 27 ke taki taha ʻa e fānaú.

Fakapuliki ʻa e fakatātā ʻo Sīsuú ʻaki ʻa e kongokonga pāsoló. Kole ki ha taha ʻo e fānaú ke ne fili ha konga. Lau ʻa e konga lea ʻoku ʻi he konga ko iá pea ʻai ʻa e fānaú ke nau angimui. Aleaʻi e founga ʻe taha te tau lava ai ʻo ʻofa ki he niʻihi kehé (lea mālō, vahevahe, fai ʻa e meʻa ʻoku kole atu ʻe hoʻo Faʻeé pe Tamaí, fakamaau e ngaahi meʻavaʻingá mo e alā meʻa pehē). Toe fai ʻa e meʻa tatau ki he kiʻi konga takitaha kae ʻoua kuo toʻo e ʻufiʻufi kotoa ʻo e fakatātaá. Toe fakamālohia e fakakaukau ko ia naʻe fakahā mai ʻe Sīsū kiate kitautolú ʻa e founga ke tau ʻofa ai ki he niʻihi kehé.

Talaange ki he fānaú naʻe akoʻi kitautolu ʻe Sīsū ʻi he folofolá ke tau ʻofa ki he niʻihi kehé. Fakaava ʻa e Tohi Tapú ki he Sione 15:12 pea lau, “Feʻofaʻaki kiate kimoutolu.” Fakaafeʻi ʻa e fānaú ke toe lau ʻa e kupuʻi leá fakataha mo koe.

Hivaʻi pe lau ʻa e ngaahi lea “Folofola ʻa Sīsū Feʻofaʻaki” (Tohi Hiva ʻa e Fānaú, 391) pea fai ʻa e fakatātā ʻoku hā atu ʻi laló. Fakaafeʻi ʻa e fānaú ke kau fakataha mo koe.

ʻOange ki he fānaú takitaha ha tatau ʻo e fakatātā ʻi he peesi 27. ʻEke ki he fānaú ha ngaahi fehuʻi fekauʻaki mo e fakatātaá ke fakamanatu kiate kinautolu ʻa e talanoa naʻe fai ki muʻá. Hangē ko ʻení:

Te ke lava ʻo sio kia Sīsū ʻi he fakatātaá? (ʻai ʻa e fānaú ke nau tuhu kia Sīsū ʻi he tatau ʻo ʻenau fakatātaá)

Ko e hā ʻa e meʻa ʻoku ʻi he loto kató? (ʻai ʻa e fānaú ke hangē pē ʻoku nau kaí)