Dagiti Pagrebbengan ti Pamilia

• Ania dagiti pagrebbengan dagiti agassawa a pagtinnulonganda iti panangpatanor kadagiti annakda?

Tunggal tao ket addaan iti napateg a lugar iti pamiliana. Babaen dagiti propeta inlawlawag ti Apo no kasano ti rumbeng a panagtignay ken panagrikna dagiti amma, inna, ken annak iti tunggal maysa. Kas agassawa, ken annak, kasapulantayo nga ammuen no ania ti namnamaen ti Apo nga aramidentayo a mangipatungpal iti panggeptayo a kas maysa a pamilia. No aramidentayo amin ti pasettayo, agkaykaysatayonto iti agnanayon.

Kadagiti sagrado a pagrebbengan ti panagbalin a nagannak, “obligasion dagiti amma ken inna nga agtinnulong iti tunggal maysa a kas agkadua nga agpada” (Ti Kaamaan: Maysa a Waragawag ti Lubong,” Ensign, Nob. 1995, 102). Nasken nga agtitinnulongda nga agtrabaho tapno maipaay dagiti kasapulan ti pamilia a mainaig iti naespirituan, rikna, panunot, ken bagi.

Sumagmamano a pagrebbengan ti nasken a pagtinnulongan dagiti agassawa. Nasken nga isuro dagiti nagannak ti ebanghelio kadagiti annakda. Imballaag ti Apo a no di isuro dagiti nagannak dagiti annakda maipapan iti pammati, panagbabawi, panagbuniag, ken ti sagut ti Espiritu Santo, mapabasolto dagiti nagannak. Nasken pay nga isuro dagiti nagannak dagiti annakda nga agkararag ken agtungpal kadagiti bilin ti Apo. (Kitaen iti DkK 68:25, 28.)

Maysa kadagiti kapintasan a wagas a pakaisuruan dagiti nagannak kadagiti annakda ket babaen iti pagwadan. Nasken nga ipakita dagiti agassawa ti panagayat ken panagdayaw iti tunggal maysa ken kadagiti annakda babaen ti agpada nga aramid ken balikas. Nasken a laglagipen nga anak ti Dios ti tunggal miembro ti pamilia. Nasken a tratuen dagiti nagannak dagiti annakda nga addaan iti panagayat ken panagdayaw, a natibker ngem naasi kadakuada.

Nasken a maawatan dagiti nagannak a no dadduma makaaramid kadagiti biddut a panagpili dagiti annak uray no kalpasan a naisuron kadakuada ti kinapudno. No mapasamak daytoy, nasken a saan a maupay dagiti nagannak. Nasken nga ituloyda ti mangisuro kadagiti annakda, mangipeksa iti panagayat kadakuada, agbalin a nasayaat a pagwadan kadakuada, ken agayuno ken agkararag para kadakuada.

Isalaysay kadatayo ti Libro ni Mormon no kasano a nakatulong dagiti kararag ti maysa nga ama a mangpasubli iti maysa a nasukir nga anak kadagiti wagas ti Apo. Kimmalilis ni Alma nga Ub-ubing manipud kadagiti pannursuro ti nalinteg nga amana, ni Alma, ket napan nagkalikagum a mangdadael iti Simbaan.Nagkararag a sipapammati ti ama para iti anakna. Sinarungkaran ti maysa nga anghel ni Alma nga Ub-ubing ket nagbabawi iti dakes a wagas ti panagbiagna. Nagbalin isuna a naindaklan a dadaulo ti Simbaan. (Kitaen iti Mosiah 27:8–32.)

Mabalin a mangipaay dagiti nagannak iti naraem nga aglawlaw ken panagdayaw iti pagtaengan no isuro ken tarabayenda dagiti annakda nga addaan iti panagayat. Nasken pay a mangipaay dagiti nagannak iti naragsak a padpadas para kadagiti annakda.

• Kasano a matulongan dagiti agassawa ti tunggal maysa kadagiti akemda? Sadino ti mabalin a pagkiddawan iti tulong dagiti agwaywayas nagannak?

• Ania dagiti nasayaat a pagwadan a nakitamon iti panangpatanor dagiti amma kadagiti annakda?

“Babaen ti nadiosan a plano, dagiti amma ti mangidaulo kadagiti kaamaanda iti ayat ken kinalinteg ken pagrebbenganda ti mangted kadagiti kasapulan ti biag ken pannakasaluad dagiti kaamaanda” (Ensign, Nob. 1995, 102). Addaan ti maysa a maikari nga ama a miembro ti Simbaan iti gundaway a maaddaan iti priesthood, a mamagbalin kenkuana a dadaulo iti priesthood ti pamiliana. Nasken nga iwanwanna ti pamiliana nga addaan iti kinapakumbaba ken kinamanangngaasi imbes a babaen ti pammilit wenno kinaranggas. Isuro dagiti nasantuan a kasuratan a nasken a mangidaulo dagiti addaan iti priesthood kadagiti dadduma babaen ti panangallukoy, kinaalumamay, panagayat, ken panangngaasi (kitaen iti DkK 121:41–44; Taga Efeso 6:4).

Ibinglay ti ama dagiti bendision ti priesthood kadagiti miembro ti pamiliana. No addaan ti maysa a lalaki iti Melchizedek Priesthood, maibinglayna dagitoy a bendision babaen ti panangannongna kadagiti masaksakit ken panangtedna kadagiti naisangsangayan a bendision ti priesthood. Babaen ti panangiturong ti mangimatmaton a dadaulo iti priesthood, mabalinna a bendisionan dagiti maladaga, mamuniag, mangkumpirma, ken mangannong kadagiti ordinasion iti priesthood. Nasken a mangipakita isuna iti nasayaat a pagwadan para iti pamiliana babaen ti panagtungpalna kadagiti bilin. Nasken pay a penkennaenna nga aggigiddan nga agkararag ti pamilia iti mamindua iti inaldaw ken mangangay iti family home evening.

Nasken nga ipaayan ti ama iti panawen iti tunggal anakna. Nasken nga isurona kadagiti annakna dagiti pudno a pagbatayan, makisao kadakuada maipapan kadagiti problema ken pakaseknanda, ken siaayat a balakadanna ida. Masarakan ti sumagmamano a nasayaat a pagwadan iti Libro ni Mormon (kitaen iti 2 Nephi 1:14–3:25; Alma 36–42).

Pagrebbengan pay ti ama ti mangipaay kadagiti pisikal a kasapulan ti pamiliana, a mangpennek nga addaanda kadagiti kasapulan a taraon, pagtaengan, kawes, ken edukasion. Uray no saanna a kabaelan mismo nga ipaay ti amin a tulong, saanna a paglikudan ti pagrebbengan a mangaywan iti pamiliana.

• Ania dagiti nasayaat a pagwadan a nakitamon iti panangpatanor dagiti inna kadagiti annakda?

Kinuna ni Presidente David O. McKay a ti kinaina ti kataknengan nga awag (see Teachings of Presidents of the Church: David O. McKay [2003], 156). Nasagraduan daytoy nga awag, maysa a pannakikadua iti Dios iti panangisangbay kadagiti espiritu nga annakna iti lubong. Maysa kadagiti kaindaklanan iti amin a bendision ti panangipasngay kadagiti annak. No awan ti ama iti pagtaengan, ti ina ti mangidaulo iti pamilia.

Dinayaw ni Presidente Boyd K. Packer dagiti babbai a dida kabaelan ti maaddaan iti bukodda nga annak ngem kinalikagumanda ti mangaywan kadagiti dadduma. Kinunana: “No agsaoak maipapan kadagiti inna, agsaoak saan laeng a maipapan kadagiti babbai a nagpasngay iti annak, ngem ketdi maipapan pay kadagiti nagtaraken iti annak dagiti sabali, ken maipapan iti adu a babbai nga awanan iti bukod nga annak a nagbalin nga inna ti annak dagiti sabali” (Mothers [1977], 8).

Insuro dagiti propeta iti Ud-udina nga Aldaw, “Kangrunaan a pagrebbengan dagiti inna ti mangaywan kadagiti annakda” (Ensign, Nob. 1995, 102). Kasapulan ti maysa nga ina ti mangbubos iti panawen kadagiti annakna ket isuro kadakuada ti ebanghelio. Nasken a makiay-ayam ken makipagtrabaho kadakuada tapno matakuatanda ti lubong iti aglawlawda. Masapul pay a tulonganna ti pamiliana a mangammo no kasano a maaramid a makaay-ayo a lugar ti pagtaengan. No naregta ken managayat, matulonganna dagiti annakna a makarikna iti nasayaat maipapan iti bagbagida.

Iladawan ti Libro ni Mormon ti maysa a grupo ti 2,000 nga agtutubo a lallaki a nagbalin a naindaklan gapu kadagiti pannursuro dagiti innada (kitaen iti Alma 53:16–23). Indauluan ni propeta Helaman, napanda nakigubat kadagiti kabusorda. Nasursuroda ti nagbalin a napudno, natured, ken mapagtalkan manipud kadagiti innada. Insuro pay kadakuada dagiti innada a no saanda nga agduadua, isalakanto ti Dios ida (kitaen iti Alma 56:47). Nakalasatda amin iti gubat. Inyebkasda ti pammati kadagiti pannursuro dagiti innada, a kinunada, “Saankami nga agduadua nga ammo dagiti innami daytoy” (Alma 56:48). Tunggal ina nga addaan iti pammaneknek ket mabalin a maaddaan iti dakkel nga impluensia kadagiti annakna.

• Kasano a matulongan dagiti annak dagiti dadakkelda a mangbangon iti naragsak a pagtaengan?

Makibinglay dagiti annak kadagiti dadakkelda kadagiti pagrebbengan a mangbangon iti naragsak a pagtaengan. Nasken a tungpalenda dagiti bilin ken makitinnulongda kadagiti dadduma pay a miembro ti pamilia. Saan a maragsakan ti Apo no agaapa dagiti annak (kitaen iti Mosiah 4:14).

Binilin ti Apo dagiti annak a dayawenda dagiti dadakkelda. Kinunana, “Dayawem ni amam ken ni inam: tapno umatiddog dagiti aldawmo iti daga” (Exodo 20:12). Ti agdayaw kadagiti nagannak ket kaipapananna ti panagayat ken panangrespeto kadakuada. Kaipapananna pay ti agtungpal kadakuada. Ibaga dagiti nasantuan a kasuratan kadagiti annak nga “agtulnogkayo kadagiti dadakkelyo gapu iti Apo: ta daytoy nalinteg” (Taga Efeso 6:1).

Kinuna ni Presidente Spencer W. Kimball a nasken a sursuruen dagiti annak ti agtrabaho ken makitinnulong kadagiti pagrebbengan iti pagtaengan ken arubayan. Nasken a maikkanda kadagiti naituding nga aramiden a mangpagtalinaed nadalimanek ken nadalus ti balay. (Kitaen iti Teachings of Presidents of the Church: Spencer W. Kimball [2006], 120.)

• Ania ti nasken nga aramiden dagiti annak a mangdayaw ken mangrespeto kadagiti dadakkelda?

• Ania ti inaramid dagiti dadakkelmo a nangiturong kenka a mangdayaw ken mangrespeto kadakuada?

• Ania ti mabalin nga aramiden ti tunggal miembro ti pamilia a mamangbalin a maysa a naragsak a lugar ti pagtaengan?

Saan a nairanrana ti kaadda ti naayat ken naragsak a pamilia. Nasken nga aramiden ti tunggal tao ti pasetna iti pamilia. Nangted ti Apo kadagiti pagrebbengan kadagiti agpada a nagannak ken annak. Isuro dagiti nasantuan a kasuratan a nasken a mananglagip, naragsak, ken mannakaawattayo kadagiti dadduma. No agsao, agkararag, agkanta, wenno agtrabahotayo a sangkamaysa, masagraptayo dagiti bendision ti panagtutunos kadagiti pamiliatayo. (Kitaen iti Taga Colosas 3.)

• Ania dagiti sumagmamano a kannawidan ken ugali a mamagbalin a naragsak a lugar ti pagtaengan?

• Dagiti Proverbio 22:6 (iruammo ti ubing)

• Taga Efeso 6:1–3 (nasken nga agtulnog dagiti annak kadagiti dadakkelda)

• DkK 68:25–28; Taga Efeso 6:4 (dagiti pagrebbengan dagiti nagannak)

• “Ti Kaamaan: Maysa a Waragawag iti Lubong” (mabalin a magun-od iti LDS.org ken iti adu a pablaak ti Simbaan, agraman ti Ensign, Nob. 1995, panid 102; Para iti Pigsa dagiti Agtutubo [item number 36550 864], panid 44; ken True to the Faith [item number 36863], dagiti panid 59–61)

• Pangiwanwan a Pagbasaan ti Kaamaan (item number 31180 864)