Panagsakripisio

Ti panagsakripisio ket kaipapananna ti panangted iti Apo iti ania man a dawatenna iti panawentayo, dagiti naindagaan a sanikuatayo, ken pigsatayo tapno maituloy ti aramidna. Imbilin ti Apo, “Birokenyo nga umuna ti pagarian ti Dios, ken ti kinalintegna” (Mateo 6:33). Ti kinatallugodtayo nga agsakripisio ket maysa a pangipakitaan iti debosiontayo iti Dios. Kanayon a masubsubok dagiti tao tapno makita no umuna nga ipangpangrunada met laeng dagiti banag ti Dios iti biagda.

• Apay a napateg ti agsakripisio no kiddawen ti Apo nga awan ti namnamaen nga ania man a banag a kasukatna?

• Ania ti kaipapanan dagiti sakripisio nga inaramid idi un-unana dagiti natulagan a tattao ti Apo?

Tinungpal dagiti tao ti Apo manipud idi panawen da Adan ken Eva agingga iti panawen ni Jesucristo ti linteg ti panagsakripisio. Nabilinda a mangted a kas sakripisio kadagiti umuna nga annak dagiti pangenda. Nasken a naan-anay dagitoy nga ayup, nga awanan iti mulit. Naited ti ordinansa a mangipalagip kadagiti tao a ni Jesucristo, ti Umuna nga Anak ti Ama, ket umayto iti lubong. Naan-anayto Isuna iti tunggal wagas, ket idatonnanto ti Bagina a kas sakripisio para kadagiti basoltayo. (Kitaen iti Moises 5:5–8.)

Immay ni Jesus ket indatonna ti Bagina a kas sakripisio, a kas naisuro kadagiti tao nga aramidenna. Gapu iti sakripisiona, maisalakanto ti tunggal maysa manipud iti pisikal nga ipapatay babaen ti Panagungar ket mabalin a maisalakan ti amin manipud kadagiti basolda babaen ti pammati ken ni Jesucristo (kitaen ti kapitulo 12 iti daytoy a libro).

Ti pangsubbot a sakripisio ni Cristo ti nangigibus kadagiti panagsakripisio babaen ti panangibukbok iti dara. Ti kasta a panagsakripisio babaen ti panangibukbok iti dara ket sinukatan ti ordinansa ti sakramento. Naited ti ordinansa ti sakramento a mangipalagip kadatayo iti naindaklan a panagsakripisio ti Mangisalakan. Nasken a masansan a makiranudtayo iti sakramento. Ipalagip kadatayo dagiti simbolo ti tinapay ken danum ti bagi ti Mangisalakan ken ti darana, nga imbukbokna para kadatayo (kitaen ti kapitulo 23 iti daytoy a libro).

• Apay a maibilang ti Pannubbot a naindaklan ken maudi a panagsakripisio?

• Kasano ti panagtungpaltayo iti linteg ti panagsakripisio ita nga agdama?

Nupay no naggibusen ti panagsakripisio babaen ti panagsayasay ti dara, kiddawen pay laeng ti Apo kadatayo nga agsakripisiotayo. Ngem ita idawatna a kasapulan ti sabali a kita ti panagidaton. Kinunana: “Saanyon nga idaton pay kaniak ti agayus a dara, … ken dagiti napuoran a sagsagutyo. … Ket idatonyo kaniak a daton ti nasneban a puso ken napnuan babawi nga espiritu” (3 Nephi 9:19–20). Ti “nasneban a puso ken napnuan babawi nga espiritu” ket kayatna a sawen a nalaus a pagladingitantayo dagiti basbasoltayo bayat ti panangipakumbabatayo iti bagbagitayo ken pagbabawyantayo dagitoy.

• Apay a natallugod dagiti tao nga agaramid kadagiti sakripisio?

Insurat ni Apostol Pablo a nasken nga agbalintayo koma a sibibiag a sakripisio, nasantuan ken makaay-ayo iti Dios (kitaen iti Taga Roma 12:1).

No masapul nga agbalintayo a sibibiag a sakripisio, nasken a sitatallugodtayo a mangted iti amin nga adda kadatayo para iti Ti Simbaan ni Jesucristo dagiti Santo iti Ud-udina nga Aldaw a mangbangon ti pagarian ti Dios iti daga ken agbannog a mangtunton iti Zion (kitaen iti 1 Nephi 13:37).

Maysa a baknang nga agtutubo nga agturay ti nagsaludsod iti Mangisalakan, “Ania ti aramidek tapno matawidko ti agnanayon a biag?” Insungbat ni Jesus, “Ammom dagiti bilbilin, Dika makikamalala, Dika mamapatay, Dika agtakaw, Dika agsao iti natiri a pangpaneknek, Dayawem ni amam ken ni inam.” Ket kinuna ti baknang nga agtutubo, “Amin dagitoy a banag tinungpalko nanipud idi kinaubingko.” Ket ni Jesus idi mangngegna daytoy, kinunana, “Agkurangka pay iti maysa a banag: ilakom ti isu amin a kukuam ket itedmo kadagiti napanglaw, ket addanto gamengmo sadi langit: ket umayka, surotennak.” Idi nangngeg ti agtutubo a lalaki daytoy, nagladingit daytoy. Nabaknang unay isuna ken naitalimudok ti pusona iti kinabaknangna. (Kitaen iti Lucas 18:18–23; kitaen met iti ladawan iti daytoy a kapitulo.)

Nasayaat a tao ti agtutubo nga agturay. Ngem idi maipasango iti pannubok, saan a nagtallugod a mangisakripisio kadagiti nainlubongan a sanikuana. Iti sabali a bangir, natallugod dagiti disipulo ti Apo a da Pedro ken Andres a nangisakripisio iti amin a banag para iti pagimbagan ti pagarian ti Dios. Idi kinuna ni Jesus kadakuana, “Umaykay sumurot kaniak, … dagus a pinanawanda dagiti iketda, ket simmurotda kenkuana” (Mateo 4:19–20).

Kas kadagiti disipulo, mabalintayo nga idaton dagiti inaldaw nga aramidtayo a kas sakripisio iti Apo. Mabalintayo a sawen ti, “Maaramid koma ti pagayatam.” Inaramid ni Abraham daytoy. Nagbiag isuna iti daga sakbay ni Cristo, kadagiti aldaw a naidawat a kasapulan dagiti sakripisio ken mapuoran a daton. Kas pannubok iti pammati ni Abraham, binilin ti Dios isuna a mangidaton iti anakna a ni Isaac a kas maysa a sakripisio. Ni Isaac ket kakaisuna nga anak da Abraham ken Sara. Ti bilin a mangidaton kenkuana a kas sakripisio ket nasakit unay para ken ni Abraham.

Nupay kasta, nakaad-adayo ti dinaliasatda ken Isaac a nagturong iti Bantay Moria, a pakaaramidan ti sakripisio. Nagdaliasatda iti uneg ti tallo nga aldaw. Panunotem dagiti pampanunoten ni Abraham ken ti sakit ti nakemna. Nasken a maisakripisio ti anakna iti Apo. Idi nakadanonda iti Bantay Moria, inawit ni Isaac ti kayo a pagsungrod ket binitbit ni Abraham ti apuy ken ti buneng agingga iti lugar a pangbangonanda iti altar. Kinuna ni Isaac, “Amak … adtoy ti apuy ken ti kayo a pagsungrod: ngem sadino ti yan ti kordero a maidaton a mapuoran?” Insungbat ni Abraham, “Ti Dios mangisagananto iti kordero a maipaay kenkuana a daton a mapuoran, anakko.” Kalpasanna nangbangon ni Abraham iti altar ket inurnosna dagiti kayo iti rabawna. Rineppetna ni Isaac ket impaiddana iti rabaw ti kayo. Kalpasanna innalana ti buneng a pangpatayna ken ni Isaac. Iti dayta a kanito maysa nga anghel ti Apo ti nangpasardeng kenkuana, a kinunana, “Abraham … saanmo nga idisso ta imam iti ubing, ket uray ania dika aramiden kenkuana: ta ita mabigbigko a mabutengka iti Dios, yantangay dika impaidam kaniak ti anakmo, ti bugbugtong nga anakmo.” (Kitaen iti Genesis 22:1–14.)

Nalabit a nalaus ti rag-o ni Abraham ta saannan a kasapulan nga isakripisio ti anakna. Ngem ipatpategna unay unay ti Apo gapu ta nagtallugod a nangaramid iti ania man a banag a kiniddaw ti Apo.

• Ania dagiti pagarigan ti panagsakripisio a naimatangam a natungpal iti biag dagiti tao nga am-ammom? Ania dagiti pagarigan ti panagsakripisio a nakitamon iti biag dagiti kapuonam? Iti biag dagiti nagkauna a miembro ti Simbaan? iti biag dagiti tattao kadagiti nasantuan a kasuratan? Ania ti nasursurom manipud kadagitoy a pagarigan?

Babaen laeng ti panagsakripisio a makapagbalintayo a maikari a makipagtaeng iti sidong ti Dios. Babaen laeng ti panagsakripisio a masagraptayo ti agnanayon a biag. Adu a nagbiag kasakbayantayo ti nangisakripisio iti amin nga adda kadakuada. Nasken a natallugodtayo a mangaramid iti kas iti inaramidda no kalikagumantayo ti nawadwad a gunggona a sagsagrapenda.

Mabalin a saan a makiddaw kadatayo nga isakripisiotayo iti amin a banag. Ngem kas ken ni Abraham, nasken a natallugodtayo a mangisakripisio iti amin a banag tapno agbalintayo a maikari a makipagtaeng iti sidong ti Apo.

Kanayon nga agsakripisio iti napalalo dagiti tao ti Dios ken iti adu a nadumaduma a wagas. Sumagmamano ti nagsagaban iti rigat ken pannakaumsi gapu iti ebanghelio. Sumagmamano a kabarbaro a napasurot iti Simbaan ti linaksid dagiti pamiliada. Timmalikuden dagiti nabayagen a gagayyem. Sumagmamano a miembro ti nakapukaw iti trabahoda; sumagmamano ti nakapukaw iti biagda. Ngem makitkita ti Apo dagiti panagsakripisiotayo; inkarina, “Tunggal maysa a nangpanaw kadagiti balbalay wenno kakabsat a lallaki wenno babbai wenno ama wenno ina, wenno asawa, wenno annak, wenno dagdaga, gapu iti naganko, umawatto iti maminsangagasut a kastoy, ken tawidennanto ti biag nga agnanayon” (Mateo 19:29).

Bayat ti pannakapapigsa dagiti pammaneknektayo maipapan iti ebanghelio, agbalintayo a makabael nga agaramid iti ad-adu pay a sakripisio iti Apo. Kitaen dagiti sakripisio a naaramid kadagitoy pudno a pagarigan:

Maysa a miembro ti Simbaan iti Germany ti nagurnong iti apagkapullona iti adu a tawen agingga a makaumay ti maysa a tao nga addaan iti priesthood authority ken mangawat iti daytoy.

Maysa a visiting teacher iti Relief Society ti nagserbi iti 30 a tawen a saan a nangliwat iti naituding nga aramidenna.

Maysa a grupo dagiti Santo iti South Africa ti nagbiahe a nakatakder iti uneg ti tallo nga aldaw tapno mangngegan ken makitada ti propeta ti Apo.

Iti maysa nga area conference idiay Mexico, naturog dagiti miembro ti Simbaan iti paraangan ket nagayunoda bayat dagiti aldaw ti komperensia. Naaramatda amin a kuartada tapno laeng makapanda iti komperensia ket awan ti nabati nga agpaay iti taraon ken pagdagusanda.

Maysa a pamilia ti nangilako iti kotseda tapno maalada ti kuarta a kayatda nga ited iti pondo a pangbangon iti templo.

Sabali pay a pamilia ti nangilako iti balayda tapno adda gastuenda a mapan iti templo.

Adu a napudno a Santo iti Ud-udina nga Aldaw ti addaan iti bassit a kuarta a pagbiag, ngem baybayadanda ti apagkapullo ken datonda.

Maysa a kabsat a lalaki ti nangisakripisio iti trabahona gapu ta nagkedked nga agtrabaho iti Domingo.

Iti maysa a branch, impaay dagiti agtutubo a siwawaya ken sitatallugod ti panawenda tapno aywananda dagiti babassit nga ubbing bayat ti itutulong dagiti nagannak kadakuada a mangbangon iti balay a pagmimitingan.

Insakripisio wenno intantan dagiti agtutubo a lallaki ken babbai dagiti napipintas a gundaway iti trabaho, edukasion, wenno isport tapno makapagserbida a kas misionario.

Adu pay a pagarigan ti mabalin nga ited maipapan kadagiti agsaksakripisio para iti Apo. Ngem umdasen ti maaddaan iti lugar iti pagarian ti Nailangitan nga Ama a supapak ti ania man a panangisakripisiotayo iti panawen, talento, pigsa, kuarta, ken biagtayo. Babaen ti panagsakripisio makagun-odtayo iti pannakaammo manipud iti Apo a maikaritayo Kenkuana (kitaen iti DkK 97:8).

• Apay iti panagkunam a ti kinatallugodtayo nga agsakripisio ket mainaig iti panagsaganatayo a makipagtaeng iti sidong ti Dios?

• Lucas 12:16–34 (no sadino ti yan ti gameng, addanto met idiay ti puso)

• Lucas 9:57–62 (agsakripisio tapno maikari iti pagarian)

• DkK 64:23; 97:12 (ita ti aldaw a panagsakripisio)

• DkK 98:13–15 (dagiti mangpukaw iti biagda gapu iti Apo masarakandanto daytoy)

• Alma 24 (insakripisio dagiti tao ni Ammon ti biagda imbes a labsingenda ti karida iti Apo)