Ti Pannakatnag da Adan ken Eva

• Ania ti pakakitaan a makatulong iti pannakaammotayo a maingel nga espiritu da Adan ken Eva?

Insagana ti Dios daytoy a daga a pagtaengan para kadagiti annakna. Napili da Adan ken Eva nga agbalin nga umuna a tao nga agnaed iti daga (kitaen iti Moises 1:34; 4:26). Ti pasetda iti plano ti Amatayo ket mangisangbay iti ipapatay wenno mortalidad iti lubong. Nasken nga isuda dagiti umuna a nagannak. (Kitaen iti DkK 107:54–56.)

Maibilang da Adan ken Eva kadagiti kataknengan nga annak ti Amatayo. Iti lubong dagiti espiritu naawagan ni Adan a Miguel nga arkanghel (kitaen iti DkK 27:11; Judas 1:9). Isu ti pinili ti Nailangitan nga Amatayo a mangidaulo kadagiti nalinteg iti pannakigubatda ken ni Satanas (kitaen iti Apocalipsis 12:7–9). Naisakbay a naordenan da Adan ken Eva nga agbalin nga umuna a nagannaktayo. Inkari ti Apo ken ni Adan dagiti naindaklan a bendision: “Insaadka a pangulo; adunto a pagilian ti umasideg kenka, ket sikanto ti prinsipeda iti agnanayon” (DkK 107:55).

Ni Eva “ti ina dagiti amin a nabiag” (Moises 4:26). Pinagtipon ti Dios da Adan ken Eva iti kallaysa gapu ta “saan a nasayaat nga agmaymaysa ti tao” (Moises 3:18; kitaen met iti 1 Taga Corinto 11:11). Kabingayna iti pagrebbengan ni Adan ken kasta met a kabingaynanto kadagiti agnanayon a bendisionna.

• Ania dagiti masursurotayo manipud kadagiti pagwadan da Adan ken Eva?

• Babaen dagiti ania a kasasaad ti panagbiag da Adan ken Eva iti Minuyongan ti Eden?

Idi naipan da Adan ken Eva iti Minuyongan ti Eden, saanda pay a mortal. Iti daytoy a kasasaad, “awan koma ti annakda” (2 Nephi 2:23). Awan ti patay. Addaanda iti pisikal a biag gapu ta naikabil dagiti espirituda kadagiti pisikal a bagi a naaramid manipud iti tapok ti daga (kitaen iti Moises 6:59; Abraham 5:7). Addaanda iti naespirituan a biag gapu ta addada iti imatang ti Dios. Saanda pay a nakaaramid iti pili iti nagbaetan ti nasayaat ken dakes.

Binilin ida ti Dios a maaddaan kadagiti annak. Kinunana, “Agbungakayo, ket agpaadukayo, ken punnuenyo ti daga ken parmekenyo, ket iturayanyo … tunggal banag a nabiag nga aggaraw iti rabaw ti daga” (Moises 2:28). Imbaga ti Dios kadakuada a siwawayada a mangan iti amin a kayo iti minuyongan malaksid iti maysa, ti kayo ti pannakaammo iti naimbag ken dakes. Maipapan iti dayta a kayo kinuna ti Dios, “Iti aldaw nga ikakaanmo iti dayta awan duadua a mataykanto” (Moises 3:17).

Ni Satanas, a dina ammo ti panunot ti Dios ngem kalkalikagumanna a dadaelen ti plano ti Dios, ket napan ken ni Eva iti Minuyongan ti Eden. Sinulisogna isuna a mangan iti bunga ti kayo ti pannakaammo iti naimbag ken dakes. Impanamnamana kenkuana a saandanto a matay ken ni Adan, ngem agbalindanto a “kas kadagiti dios, a makaammo iti naimbag ken dakes” (Moises 4:11). Nagpasulisog ni Eva ket nangan iti bunga. Idi naammuan ni Adan no ania ti napasamak, pinilina met ti nangan. Ti panagbalbaliw a dimteng kada Adan ken Eva gapu ta nanganda iti bunga ket maawagan iti Pannakatnag.

• Ania dagiti pisikal ken naespirituan a panagbalbaliw a napasamak kada Adan ken Eva kas bunga ti panaglabsingda?

Gapu ta nangan da Adan ken Eva iti bunga ti kayo ti pannakaammo iti naimbag ken dakes, pinapanaw ida ti Apo iti Minuyongan ti Eden a napanda iti lubong. Nagbalbaliw ti pisikal a kasasaadda kas bunga ti pannanganda iti maiparit a bunga. Kas iti inkari ti Dios, nagbalinda a mortal. Mapadasanda ken dagiti annakda ti sakit, saem, ken pisikal nga ipapatay.

Gapu iti panaglabsingda, nagsagaba pay da Adan ken Eva iti naespirituan nga ipapatay. Kayat a sawen daytoy a saanda ken dagiti annakda a makadua ken makasao ti Dios iti sangunsango. Naisina da Adan ken Eva ken dagiti annakda manipud iti Dios iti agpada a pisikal ken naespirituan.

• Kasano a nangipaay ti Pannakatnag kadagiti gundaway para kadatayo tapno agbalintayo a kas iti Nailangitan nga Amatayo?

Sumagmamano a tao ti mamati a nagaramid da Adan ken Eva iti nadagsen a basol idi nanganda iti kayo ti pannakaammo iti naimbag ken dakes. Nupay kasta, tulongannatayo dagiti nasantuan a kasuratan iti ud-udina nga aldaw tapno maawatantayo a ti Pannakatnagda ket maysa a kasapulan nga addang iti plano ti biag ken maysa a naindaklan a bendision iti amin kadatayo. Gapu iti Pannakatnag, naparaburantayo kadagiti pisikal a bagi, ti karbengan nga agpili iti naimbag ken dakes, ken ti gundaway a manggun-od iti agnanayon a biag. Awanantayo koma kadagitoy a pribilehio no nagtalinaed da Adan ken Eva iti minuyongan.

Kalpasan ti Pannakatnag, kinuna ni Eva, “No saan a gapu iti panaglabsingmi saankami koma a naaddaan iti bukel [annak], ket pulos koma a dimi naammuan ti naimbag ken dakes, ken ti rag-o iti pannakasubbotmi, ken ti agnanayon a biag nga ited ti Dios kadagiti amin a managtungpal” (Moises 5:11).

Inlawlawag ni propeta Lehi:

“Ket ita, adtoy, no saan a naglabsing ni Adan, saan koma a natnag [napapanaw manipud iti imatang ti Dios], ngem nagtalinaed koma isuna iti Minuyongan ti Eden. Ket nagtalinaed koma amin a banag a naparsua iti sigud a kasasaadda kalpasan ti pannakaparsuada. …

“Ket awan koma ti annakda; gapuna nagtalinaedda koma iti kasasaad ti kinainosente, nga awanan iti ragsak, ta saanda nga ammo ti rigat; agaramid iti saan a naimbag, gapu ta saanda nga ammo ti basol.

“Ngem adtoy, naaramid ti amin a banag ti nasaririt a makaammo iti amin a banag.

“Natnag ni Adan tapno adda tao; ket ti panggep dagiti tao, ket tapno maaddaanda iti ragsak” (2 Nephi 2:22–25).

• Apay iti panagkunam a napateg a maammuan maipapan iti Pannakatnag ken no kasano nga aringannatayo daytoy?

• 1 Nephi 5:11; 2 Nephi 2:20 (da Adan ken Eva dagiti umuna a nagannak, pamilia)

• 2 Nephi 2:14–21 (pagsusupadian ken ti Pannakatnag; ti biag ket maysa a pannakapadas)

• 2 Nephi 2:22–26 (ti Pannakatnag ket paset ti plano ti pannakaisalakan)