Mabalin nga Agnanayon ti Pamilia

• Apay nga imbaonnatayo ti Nailangitan nga Amatayo iti daga kas miembro dagiti pamilia?

“Inordenan ti Dios ti panagkallaysa iti nagbaetan ti maysa a lalaki ken maysa a babai. … Ti kaamaan ti sentro iti plano ti Namarsua para iti agnanayon a pagtungpalan dagiti annakna” (“Ti Kaamaan: Maysa a Waragawag iti Lubong,” Ensign, Nob. 1995, 102).

Kalpasan a pinagkaysa ti Nailangitan nga Ama da Adan ken Eva iti kallaysa, binilinna ida a maaddaan iti annak (kitaen iti Genesis 1:28). Impalgakna a maysa kadagiti panggep ti kallaysa ket mangted kadagiti mortal a bagi para kadagiti espiritu nga annakna. Katakunaynay dagiti nagannak ti Nailangitan nga Amatayo. Kayatna nga umawat ti tunggal maysa kadagiti espiritu nga annakna iti pisikal a bagi ken makapadas iti biag iti daga. No mangisangbay ti maysa a lalaki ken maysa a babai iti annak iti daytoy a lubong, tulonganda ti Nailangitan nga Ama a mangipatungpal iti planona.

Tunggal kaippasngay nga anak ket nasken a maawat iti pamilia a siraragsak. Tunggal maysa ket anak ti Dios. Nasken a maaddaantayo iti panawen a makipagragsak kadagiti annaktayo, makiay-ayam kadakuada, ken mangisuro kadakuada.

Kinuna ni Presidente David O. McKay, “Mamatiak iti amin a pusok a ti kasayaatan a lugar a pagsaganaan para iti … agnanayon a biag ket iti pagtaengan” (“Blueprint for Family Living,” Improvement Era, Abr. 1963, 252). Iti pagtaengan, masursurotayo a kaduatayo dagiti pamiliatayo ti panagteppel iti bagi, panagsakripisio, kinapudno, ken ti pateg ti panagtrabaho. Masursurotayo ti mangipateg, mangibinglay, ken agserbi iti tunggal maysa.

Pagrebbengan dagiti amma ken inna nga isuro dagiti annakda maipapan iti Nailangitan nga Ama. Nasken nga ipakitada babaen ti pagwadan nga ay-ayatenda Isuna gapu ta tungtungpalenda dagiti bilinna. Nasken pay nga isuro dagiti nagannak dagiti annakda nga agkararag ken agtungpal kadagiti bilin (kitaen iti Dagiti Proverbio 22:6).

• Apay a ti pagtaengan ti kasayaatan a lugar a pagsaganaan para iti agnanayon a biag?

• Kasano a matulongantayo dagiti agtutubo ti Simbaan a makaawat iti kinasagrado ti pamilia ken ti katulagan iti kallaysa?

Makapagkaykaysa dagiti pamilia iti agnanayon. Tapno malak-amtayo daytoy a bendision nasken nga agkallaysatayo iti templo. No agkallaysa dagiti tao iti ruar ti templo, agpatingga ti kallaysa no pumusay ti maysa kadagiti agkatakunaynay. No agkallaysatayo iti templo babaen ti turay wenno awtoridad ti Melchizedek Priesthood, maikallaysatayo para ita a panawen ken iti kinaagnanayon. No tungpalentayo dagiti katulagantayo iti Apo, agkaykaysanto iti agnanayon dagiti pamiliatayo a kas agassawa, ken annak. Saannatayo a mapagsina ti ipapatay.

• Kasano a maaddaantayo iti natibtibker a panagtutunos kadagiti pagtaengantayo?

Nasken a naanus ken naasi iti tunggal maysa dagiti agassawa. Nasken a dida kaano man agaramid wenno agsao iti ania man a banag a makapasakit iti rikna ti tunggal maysa. Nasken pay nga ikarigatanda nga aramiden ti amin a banag agingga a kabaelanda tapno maparagsak ti tunggal maysa.

Bayat ti pannakaammo dagiti nagannak iti Dios ken panangikarigatanda nga agbalin a kas Kenkuana, isurodanto dagiti annakda nga agpipinnateg. Iti Libro ni Mormon, inlawlawag ni Ari Benjamin:

“Diyo ipalubos dagiti annakyo … [nga] agkakabil ken agaapa iti tunggal maysa. …

“Ngem isuroyo ida a magna iti dalan ti kinapudno ken kinasimbeng; isuroyo ida nga agpipinnateg, ken agpaay iti tunggal maysa” (Mosiah 4:14–15).

Kas kamkameng ti pamilia matulongantayo ti tunggal maysa a makarikna iti panagtalek babaen ti panangpapigsa iti pakinakem ken napudno a panagdayaw. Nasken a marikna ti tunggal anak nga isu ket napateg. Kasapulan nga ipakita dagiti nagannak a kaay-ayoda ti ar-aramiden dagiti annakda ken yebkasda ti ayat ken pannakaseknanda kadagiti annakda. Nasken met nga ipakita dagiti annak ti panagayatda kadagiti nagannak kadakuada. Nasken a managtungpalda ken ikarigatanda ti agbiag iti kita ti biag a mangisangbayto iti pakaidayawan kadagiti nagannak kadakuada ken iti nagan ti pamiliada.

• Ania ti maaramid dagiti nagannak tapno maallukoyda dagiti annakda nga agbalin a nasayaat a gagayyem iti tunggal maysa? Ania ti maaramid dagiti agkakabsat tapno mapagtalinaedda ti pannakigayyem iti tunggal maysa?

• Ania ti maaramid dagiti agassawa tapno matulonganda ti tunggal maysa nga agbalin a naragsak?

• Ania ti ar-aramidem a makatulong a mangpatibker iti pamiliam ken mamagbalin iti daytoy a naballigian?

Insuro ni Presidente Harold B. Lee, “Ti kapatgan iti aramid ti Apo nga aramidenyonto ket ti maaramidyo iti uneg dagiti bukodyo a pagtaengan” (Teachings of Presidents of the Church: Harold B. Lee [2000], 134).

Ammo ni Satanas no kasano ti kinapateg dagiti pamilia iti plano ti Nailangitan nga Amatayo. Kalikagumanna a dadaelen ida babaen ti pananglappedna kadatayo nga umasideg iti Apo. Sulisogennatayo nga agaramid kadagiti banag a mangrakrak kadagiti pamiliatayo.

Impakdaar ti Umuna a Panguluen ken ti Korum dagiti Sangapulo-ket-dua nga Apostol, “Maipasdek ken mapagtalinaed dagiti naballigian a kallaysa ken pamilia kadagiti pagbatayan ti pammati, panagkararag, panagbabawi, pammakawan, panagdayaw, panagayat, panangngaasi, panagtrabaho, ken dagiti makaay-ayo nga aramiden iti panagaliwaksay” (Ensign, Nob. 1995, 102).

Kayattayo amin ti maaddaan iti naragsak, naballigian a pamilia. Makatulong kadatayo dagiti sumaganad a banag a manggun-od iti daytoy:

1. Maaddaan iti panagkararag ti pamilia iti tunggal rabii ken agsapa (kitaen iti 3 Nephi 18:21). Aggiddan nga agkararag kas agassawa.

2. Isuro ti ebanghelio kadagiti annak iti tunggal lawas iti family home evening.

3. Kanayon nga agadal kadagiti nasantuan a kasuratan a kas maysa a sangapamiliaan.

4. Agtitinnulong nga agaramid kadagiti banag kas maysa a pamilia, kas kadagiti proyekto nga aramiden, panagaliwaksay, ken panagaramid iti pangngeddeng.

5. Sursuruen ti agbalin a naasi, naanus, naandur, ken managayat (kitaen iti Moroni 7:45–48).

6. Kanayon a dumar-ay kadagiti miting ti Simbaan (kitaen iti DkK 59:9–10).

7. Tungpalen ti balakad ti Apo iti DkK 88:119: “Urnosenyo ti bagbagiyo; isaganayo amin a kasapulanyo; ken mangbangonkayo iti balay, nga isu ti balay a pagkararagan, balay a pagayunuan, balay ti pammati, balay a pagadalan, balay ti gloria, balay ti urnos, balay ti Dios.”

8. Mangidulin iti pakasaritaan ti pamilia, aggigiddan a mangannong iti aramid ti templo, ken umawat kadagiti ordinansa a pangilantip ti templo.

Ti pamilia ti kapatgan a yunit iti Ti Simbaan ni Jesucristo dagiti Santo iti Ud-udina nga Aldaw. Agtalinaed ti Simbaan a tumulong kadagiti pamilia a makagun-od kadagiti agnanayon a bendision ken pannakaitan-ok. Naisangrat dagiti organisasion ken programa iti ikub ti Simbaan a mangpapigsa iti tunggal maysa kadatayo ken tumulong kadatayo nga agbiag a kas pamilia iti agnanayon.

• Ania ti maaramid dagiti pamilia tapno makapagtrabaho kadagiti narikut a panawen?

• Ania ti pammaneknek a nakitamon a makaaramid iti pakaigidiatan dagiti aramid a kas panagkararag ti pamilia, panagadal ti pamilia iti nasantuan a kasuratan, panagbibinnalakad ti pamilia, oras a pannangan ti pamilia, ken family home evening?

• Moises 2:27–28 (naparsua ken nabendisionan ti lalaki ken babai)

• Genesis 2:24 (makitipon ti lalaki iti asawana)

• DkK 49:15–16 (inordenan ti Dios ti panagasawa)

• Taga Efeso 6:4 (idalan dagiti annak iti kinalinteg)

• DkK 132:15–21 (agnanayon a kallaysa)

• DkK 88:119–26 (dagiti pangiturong para iti naballigian a pamilia)

• DkK 93:40–50 (bilinen ti Apo dagiti nagannak a patanorenda dagiti annakda iti silaw ken kinapudno)

• “Ti Kaamaan: Maysa a Waragawag iti Lubong” (mabalin a magun-od iti LDS.org ken iti adu a pablaak ti Simbaan, agraman ti Ensign, Nob. 1995, panid 102; Para iti Pigsa dagiti Agtutubo: Panangipatungpal iti Pagrebbengantayo iti Dios [item number 36550], panid 44; and True to the Faith: A Gospel Reference [item number 36863], dagiti panid 59–61)