Dagiti Libro ken Adalen
Kapitulo 20: Panagbuniag

Panagbuniag

Kapitulo 20

Ladawan
A Hispanic missionary baptizing a Hispanic man in a large font or pool.

Ti Bilin nga Agpabuniag

  • Apay a nasken a mabuniagantayo?

Iti agdama, kas kadagidi aldaw ni Jesus, adda dagiti masinunuo a pagbatayan ken ordinansa ti ebanghelio a nasken a sursuruen ken tungpalentayo. Ti maysa a pagbatayan ti ebanghelio ket pudno a panamati wenno pannursuro. Ti ordinansa ket maysa a seremonia. Ti dua nga umuna a pagbatayan ti ebanghelio ket pammati ken ni Apo Jesucristo ken panagbabawi. Ti panagbuniag ti umuna nga ordinansa ti ebanghelio. Maysa kadagiti pammilin nga inted ti Apo kadagiti Apostolna ket, “Inkayo ngarud ket pagbalinenyo nga ad-adalan dagiti amin a nasion, a bautisaranyo ida iti nagan ni Ama, ken ti Anak, ken ti Espiritu Santo: nga isursuruyo kadakuada nga aywananda dagiti isu amin a banag nga imbilinko kadakayo” (Mateo 28:19–20).

Nasken a Mabuniagantayo para iti Pannakaugas dagiti Basbasoltayo

No mamatitayo ken ni Jesucristo, agbabawi, ken mabuniagan, mapakawan dagiti basbasoltayo babaen ti Pannubbot ni Jesucristo.

Manipud kadagiti nasantuan a kasuratan masursurotayo a ni Juan Bautista ket “nangbautisar iti let-ang ken nangikasaba iti pannakabautisar ti panagbabawi a maipaay iti pannakaikkat dagiti basbasol” (Marcos 1:4). Insuro ni Apostol Pedro, “Agbabawikayo, ken mabautisaran ti tunggal maysa kadakayo iti nagan ni Jesucristo a maipaay iti pannakaikkat dagiti basbasolyo” (Dagiti Aramid 2:38). Kalpasan ti pannakapasurot ni Pablo, kinuna ni Ananias kenkuana, “Tumakderka ket pabautisaranka, ket ugasam dagiti basbasolmo” (Dagiti Aramid 22:16).

Nasken a Mabuniagantayo tapno Agbalin a Miembro ti Simbaan ni Jesucristo

“Amin dagiti agpakumbaba iti Dios, ken agtarigagay a mabuniagan … ket … imbabawidan amin dagiti basolda … maawatda a mabuniagan iti simbaanna” (DkK 20:37).

Nasken a Mabuniagantayo sakbay a Maawattayo ti Sagut ti Espiritu Santo

Kinuna ti Apo, “No sumurotkayo kaniak, ken … agbabawikayo iti amin a basolyo, ket mabuniagankayo, a kas iti danum, iti nagan ti Bugbugtong nga Anakko, … maawatyonto ti sagut ti Espiritu Santo” (Moises 6:52).

Nasken a Mabuniagantayo tapno Maipakita ti Panagtungpal

Awanan iti basol ni Jesus, ngem nabuniagan Isuna. Kinunana a kasapulan ti panagbuniagna iti “panangtungpal iti amin a kinalinteg” (Mateo 3:15). Inlawlawag ni propeta Nephi nga imbaga ti Apo kenkuana, “Surotendak, ket aramidenyo dagiti banag a nakitayo nga inaramidko … nga addaan puso a napnuan tarigagay, nga awanan panaginkukuna ken awanan panangallilaw iti sango ti Dios, ngem ketdi addaan iti pudno a panggep, a mangibabawi kadagiti basolyo, a mangisaksi iti Ama a siaayatkayo nga umawat iti nagan ni Cristo, babaen iti pannakabuniag” (2 Nephi 31:12–13).

Nasken a Mabuniagantayo tapno Makastrek iti Celestial a Pagarian

Kinuna ni Jesus “Siasino man a mamati kaniak, ken mabuniagan … mangtawid iti pagarian ti Dios. Ket siasino man a saan a mamati kaniak, ket saan a mabuniagan, madusanto” (3 Nephi 11:33–34). Ti panagbuniag ket isu ti ruangan a serkantayo iti dalan nga agturong iti celestial a pagarian (kitaen iti 2 Nephi 31:17–18).

Ti Umno a Wagas ti Panagbuniag

  • Kasano ti nasken a pannakabuniagtayo?

Adda maysa laeng nga umno a wagas ti panagbuniag. Impalgak ni Jesus ken ni Propeta Joseph Smith a ti tao nga addaan iti priesthood authority a mangbuniag ket “mapan … iti danum a kaduana ti tao a nangidatag iti bagina a mabuniagan. … Sa iraremna iti danum, sana met la ilung-aw” (DkK 20:73–74). Kasapulan ti pannakairarem. Insuro ni Apostol Pablo a ti pannakairarem iti danum ken ilulung-aw manen ket mangisimbolo iti ipapatay, pannakaitanem, ken panagungar. Kalpasan ti panagbuniag mangrugitayo iti baro a biag. Kinuna ni Pablo:

“Dikay ammo aya a datayo amin a nabautisaran ken Jesucristo nabautisarantayo iti ipapatayna?

“Naitanemtayo ngarud a naikanunong kenkuana gapu iti pannakabautisar iti patay: tapno kas iti panagungar ni Cristo kadagiti natay gapu iti dayag ti Ama, kasta met a magnatayo koma iti baro a panagbiag.

“Ta no naikanunongtayo kenkuana iti kaasping ti ipapatayna, mairanudtayo met kenkuana iti kaasping ti panagungarna” (Taga Roma 6:3–5).

Ti panagbuniag babaen iti pannakairarem babaen iti tao nga addaan iti umno a turay laeng ti maawat a wagas ti panagbuniag.

  • Apay a napateg ti turay a mangannong iti panagbuniag?

  • Iti ania a wagwagas, a ti panagbuniag babaen iti pannakairarem ket mayarig iti pannakaitanem ken Panagungar ti Mangisalakan?

Panagbuniag iti Tawen a Kaadda ti Sungsungbatan

  • Asino ti nasken a mabuniagan?

Tunggal tao a nakadanonen iti walo a tawen ti edadna ken agsungbat (responsable) kadagiti tignayna ket nasken a mabuniagan. Isursuro ti sumagmamano a simbaan a nasken a mabuniagan dagiti babassit nga ubbing. Daytoy ket saan a panagtungpal kadagiti pannursuro ti Mangisalakan. Idi nagsao ni Jesus maipapan kadagiti babassit nga ubbing, kinunana, “Dagiti kakastoy kukuada ti pagarian ti langit” (Mateo 19:14).

Kinuna ni propeta Mormon a pananglais iti sango ti Dios ti mangbuniag kadagiti babassit nga ubbing, gapu ta awan kabaelanda nga agbasol. Kasta met a, saan a kasapulan a mabuniagan dagiti tao nga adda kurkurangna wenno saan a makaammo iti umno ken biddut (kitaen iti Moroni 8:9–22).

Masapul a mabuniagan ti amin a dadduma pay a tattao. Nasken nga awatentayo ti ordinansa ti panagbuniag ket agtalinaedtayo a pudno kadagiti katulagan nga aramidentayo iti dayta a gundaway.

  • Ania ti maisaom iti maysa a gayyem a mamati a nasken a mabuniagan dagiti maladaga?

Agaramidtayo kadagiti Katulagan No Mabuniagantayo

Isursuro ti adu a nasantuan a kasuratan maipapan iti panagbuniag. Iti maysa kadagitoy a nasantuan a kasuratan, insuro ni propeta Alma a ti pammati ken panagbabawi ket dagiti addang a mangisagana kadatayo para iti panagbuniag. Insurona a no mabuniagantayo agaramidtayo iti katulagan iti Apo. Ikaritayo nga agaramid kadagiti masinunuo a banag, ket bendisionannatayo ti Dios kas supapak.

Inlawlawag ni Alma a nasken a kayattayo a maawagantayo a tattao ti Dios. Nasken a natallugodtayo a tumulong ken mangliwliwa iti tunggal maysa. Nasken nga agtakdertayo a kas saksi ti Dios iti amin a kanito ken iti amin a banag ken iti amin a lugar. No aramidentayo dagitoy a banag ken mabuniagan, pakawanento ti Dios dagiti basbasoltayo. Imbaga ni Alma kadagiti tao a namati kadagiti pannursurona maipapan iti ebanghelio:

“Adtoy, addagitoy dagiti danum ti Mormon. … Ket ita, gapu iti tarigagayyo nga umay iti salinong ti Dios, ken maawagan a tattaona, … ania ti pamkuatanyo a di agpabuniag iti nagan ti Apo, a kas saksina iti pannakitulagyo kenkuana, nga agpaaykayo kenkuana ken salimetmetanyo dagiti bilinna, tapno nabusbuslon ti panangiburayna iti Espirituna kadakayo?” Mosiah 18:8, 10). Nagsisipat dagiti tattao gapu iti rag-o ket kinunada a tarigagayda ti agpabuniag. Binuniagan ni Alma ida kadagiti Danum ti Mormon. (Kitaen iti Mosiah 7–17.)

Insuro ni Alma a no mabuniagantayo agaramidtayo kadagiti katulagan iti Apo a:

  1. Umay iti salinong ti Apo.

  2. Makipagbaklay iti imet ti tunggal maysa.

  3. Agtakder a kas saksi ti Dios iti amin a kanito ken iti amin a lugar.

  4. Agserbi iti Dios ken agtungpal kadagiti bilinna.

No mabuniagantayo ken agtungpaltayo kadagiti katulagan ti panagbuniag, ikari ti Apo a:

  1. Pakawanenna dagiti basbasoltayo (kitaen iti Dagiti Aramid 2:38; DkK 49:13).

  2. Nabusbuslon ti panangiburayna iti Espirituna kadatayo (kitaen iti Mosiah 18:10).

  3. Ikkannatayo iti inaldaw a tarabay ken ti tulong ti Espiritu Santo (kitaen iti Dagiti Aramid 2:38; DkK 20:77)

  4. Maibilangtayo iti Umuna a Panagungar (kitaen iti Mosiah 18:9).

  5. Itedna kadatayo ti agnanayon a biag (kitaen iti Mosiah 18:9).

  • Ania iti panagkunam ti kayat a sawen ti makipagbaklay iti imet ti tunggal maysa? agtakder a kas saksi ti Dios iti amin a kanito ken iti amin a lugar?

Ikkannatayo ti Panagbuniag iti Baro a Pangrugian

Babaen iti panagbuniag mangrugitayo iti baro a dalan ti biag. Dayta ti gapu no apay nga awagantayo daytoy iti baro a pannakayanak. Kinuna ni Jesus a malaksid no mayanaktayo iti danum ken iti Espiritu, saantayo a makastrek iti pagarian ti Dios (kitaen iti Juan 3:3–5). Nailawlawag a nasayaat daytoy a pagbatayan ken ni Adan:

“Gapu ta naipasngaykayo iti lubong babaen ti danum, ken dara, ken ti espiritu nga inaramidko, ket isu a nagbalin ti tapok a nabiag a kararua, a kas iti pannakasapul ti pannakaipasngayyo manen iti pagarian ti langit, ti danum, ken iti Espiritu, ket maugasankayo babaen iti dara nga isu ti dara ti Bugbugtongko” (Moises 6:59).

Kinuna ni Apostol Pablo a kalpasan ti panagbuniagtayo nasken a mangrugitayo iti baro a biag: Naitanemtayo ngarud a naikanunong kenkuana gapu iti pannakabautisar; … kasta met a magnatayo koma iti baro a panagbiag” (Taga Roma 6:4). Maysa kadagiti kaindaklan a bendision ti panagbuniag ket isu ti panangted daytoy kadatayo iti baro a pangrugian iti dalantayo nga agturong iti agnanayon a panggep a tun-oyen.

  • Kasano a maysa a baro a pangrugian ti panagbuniagmo?

Dagiti Mainayon a Nasantuan a Kasuratan