Ti Priesthood

Ti priesthood ket ti agnanayon a bileg ken turay wenno awtoridad ti Dios. Babaen iti priesthood pinarsua ken iturayanna dagiti langit ken ti daga. Babaen iti daytoy a bileg mapagtalinaed ti lubong iti naan-anay nga urnosna. Babaen iti daytoy a bileg ipatungpalna ti aramid ken gloriana, a daytoy ti “mangipatungpal iti saan nga ipapatay ken agnanayon a biag ti tao” (Moises 1:39).

Italek ti Nailangitan nga Amatayo ti bilegna iti priesthood kadagiti maikari a lallaki a miembro ti Simbaan. Ti priesthood ti mangted kabaelan kadakuada nga agtignay iti nagan ti Dios para iti pannakaisalakan ti pamilia ti sangkataw-an. Babaen iti daytoy mabalinda a mapusgan a mangisuro iti ebanghelio, mangannong kadagiti ordinansa ti pannakaisalakan, ken mangituray iti pagarian ti Dios iti daga.

• Panunoten ti maipapan iti kinapateg ti panangipalubos ti Dios kadagiti maikari a lallaki ken babbarito nga agikut iti priesthoodna.

Nasken a maaddaantayo iti turay wenno awtoridad ti priesthood nga agtignay iti nagan ti Dios no agan-annongtayo kadagiti sagrado nga ordinansa ti ebanghelio, kas iti panagbuniag, kumpirmasion, panangannong iti sakramento, ken kallaysa iti templo. No awanan ti maysa a lalaki iti priesthood, uray no mabalin a napudno isuna, saanto a bigbigen ti Apo dagiti ordinansa nga an-annongenna (kitaen iti Mateo 7:21–23; Pagannurotan ti Pammati 1:5). Dagitoy a napateg nga ordinansa iti daga ket nasken nga annongen dagiti lallaki nga addaan iti priesthood.

Kasapulan dagiti lallaki ti priesthood a mangidaulo iti Ti Simbaan ni Jesucristo dagiti Santo iti Ud-udina nga Aldaw ken mangiturong iti aramid ti Simbaan iti amin a paset ti lubong. Idi nagnaed ni Cristo iti daga, pinilina dagiti Apostolna ken inordenanna ida tapno mabalinda nga idauluan ti Simbaanna. Inikkanna ida iti bileg ken turay wenno awtoridad ti priesthood nga agtignay iti naganna. (Kitaen iti Marcos 3:13–15; Juan 15:16.)

Sabali pay a gapu no apay a kasapulan ti priesthood iti daga ket tapno maawatantayo ti pagayatan ti Dios ken maaramidtayo dagiti panggepna. Ipalgak ti Dios ti pagayatanna kadagiti napusgan a pannakabagina iti priesthood iti daga, ti propeta. Ti propeta, nga isu ti Presidente ti Simbaan, ket agserbi a tagapagsarita ti Dios iti amin a miembro ti Simbaan ken iti amin a tattao iti daga.

• Apay a napateg unay nga addaan ti maysa a lalaki iti umno a turay no agannong iti maysa nga ordinansa?

Insagana ti Apo ti naurnos a wagas a pannakaited ti priesthoodna kadagiti annakna a lallaki iti daga. Awaten ti maysa a maikari a lalaki a miembro ti Simbaan ti priesthood “babaen iti panangipatay iti dakulap dagiti naikkan iti turay, a mangikasaba iti Ebanghelio ken mangannong kadagiti ordinansa” (Pagannurotan ti Pammati 1:5).

Kastoy met a wagas a nangawatan dagiti lallaki iti priesthood iti nabayagen a panawen, kas kadagidi aldaw ni Moises: “Ket awan koma ti mangakem itoy a dayaw no di ti inayaban ti Dios, a kas iti pannakaayab ni Aaron” (Hebreo 5:4). Inawat ni Aaron ti priesthood manipud ken ni Moises, ti dadaulona iti priesthood (kitaen iti Exodo 28:1). Dagiti laeng addaan iti priesthood ti mabalin a mangorden kadagiti dadduma pay, ken maaramidda laeng daytoy no pinusgan ida dagiti agig-iggem iti tulbek para iti dayta nga ordinasion (kitaen iti kapitulo 14 iti daytoy a libro).

Saan a mabalin a gatangen wenno ilako dagiti lallaki ti bileg ken turay wenno awtoridad ti priesthood. Wenno saanda a maawat daytoy a turay wenno awtoridad iti bagbagida. Iti Baro a Tulag mabasatayo maipapan iti maysa a lalaki nga agnagan iti Simon a nagbiag idi indauluan dagiti Apostol ni Cristo ti Simbaan. Ni Simon ket napasurot ken nabuniagan iti Simbaan. Gapu ta nalaing isuna a mahikero, namati dagiti tao nga adda bileg ti Dios kenkuana. Ngem awanan ni Simon iti priesthood, ket ammona daytoy.

Ammo ni Simon nga addaan iti pudno a bileg ti Dios dagiti Apostol ken dagiti dadduma pay a dadaulo ti priesthood ti Simbaan. Nakitana ida a nagaramat iti priesthoodda nga agaramid iti trabaho ti Apo, ket kinayatna daytoy a bileg para iti bagina. Indiayana a gatangenna ti priesthood. (Kitaen iti Dagiti Aramid 8:9–19.) Ngem kinuna ni Pedro, ti panguluen nga Apostol, “Mapukaw koma ti pirakmo a maikanunong kenka, ta pinanunotmo a magun-odan ti parangkap ti Dios gapu iti pirak” (Dagiti Aramid 8:20).

• Apay a napateg unay nga “awan koma ti mangakem itoy a dayaw [ti priesthood]”?

Nasken a mausar ti priesthood a mangbendision iti biag dagiti annak ti Nailangitan nga Amatayo ditoy daga. Nasken a mangidaulo dagiti addaan iti priesthood iti ayat ken kinaimbag. Nasken a saanda a piliten dagiti pamiliada ken dagiti dadduma pay nga agtungpal kadakuada. Imbaga ti Apo kadatayo a ti bileg ti priesthood ket saan a matengngel malaksid iti kinalinteg (kitaen iti DkK 121:36). No padasentayo nga usaren ti priesthood tapno makagun-od iti kinabaknang wenno pammadayaw wenno para iti ania man a sabali pay a managimbubukod a panggep, “adtoy, adaywan ida ti langit; maldaangan ti Espiritu ti Apo; ket no naibabawin, Amen iti kinasaserdote wenno ti panangituray dayta a tao” (DkK 121:37).

No usaren ti maysa a lalaki ti priesthood “babaen laeng ti panangguyugoy, babaen ti naunday a panagitured, babaen ti kinaanus ken kinaemma, ken babaen ti di aginkukuna nga ayat” (DkK 121:41), makaaramid isuna iti adu a nakaskasdaaw a banag para iti pamiliana ken iti dadduma. Mabalinna ti mangbuniag, mangkompirma, ken mangannong iti sakramento no pinusgan dagiti agig-iggem iti tulbek para kadagita nga ordinansa. Mabalinna ti mangbendision iti masakit. Mabalinna ti mangted kadagiti bendision ti priesthood kadagiti miembro ti pamiliana tapno maparegta ken masaluadanda no addaanda kadagiti naisangsangayan a panagkasapulan. Mabalinna pay a tulongan dagiti dadduma pay a pamilia kadagitoy nga ordinansa ken bendision no nakiddaw nga aramidenna.

Usaren dagiti lallaki ti turay wenno awtoridad ti priesthood a mangidaulo iti Simbaan kadagiti kasta a takem kas branch president, bishop, quorum president, stake president, ken mission president. Dagiti lallaki ken babbai nga agig-iggem kadagiti saad iti Simbaan kas opisial ken mannursuro ket agtrabahoda iti babaen ti panangiturong dagiti dadaulo ti priesthood ken iti babaen ti pannarabay ti Espiritu Santo.

Inkari ti Apo dagiti naindaklan a bendision kadagiti nalinteg nga addaan iti priesthood a mangus-usar iti priesthood a mangbendision kadagiti dadduma:

“Kalpasanna mapapigsa ti panagtalekmo iti imatang ti Dios; ken mailimog koma ti kararuam iti doktrina ti kinasaserdote a kas iti linnaaw nga aggapu iti langit.

“Ti koma Espiritu Santo ti kanayon a kaduam, ket ti setrom isu ti setro ti di agbalbaliw a kinalinteg ken kinapudno; ken ti panangituraymo isu ti agnanayon a panangituray, ket agburayok koma ti awan pammilit a wagas iti agnanayon nga awan inggana” (DkK 121:45–46).

Inkari ni Presidente David O. McKay iti tunggal lalaki a mangus-usar iti priesthood iti kinalinteg nga isu ket “masarakannanto a nasam-it ti biagna, mapatadem ti panagriknana a siaalisto a mangikeddeng iti umno ken biddut, naayat ken manangngaasi ti panagriknana, napigsa ken maingel ti espirituna iti panangidepensa iti umno; masarakannanto ti priesthood nga agtultuloy a pagtaudan ti kinaragsak—maysa nga ubbog ti nabiag a danum nga agpusuak nga agturong iti agnanayon a biag” (Teachings of Presidents of the Church: David O. McKay [2003], 116).

• Ania dagiti sumagmamano kadagiti bendision a naawatmon babaen iti priesthood?

• DkK 84; 107 (dagiti paltiing maipapan iti priesthood, agraman ti sapata ken kari ti priesthood iti DkK 84:33–40)

• DkK 20:38–67 (nailawlawag dagiti pagrebbengan ti priesthood)