Dagiti Libro ken Adalen
Kapitulo 42: Ti Pannakaummong ti Balay ni Israel

Ti Pannakaummong ti Balay ni Israel

Kapitulo 42

Ladawan
The Old Testament prophet Israel (Jacob) with his sons gathered around him. One of the sons (Joseph) is kneeling before his father. Israel has his hand on the son's head as he prepares to give him a priesthood blessing.

Ti Balay ni Israel dagiti Naitulag a Tattao ti Dios

  • Ania dagiti pagrebbengan dagiti naitulag a tattao ti Dios kadagiti pagilian ti lubong?

Naindaklan a propeta ni Jacob a nagbiag iti ginasgasut a tawen sakbay ti panawen ni Cristo. Gapu ta napudno ni Jacob, inikkan isuna ti Apo iti naisangsangayan a nagan nga Israel, a kaipapananna ti “maysa nga agballigi iti Dios” wenno “bay-an nga agballigi ti Dios” (Bible Dictionary, “Israel,” 708). Naaddaan ni Jacob iti sangapulo-ket-dua nga annak a lallaki. Nagbalin dagitoy nga annak a lallaki ken dagiti pamiliada a sangapulo-ket-dua a tribu ti Israel, wenno dagiti Israelita (kitaen iti Genesis 49:28).

Apoko ni Abraham ni Jacob. Nangaramid ti Apo iti agnanayon a katulagan ken ni Abraham a napabaro ken ni Isaac ken ni Jacob ken dagiti annakna (kitaen ti kapitulo 15 iti daytoy a libro; kitaen met iti ladawan iti daytoy a kapitulo, a mangipakpakita iti panangbendision ni Abraham kadagiti annakna a lallaki). Inkari ti Apo a dagiti Israelita ket agbalinto a naitulag a tattaona no la ketdi agtungpaldanto kadagiti bilinna (kitaen iti Deuteronomio 28:9–10). Agbalindanto a bendision iti amin a pagilian ti lubong babaen ti panangipanda iti ebanghelio ken ti priesthood kadakuada (kitaen iti Abraham 2:9–11). Iti kasta, tungpalendanto ti katulaganda iti Apo ket tungpalennanto met ti katulaganna kadakuada.

Nasayyasayya ti Balay ni Israel

Inulit-ulit dagiti propeta ti Apo a binallaagan ti balay ni Israel iti mabalin a mapasamak no nadangkesda. Impadto ni Moises, “Ket ni Jehova iwarasnakanto kadagiti amin nga ili manipud maysa a pungto ti daga agingga iti sabali a pungto ti daga” (Deuteronomio 28:64).

Iti laksid daytoy a ballaag, intultuloy dagiti Israelita ti nanglabsing kadagiti bilin ti Dios. Naggugubatda ket nabingayda iti dua a pagarian: ti Akin-amianan a Pagarian, a naawagan iti pagarian ti Israel, ken ti Akin-abagatan a Pagarian, a naawagan iti pagarian ti Juda. Sangapulo kadagiti sangapulo-ket-dua a tribu ti Israel ti nagindeg iti Akin-amianan a Pagarian. Kabayatan maysa a gubat pinarmek ida dagiti kabusorda ket innalada ida a balud. Iti saan a nabayag sumagmamano kadakuada ti naglibas a napan kadagiti daga iti amianan ket napukawda iti dadduma a paset ti lubong.

Agarup 100 a tawen kalpasan ti pannakaparmek ti Akin-amianan a Pagarian, naparmek ti Akin-abagan a Pagarian. Nadadael ti siudad a kabisera ti Jerusalem idi 586 B.C., ket adu a miembro ti nabati pay a dua a tribu ti Israel ti naala a balud. Iti saan a nabayag, sumagmamano kadagiti miembro dagitoy a tribu ti nagsubli ket binangonda manen ti Jerusalem. Sakbay laeng ti pannakadadael ti Jerusalem, ni Lehi ken ti pamiliana, a miembro idi ti balay ti Israel, ket pimmanawda iti siudad ket nagnaedda kadagiti kontinente ti America.

Kalpasan ti panawen ni Cristo, ti Jerusalem, ket dinadael manen dagiti soldado a Romano iti daytoy a panawen. Nasayyasayya dagiti Judio iti adu a paset ti lubong. Ita nga agdama masarakan dagiti Israelita iti amin a pagilian ti lubong. Adu kadagitoy a tao ti saan a makaammo a naggapuda iti nagkauna a balay ni Israel.

  • Ania dagiti pagsayaatan a simmangbay kadagiti annak ti Dios gapu ta nasayyasayya dagiti naitulag a tattaona iti intero a daga?

Nasken a Maummong ti Balay ni Israel

  • Apay a kayat ti Apo a maummong dagiti taona?

  • Kasano a maummongto ti balay ni Israel?

Inkari ti Apo nga iti maysa nga aldaw maummongto dagiti naitulag a tattaona: “Urnongekto ti natda iti pangenko kadagiti amin a dagdaga a nangipaturongak kadakuada” (Jeremias 23:3).

Um-ummongen ti Dios dagiti annakna babaen iti aramid ti misionario. Bayat ti pannakaammo dagiti tao maipapan ken ni Jesucristo, panangawatda kadagiti ordinansa ti pannakaisalakan ken panangtungpalda kadagiti mainaig a katulagan, agbalinda nga “annak iti katulagan” (3 Nephi 20:26). Addaan Isuna iti napapateg a gapu iti panangumongna kadagiti annakna. Ummongenna ida tapno masursuroda dagiti pannursuro ti ebanghelio ken maisaganada ti bagbagida a sumabat iti Mangisalakan inton umay manen Isuna. Ummongenna ida tapno bangonendanto dagiti templo ken annongenda dagiti sagrado nga ordinansa para kadagiti kapuonan a pimmusayen nga awanan iti daytoy a gundaway. Ummongenna ida tapno mapapigsada ti tunggal maysa ken agkaykaysada iti ebanghelio, a mangbirok iti pannakasaluad manipud kadagiti dakes nga impluensia iti lubong. Ummongenna pay ida tapno maisaganada ti bagbagida a mangibinglay iti ebanghelio kadagiti dadduma.

Naited ken ni Joseph Smith ti bileg ken turay a mangiturong iti aramid a panangummong iti balay ni Israel babaen ken ni propeta Moises, a nagparang idi 1836 iti Kirtland Temple (kitaen iti DkK 110:11). Manipud iti dayta a panawen, iniggaman ti tunggal propeta dagiti tulbek para iti panangummong iti balay ti Israel, ket daytoy a panaguummong ket nagbalinen a napateg a paset ti aramid ti Simbaan. Maum-ummong itan dagiti naitulag a tattao bayat ti panangawatda iti naisubli nga ebanghelio ken panagserbida iti Dios da Abraham, Isaac, ken Jacob (kitaen iti Deuteronomio 30:1–5).

Nasken nga umuna a naespirituan ket kalpasanna pisikal a maummong dagiti Israelita. Maummongda a naespirituan bayat ti panagkamengda iti Ti Simbaan ni Jesucristo dagiti Santo iti Ud-udina nga Aldaw ken panagaramid ken panagtungpalda kadagiti sagrado a katulagan. Nangrugi ti naespirituan a pannakaummong bayat ti panawen ni Joseph Smith ken agtultuloy ita nga agdama iti intero a sangalubongan. Dagiti napasurot iti Simbaan ket Israelita babaen man iti dara wenno pannakaadaptar. Maibilangda iti pamilia da Abraham ken Jacob (kitaen iti Abraham 2:9–11; Taga Galacia 3:26–29).

Kinuna ni Presidente Joseph Fielding Smith: “Adu a pagilian ti naibagi iti … Simbaan. … Immayda gapu ta riniing ida ti Espiritu ti Apo; … iti panangawatda iti espiritu ti panaguummong,tinallikudanda ti amin a banag gapu iti ebanghelio” (Doctrines of Salvation, comp.Bruce R. McConkie, 3 vols. [1954–56], 3:256; nagiray a balikas iti orihinal).

Ti pisikal a panaguummong ti Israel ket kaipapananna a dagiti naitulag a tattao ket “aguurnongda nga agawid iti daga a tinawidda, ken makapagsimpadan iti amin a daga a naikari kadakuada” (2 Nephi 9:2). Maummongto dagiti tribu da Ephraim ken Manases kadagiti kontinente ti America. Agsublinto ti tribu ni Juda iti siudad ti Jerusalem ken iti lugar nga aglawlaw iti daytoy. Awatento dagiti sangapulo a napukaw a tribu manipud iti tribu ni Ephraim dagiti naikari a bendisionda (kitaen iti DkK 133:26–34).

Idi immuna a naipasdek ti Simbaan, nabilin dagiti Santo nga aguummong iti Ohio, sa iti Missouri, ket kalpasanna iti Salt Lake Valley. Nupay kasta, iti agdama, insuron dagiti kabaruanan a propeta a bangonento dagiti miembro ti Simbaan ti pagarian ti Dios kadagiti bukodda a daga. Kinuna ni Elder Russell M. Nelson: “Ti panangpili nga umasideg ken ni Cristo ket saan a banag a maipapan iti pisikal a disso; maysa a banag daytoy maipapan iti panagkumit ti tunggal maysa. Dagiti tao ket ‘maam-ammodanto ti Apo’ [3 Nephi 20:13] a dida panawan dagiti nakayanakanda a daga. Pudno, kadagiti nagkauna nga aldaw ti Simbaan, ti pannakapasurot ket masansan a kaipapananna met ti makipagtaeng iti sabali a pagilian. Ngem ita ti panaguummong ket mapasamak iti tunggal nasion. … Ti lugar a paguummongan para kadagiti Santo a Brazilian ket iti Brazil; ti lugar a paguummongan para kadagiti Santo a Nigerian ket iti Nigeria; ti lugar a paguummongan para kadagiti Santo a Koreano ket iti Korea; ken dadduma pay. Ti Zion ket ‘dagiti natarnaw iti puso.’ [DkK 97:21.] Ti Zion ket sadino man a lugar a yan dagiti nalinteg a Santo” (iti Conference Report, Okt. 2006, 85; wenno Ensign, Nob. 2006, 81).

Saanto a malpas ti pisikal a panaguummong ti Israel agingga iti Maikadua a Yaay ti Mangisalakan ken agtultuloy iti Milenium (kitaen iti Joseph Smith—Mateo 1:37). Kalpasanna maipatungpalto ti kari ti Apo:

“Adtoy, dagiti aldaw dumtengda, kuna ni Jehova, a saanto a masaon, Kas sibibiag a Jehova a nangiruar kadagiti annak ti Israel manipud iti daga nga Egipto;

“Kas sibibiag ni Jehova, a nangiruar kadagiti annak ti Israel manipud iti daga ti amianan, ken manipud kadagiti amin a dagdaga a nangipaturonganna kadakuada: ket yegkonto manen ida iti dagada nga intedko kadagiti ammada” (Jeremias 16:14–15).

  • Iti ania a wagas a nakaummonganyon a naespirituan kas maysa kadagiti naitulag a tattao ti Apo?

  • Iti ania a wagas a nakiramankayon iti pannakaummong dagiti sabali?

Dagiti Mainayon a Nasantuan a Kasuratan