Ti Simbaan ni Jesucristo iti Agdama

• Apay a naikkat ti Simbaan ni Jesucristo manipud iti daga iti nabiit kalpasan ti ipapatay ken Panagungar ti Mangisalakan?

Idi nagnaed ni Jesus ditoy daga, impasdekna ti Simbaanna, ti kakaisuna a pudno a Simbaan. Binukelna ti Simbaanna tapno maisuro dagiti kinapudno ti ebanghelio iti amin a tao ken maannong a siuumno dagiti ordinansa ti ebanghelio nga addaan iti turay. Babaen iti daytoy a pannakabukel, maisangbay ni Cristo dagiti bendision ti pannakaisalakan iti sangkataw-an.

Kalpasan ti yuuli ti Mangisalakan iti langit, binalbaliwan dagiti tao dagiti ordinansa ken doktrina nga impasdekna ken dagiti Apostolna. Gapu iti ikakalilis iti kinapudno, awan ti direkta a paltiing manipud iti Dios. Awanen ti pudno a Simbaan ditoy daga. Binukel dagiti tao ti nadumaduma a simbaan a mangibaga a pudno ngem mangisuro kadagiti agsisinnupiat a doktrina. Kasta unay ti riribuk ken sinnupanget maipanggep iti relihion. Naparmatan ti Apo dagitoy a kasasaad ti ikakalilis iti kinapudno, nga agkunkuna nga addanto “bisin ditoy daga, saan a bisin iti tinapay, wenno waw iti danum, no di ket a panagdengngeg kadagiti sao ni Jehova. … Agtaraydanto … nga agsapul iti sao ni Jehova, ngem saandanto a matumpungan” (Amos 8:11–12).

• Kasano nga apektuan ti bisin a nadakamat iti Amos 8:11–12 dagiti tao?

• Ania dagiti sumagmamano a kasasaad iti lubong a nangisagana iti wagas para iti Pannakaisubli ti ebanghelio?

Inkari ti Mangisalakan nga isublina ti Simbaanna kadagiti ud-udina nga aldaw. Kinunana, “Baliwakto nga aramiden ti maysa a nakaskasdaaw iti tengnga daytoy nga ili, maysa met laeng a nakaskasdaaw nga aramid ken datdatlag” (Isaias 29:14).

Iti uneg ti adu a tawen nagbiag dagiti tao iti naespirituan a kinasipnget. Agarup 1,700 a tawen kalpasan ni Cristo, nagbalin nga ad-adda a managessem dagiti tao iti panangammo iti kinapudno maipapan iti Dios ken iti relihion. Sumagmamano kadakuada ti nakakita nga awanen ditoy daga ti ebanghelio nga insuro ni Jesus. Sumagmamano ti nakabigbig nga awan paltiing ken awan pudno a turay ken awan ditoy daga ti Simbaan a binukel idi ni Cristo. Dimtengen ti panawen a maisublin ditoy daga ti Simbaan ni Jesucristo.

• Iti ania a wagwagas a “nakaskasdaaw nga aramid” ti Pannakaisubli ti pakabuklan ti ebanghelio?

• Idi inawat ni Joseph Smith ti Umuna a Parmatana, ania ti nasursurona maipapan iti Dios?

Idi panagsusulbod ti 1820, maysa kadagiti kapatgan a pasamak iti pakasaritaan ti lubong ti napagteng. Dimtengen ti panawen para iti nakaskasdaaw nga aramid ken datdatlag a nasaon idi ti Apo. Kas maysa nga agtutubo, kayat ni Joseph Smith a maammuan no ania kadagiti amin a simbaan ti pudno a Simbaan ni Jesucristo. Napan iti kakaywan iti asideg ti pagtaenganna ket nagkararag a sipapakumbaba ken sipapasnek iti Nailangitan nga Amana, nga agsalsaludsod no ania a simbaan ti nasken a pagkamenganna. Iti dayta nga agsapa napasamak ti maysa a nakaskasdaaw a banag. Nagparang ken Joseph Smith ti Nailangitan nga Ama ken ni Jesucristo. Imbaga ti Mangisalakan kenkuana a saan kumappeng iti ania man a simbaan gapu ta awan ditoy daga ti pudno a Simbaan. Kinunana pay a dagiti agdama nga annuroten dagiti agdama a simbaan ket “makarimon iti imatangna” (Joseph Smith—Pakasaritaan 1:19; kitaen met kadagiti bersikulo 7–18, 20). Mangrugi iti daytoy a pasamak, adda manen direkta a paltiing manipud iti langit. Nangpili ti Apo iti maysa a baro a propeta. Manipud iti dayta a panawen saanen a nagserra dagiti langit. Nagtultuloy ti paltiing agingga iti daytoy nga aldaw babaen iti tunggal maysa kadagiti napili a propetana. Ni Joseph ti nasken a maysa a tumulong a mangisubli iti pudno nga ebanghelio ni Jesucristo.

• Apay a ti Umuna a Parmata ti maysa kadagiti kapatgan a pasamak iti pakasaritaan ti lubong?

• Apay a kasapulan ti pannakaisubli dagiti Aaronic ken Melchizedek Priesthood?

Iti pannakaisubli ti ebanghelio, inted manen ti Dios ti priesthood kadagiti lallaki. Immay ni Juan Bautista idi 1829 tapno italekna ti Aaronic Priesthood kada Joseph Smith ken Oliver Cowdery (kitaen iti DkK 13; 27:8). Kalpasanna dimteng da Pedro, Santiago, ken Juan, ti panguluen ti Simbaan kadagiti nagkauna a panawen, ket intedda kada Joseph ken Oliver ti Melchizedek Priesthood ken dagiti tulbek ti pagarian ti Dios (kitaen iti DkK 27:12–13). Idi agangay, dagiti nayon pay a tulbek ket insubli dagiti nailangitan a mensahero kas kada Moises, Elias, ken Elijah (kitaen iti DkK 110:11–16). Babaen iti Pannakaisubli, naisubli ti priesthood ditoy daga. Dagiti addaan iti daytoy a priesthood iti agdama ket addaanda iti turay a mangannong kadagiti ordinansa kas iti panagbuniag. Addaanda pay iti turay a mangiturong iti pagarian ti Apo ditoy daga.

• Ania dagiti pasamak a nangiturong iti pannakabukel manen ti Simbaan ditoy daga?

Idi Abril 6, 1830, inturong manen ti Mangisalakan ti pannakabukel ti Simbaanna ditoy daga (kitaen iti DkK 20:1). Maawagan ti Simbaanna iti Ti Simbaan ni Jesucristo dagiti Santo iti Ud-udina nga Aldaw (kitaen iti DkK 115:4). Ni Cristo ti dadaulo ti Simbaanna iti agdama, kas met laeng Isuna idi kadagiti nagkauna a panawen. Kinuna ti Apo a daytoy “ti kakaisuna a pudno ken nabiag a simbaan iti rabaw ti sangabukel a daga, a siak, ti Apo, mapagustuan unay” (DkK 1:30).

Nakanunongan ni Joseph Smith a kas maysa a propeta ken “umuna nga elder” ti Simbaan (kitaen iti DkK 20:2–4). Idi agangay nabukel ti Umuna a Panguluen, ket nakanunongan a kas Presidente. Idi immuna a nabukel ti Simbaan, nabuangay laeng dagiti pangrugian a timpuyog. Mapadur-as ti panagbuangay bayat ti panagtultuloy a panagrang-ay ti Simbaan.

Nabukel ti Simbaan nga addaan kadagiti isu met la a saad a kapada iti nagkauna a Simbaan. Dayta a panagbuangay ket iramanna dagiti apostol, propeta, pitupulo, ebanghelista (patriarka), pastor (mangimatmaton a dadaulo), high priest, elder, bishop, priest, teacher, ken deacon. Adda dagitoy isu met la saad iti Simbaanna iti agdama (kitaen iti Pagannurotan ti Pammati 1:6).

Maysa a propeta, nga agak-akem babaen iti panangiturong ti Apo, ti mangidadaulo iti Simbaan. Daytoy pay a propeta ti Presidente ti Simbaan. Iggemna ti amin a turay a kasapulan a pangiturong iti aramid ti Apo ditoy daga (kitaen iti DkK 107:65, 91). Dua a mammagbaga ti tumultulong iti Presidente. Dagiti Sangapulo-ket-dua nga Apostol, a naisangsangayan a saksi ti nagan ni Jesucristo, ket mangisuro iti ebanghelio ken mangurnos kadagiti aramid a pakaseknan ti Simbaan iti amin a paset ti lubong. Dagiti dadduma pay a sapasap nga opisial ti Simbaan nga addaan kadagiti naisangsangayan a naituding nga aramiden, agraman ti Presiding Bishopric ken dagiti Korum ti Pitupulo, ket agserbida babaen iti panangiturong ti Umuna a Panguluen ken ti Sangapulo-ket-dua.

Dagiti saad ti priesthood ket iramanna dagiti apostol, pitupulo, patriarka, high priest, bishop, elder, priest, teacher, ken deacon. Maipada dagitoy a saad kadagiti adda iti sigud a Simbaan.

Dakkel ti rimmang-ayan ti Simbaan a narangrang-ay pay ngem kadagidi aldaw ni Jesus. Bayat ti panagrang-ayna, nangipalgak ti Apo kadagiti nayon pay a yunit ti panagbukel iti ikub ti Simbaan. No naan-anayen a nabukel ti Simbaan iti maysa nga area, addaan daytoy kadagiti lokal a dibision a maawagan kadagiti stake. Ti maysa a stake president ken ti dua a mammagbagana ti mangidaulo iti tunggal stake. Addaan ti stake iti 12 a high councilor a tumulong iti aramid ti Apo iti stake. Mabukel dagiti korum ti Melchizedek Priesthood iti stake babaen iti panangiturong ti stake president (kitaen iti kapitulo 14 iti daytoy a libro). Mabingay ti tunggal stake iti babbabassit nga area a maawagan kadagiti ward. Ti maysa a bishop ken ti dua a mamagbagana ti mangiturong iti tunggal ward.

Kadagiti lugar ti lubong a dumurdur-asen ti Simbaan, adda dagiti district, a maipada kadagiti stake. Mabingay dagiti district iti babbabassit a yunit a maawagan kadagiti branch, a maipada kadagiti ward.

• Ania dagiti napapateg a kinapudno a naisublin iti Pannakaisubli ti Simbaan?

Mangisursuro ti Simbaan iti agdama kadagiti isu met la a pagbatayan ken agan-annong kadagiti isu met la nga ordinansa a kas iti pannakaannongda kadagidi aldaw ni Jesus. Dagiti umuna a pagbatayan ken ordinansa ti ebanghelio ket pammati ken ni Apo a Jesucristo, panagbabawi, panagbuniag babaen ti pannakairarem, ken pannakaipatay dagiti dakulap para iti sagut ti Espiritu Santo (kitaen iti Pagannurotan ti Pammati 1:4). Naisubli dagitoy napapateg a kinapudno iti pakabuklanda idi naisubli ti Simbaan.

Babaen iti sagut ken bileg ti Dios, impatarus ni Joseph Smith ti Libro ni Mormon, a naglaon kadagiti nalalawag ken napapateg a kinapudno ti ebanghelio. Adu a dadduma pay a paltiing ti naited kalpasanna ken nairekordda a kas nasantuan a kasuratan iti Doktrina ken Katulagan ken Perlas a Kapatgan (kitaen iti kapitulo 10 iti daytoy a libro).

Dadduma pay a napapateg a kinapudno nga insubli ti Apo ket iramanda ti sumaganad:

1. Ti Nailangitan nga Amatayo ket pudno a tao nga addaan iti marikna, naan-anay a bagi a nagtagilasag ken nagtagitulang, ket kasta met ken ni Jesucristo. Ti Espiritu Santo ket isu ti kinatao ti espiritu.

2. Nagbiagtayo iti biag sakbay a naitaotayo a kas espiritu nga annak ti Dios.

3. Kasapulan ti priesthood iti panangannong kadagiti ordinansa ti ebanghelio.

4. Madusatayonto gapu kadagiti bukodtayo a basol ken saan a gapu iti nagbasolan ni Adan.

5. Saan a nasken a buniagan dagiti ubbing agingga nga adda sungsungbatanda (agtawen iti walo).

6. Adda tallo a pagarian ti gloria iti langit, ken babaen iti parabur ni Apo Jesucristo, magunggonaanto dagiti tao a mayannurot kadagiti aramidda ditoy daga ken mayannurot kadagiti tarigagay ti puspusoda.

7. Mabalin nga agnanayon dagiti relasion wenno pagnanaigan ti pamilia babaen iti pangilantip a bileg ti priesthood.

8. Kasapulan dagiti ordinansa ken katulagan para iti pannakaisalakan ken sidadaan a magun-od para iti agpada a sibibiag ken natay.

• Kasano a naimpluensiaannakan ken dagiti dadduma pay dagitoy a kinapudno?

• Ania ti mision ti Simbaan?

Manipud pay idi naisubli daytoy idi 1830, napardas ti panagadu iti bilang dagiti miembro iti Simbaan ni Jesucristo dagiti Santo iti Ud-udina nga Aldaw. Adda dagiti miembro iti dumani amin a pagilian iti lubong. Agtultuloyto a rumang-ay ti Simbaan. Kas iti kinuna ni Cristo, “Maikasabanto iti intero a lubong daytoy nga Ebanghelio ti Pagarian, para iti saksi iti amin a pagilian” (Joseph Smith—Mateo 1:31). Dinto kaano man maipanaw manen ti Simbaan manipud iti daga. Misionna ti mangyeg iti kinapudno iti tunggal tao. Rinibribu a tawen ti napalabasen, kinuna ti Apo nga Isu ket “mamangonto iti maysa a pagarian, a kaano man dinto madadael: ket ti panagturayna dinto met maited iti sabali nga ili, … ket isu agtalinaedto iti agnanayon” (Daniel 2:44).

• Kasano a nakatulongkan iti aramid ti pagarian ti Dios? Ania ti maaramidmo tapno agtultuloy daytoy nga aramid?

• Dagiti Aramid 3:19–21; Apocalipsis 14:6; Daniel 2:44–45; Isaias 2:2–4; 2 Nephi 3:6–15 (naiparmata ti Pannakaisubli)

• DkK 110; 128:19–21; 133:36–39, 57–58 (Pannakaisubli ti ebanghelio)

• Taga Efeso 2:20 (ni Jesucristo ti nangnangruna a bato ti Simbaan)

• DkK 20:38–67 (dagiti pagrebbengan dagiti opisial ti Simbaan)

• Mateo 24:14 (maisuronto ti ebanghelio iti amin a nasion)